މޯލްޑިވްސް ރިޓަޔަރމެންޓް ޕެންޝަން ސްކީމުގެ މެމްބަރުންގެ ގެދޮރު ގަތުމަށް ނަގާ ލޯނުގެ ސެކިއުރިޓީ ޑިޕޮސިޓްގެ ގޮތުގައި އެ ފަރާތްތަކުގެ ރިޓަޔަރމެންޓް ސޭވިންގްސް އެކައުންޓަށް ޖަމާ ކުރެވިފައިވާ ފައިސާ ރަހުނު ކުރުމުގެ ފުރުސަތު ވަނީ ޕެންޝަން އޮފީހުގެ ފަރާތުން ހުޅުވާލާފައެވެ.

އެގޮތުން، ރިޓަޔަރމެންޓް ސޭވިންގްސް އެކައުންޓަށް ޖަމާކުރެވިފައިވާ ފައިސާ ރަހުނު ކުރެވެނީ ވަކި ޝަރުތުތަކެއް ހަމަވާ މީހުންނަށެވެ.

އެ ޝަރުތުތަކުގެ ތެރޭގައި ހިމެނެނީ، މޯލްޑިވްސް ރިޓަޔަރމެންޓް ޕެންޝަން ސްކީމު (އެމްއާރުޕީއެސް)ގެ މެމްބަރެއް ކަމުގައިވުމާއި އުމުރުން 60 އަހަރުން ދަށުގެ މީހެއް ކަމުގައިވުން އަދި އުމުރުން 65 އަހަރު ވުމުގެ ކުރިން ލޯނު ދައްކާ ހަލާސް ކުރެވޭނެ މީހެއް ކަމުގައި ވުމުގެ އިތުރުން، ސްކީމުގައި ބަިއވެރިވާ ފައިނޭންޝިއަލް އިންސްޓިޓިއުޝަނަކުން ގެދޮރު ގަތުމަށް ލޯނުހަމަޖެހިފައިވާ މީހެއް ކަމުގައިވުމެވެ.

Advertisement

ގެދޮރު ގަތުމަށް ރިޓަޔަރމެންޓް ސޭވިންގްސް އެކައުންޓުން ރަހުނު ކުރެވޭނެ އަދަދު ކަނޑައަޅަނީ ރަހުނު ކުރުމަށް ހުށަހަޅާ މެމްބަރެއްގެ އުމުރަށް ބިނާކޮށެވެ.

އެކި އުމުރުފުރާތަކަށް ދޫކުރުމަށް ހަމަޖެހިފައިވާ އަދަދުތައް ތަފާތެވެ. އެގޮތުން، 16 އަހަރާ 35 އަހަރާ ދެމެދުގެ އުމުރުފުރާގެ މީހުންނަށް، އެކައުންޓްގަ ހުރި އަދަދުގެ 100 ޕަސެންޓް ރަހުނު ކުރެވޭއިރު، 36 އަހަރާ 49 އަހަރާ ދެމެދުގެ އުމުރުފުރާގެ މީހުންނަށް ފަންޑުގަ ހުރި އަދަދުގެ 80 ޕަސެންޓް ރަހުނު ކުރެވޭނެއެވެ. އަދި 50 އަހަރާ 60 އަހަރާ ދެމެދުގެ މީހުންނަށް ރަހުނު ކުރެވޭނީ ފަންޑުގައި ހުރި އަދަދުގެ 50 އިންސައްތައެވެ.

ގެދޮރު ގަތުމަށް ރިޓަޔަރމެންޓް ސޭވިންގްސް އެކައުންޓުން ރަހުނު ކުރެވެން ހުރި އަދަދު ސްކީމްގެ މެމްބަރުންގެ ރިޓަޔަރމެންޓް ސޭވިންގްސް އެކައުންޓު ސްޓޭޓުމަންޓުގައި ހިމަނާފައިވާނެ ކަމަށާއި އެ މައުލޫމާތު ޕެންޝަން މޯބައިލް އެޕްލިކޭޝަނުންނާއި ޕެންޝަން އޮފީހުގެ ވެބްސައިޓުންވެސް ބަލާލެވޭނެ ކަމަށް ޕެންޝަން އޮފީހުން ބުނެއެވެ.

