މާލެ ސިޓީ ކައުންސިލުން ވިލިމާލޭގެ ބަގީ ޚިދުމަތް ފަށަން ތައްޔާރުވެފައި ވަނިކޮށް ސަރުކާރުން ބަސް ޚިދުމަތް ފަށަނީ ރައްޔިތުންގެ ފައިސާ ބޭކާރުކުރުމަށް ކަމަށް މާލެ ސިޓީގެ މޭޔަރު ޑރ. މުޙައްމަދު މުޢިއްޒު ވިދާޅުވެއްޖެއެވެ. މޭޔަރު މިފަދައިން ވިދާޅުވީ މާލެ ސިޓީ ކައުންސިލްގެ 4 ވަނަ ދައުރުގެ 85 ވަނަ ޖަލްސާގައި ވާހަކަފުޅު ދައްކަވަމުންނެވެ.

މޭޔަރު ވިދާޅުވީ މާލެ ސިޓީ ކައުންސިލުން ލާމަރުކަޒީ ނިޒާމުގެ ތެރެއިން ރައްޔިތުންގެ ޚިޔާލު ހޯދައިގެން މިކަން ކުރިއަށްގޮސް ހަމަޖެހެނިކޮށް ސަރުކާރުން ވިލިމާލޭގައި ބަހުގެ ޚިދުމަތްދޭން ނިންމީ ސިޓީ ކައުންސިލްގެ މަޝްވަރާ އެއްވެސް ވަރަކަށް ނުހޯއްދަވާ ކަމަށެވެ.

ވިލިމާލޭގައި ބަގީގެ ޚިދުމަތް ދިނުމަށް ޓްރާންސްޕޯޓް މިނިސްޓްރީއިން ވަނީ 2022 ވަނަ އަހަރުގެ ސެޕްޓެމްބަރު 25 ގައި ރަސްމީ ސިޓީއަކުން މާލެ ސިޓީ ކައުންސިލަށް އެ ހުއްދަވެސް ދެއްވާފައެވެ.

ވިލިމާލޭގައި ބަގީގެ ޚިދުމަތް ދިނުމަށް ޓްރާންސްޕޯޓު މިނިސްޓްރީއިން ދިން ހުއްދަ ސިޓީ 

ޑރ މުއިއްޒު ވިދާޅުވިގޮތުގައި ކައުންސިލުން އެ ޚިދުމަތްދޭން ނިންމީ އޮންނަ ނިޒާމުގެ ތެރެއިން ސަރުކާރާއި ގުޅިގެން ކަމަށެވެ. އެހެން ނަމަވެސް އެ ޚިދުމަތް ފެށުމުގެ ފަހު މަރުހަލާގައި އޮއްވާ  ކުއްލިއަކަށް ސަރުކާރުގެ ކުންފުނި އެމްޓީސީސީއިން ވިލިމާލޭގައި ބަހުގެ ޚިދުމަތްދޭން ނިންމުމަކީ ރައްޔިތުންގެ ފައިސާ އިސްރާފުކުރުން ކަމަށް ޑރ މުއިއްޒު ވަނީ ވިދާޅުވެފަ އެވެ. 

ޑރ މުއިއްޒު އިތުރަށް ވިދާޅުވީ ލާމަރުކަޒީ ގާނޫނުގެ ބޭނުން ކެނޑޭގޮތަށް ސަރުކާރުން އަމަލުތައް ކުރަމުން ދިއުމަކީ ހިތާމަކުރައްވާ ކަމެއްކަމަށް ވިދާޅުވެފަ އެވެ. އަދި ފެށުނީއްސުރެ މާލޭ ސިޓީ ކައުންސިލްގެ މަސައްކަތްތަކަށް ހުރަސްއަޅާ، ލާމަރުކަޒީ ގާނޫނާއި ޚިލާފަށް ސަރުކާރުން މަސައްކަތް ކުރަމުން ދިއުމަކީ މާލޭ ސިޓީކައުންސިލުން އިންތިހާއަށް ކަންބޮޑުވާ ކަމެއްކަމަށް މޭޔަރު ވަނީ ވިދާޅުވެފަ އެވެ.