ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) ގެ ވެހިކަލަކުން ގިނަ އަދަދެއްގެ ބަނގުރާ ފުޅިތަކެއް އުފުލި ޑްރައިވަރު ޑީޕޯޓުކޮށްފައިވާކަމަށް އެ ކުންފުނިން ހާމަކޮށްފި އެވެ.
މި މަހުގެ 11 ވަނަ ދުވަހު އާރުސީސީގެ ވޭނެއް ފުލުހުން ބަލައި ފާސްކުރުމުގެ ތެރެއިން ގިނަ އަދަދެއްގެ ބަނގުރާ ފުޅިތަކެއް ފުލުހުން ވަނީ އަތުލައިގެންފައެވެ.
ފުލުހުން އެ ވެހިކަލް ބަލާފައިވަނީ ޝައްކުކުރެވޭ ކަންތައްތަކެއް ފާހަގަކުރެވުމާއި ގުޅިގެންނެވެ. އަދި ވެހިކަލްގެ ތެރެއިން ގިނަ އަދަދެއްގެ ބަނގުރާފުޅިތަކެއް ފެނުމުން، ވެހިކަލް ދުއްވަން އިން މީހާ ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
އެކަމާއި ގުޅޭގޮތުން ހަމަ އެދުވަހު އާރުސީސީއިން ބުނީ ގާނޫނާއި ގަވައިދުތަކާއި ޚިލާފުވާ ކަންކަން ކުރުމަށް އެ ކުންފުނިން ހިތްވަރު ނުދޭނެކަމަށެވެ. އަދި އެފަދަ އަމަލެއް ހިންގާ މީހަކު ކުންފުނީގައި ބަހައްޓަންވެސް ބޭނުން ނުވާކަމަށެވެ.
ފުލުހުން ވަނީ އެ މައްސަލަ ބެލުމަށްފަހު އެކަމުގއި ޝާމިލުވާ މީހާ އަނބުރާ ރާއްޖެ ނާދެވޭގޮތަށް ޑީޕޯޓުކޮށްފަ އެވެ.
އާރުސީސީއަކީ ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު ކާނަލް ރިޓަޔާޑް މުހައްމަދު ނާޒިމްގެ މަސްލަހަތު އޮންނަ ކުންފުންޏެއްކަން ފާހަގަކޮށްލެވެ އެވެ.
Advertisement
This content is created and paid for by advertisers and does not involve Voice Journalists