މި ސްކީމުގެ ދަށުން ގެދޮރު ގަތުމަށް ލޯނު ހަމަޖައްސަންވާނީ އެ ހިދުމަތް ފޯރުކޮށްދިނުމަށް ޕެންޝަން އޮފީހާއެކު އެއްބަސްވުން ގާއިމު ކޮށްފައިވާ ތަންތަނުންނެވެ.

މިހާތަނަށް މި އެއްބަސްވުމުގައި ސޮއިކޮށްފައިވާ ފަރާތްތަކަކީ ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް އަދި ހައުސިންގް ޑިވިލޮޕްމެންޓް ފައިނޭންސް ކޯޕަރޭޝަންއާއި މޮރިޝިއަސް ކޮމާޝަލް ބޭންކުގެ އިތުރުން ކޮމާޝަލް ބޭންކް އޮފް މޯލްޑިވްސްއެވެ.

ސްކީމުގެ ދަށުން ގަނެވޭނީ ވަކި ކަންކަމެއް ފުރިހަމަވާ ތަންތަނެވެ. އޭގެ ތެރޭގައި ހިމެނެނީ، އާއްމު ދިރިއުޅުމަަށް ގަންނަ ގެދޮރާއި އިމާރާތް ކުރުމަށްފަހު އާއްމުކޮށް ހުޅުވާލެވިފައިވާ ބާޒާރެއްގައި ވިިއްކާ ތަންތަނުގެ އިތުރުން އިމާރާތް ކޮށް ނިމުމުން އިމާރާތް ގަތް ފަރާތާ ހަވާލު ކުރެވޭ ގޮތަށް ވިއްކާ ތަންތަނެވެ.

މި ސްކީމުގެ ދަށުން ގެދޮރު ގަތުމަށްޓަކާ ލޯނު ހޯދުމަށް ހައުސިންގް ފައިނޭންސް ހިދުމަތް ފޯރުކޮށްދޭ ފަރާތްތަކަށް ހުށަހަޅާއިރު، ލޯނުގެ ސެކިއުރިޓީ ޑިޕޮސިޓްގެ ގޮތުގައި ރިޓަޔަރމެންޓް ސޭވިންގްސް އެކައުންޓުގައި ހުރި ފައިސާ ރަހުނު ކުރުމަށް ހުށަހަޅަން ޖެހޭނެއެވެ.

މި މައުލޫމާތު ހިމަނާނީ ލޯނަށް އެދި ހުށަހަޅާ ފޯމުގައެވެ.

މި ސްކީމުގެ ދަށުން ނަގާ ލޯނުގެ ސެކިއުރިޓީ ޑިޕޮސިޓްގެ ގޮތުގަ ރިޓަޔަރމެންޓް ސޭވިންގްސް އެކައުންޓުގަ ހުރި ފައިސާ ރަހުނު ކުރުމަށް އެދޭ މެމްބަރުންގެ މައުލޫމާތު، އެ ހިދުމަތް ދޭ ފަރާތުން ޕެންޝަން އޮފީގާ ހިއްސާ ކުރަން ޖެހޭނެއެވެ.

އަދި ގެދޮރު ގަތުމަށް ޝަރުތު ހަމަވާ މެމްބަރުންގެ ރިޓަޔަރމެންޓް ސޭވިންގްސް އެކައުންޓުގައި ހުރި ފައިސާ، ހައުސިންގް ފައިނޭންސް ހިދުމަތް ދޭ ފަރާތާ ހަވާލު ކުރަން ޖެހޭނެއެވެ.

ލޯނު ދައްކާ ނިމެންދެން ރަހުނު ކުރެވޭ ފައިސާ ހުންނާނީ، އެ ފައިސާ ހަވާލު ކުރެވޭ ހައުސިންގް  ފައިނޭންސްގެ ހިދުމަތް ދޭ ފަރާތުގެ ބެލުމުގެ ދަށުގައެވެ. އަދި ކަނޑައެޅިފައިވާ އުސޫލުގެ ދަށުން، އެ ފައިސާ އިންވެސްޓްކޮށް، ރިޓަރންސް ލިބިގެންދާނެއެވެ.

ލޯނު ދައްކާ ނިމުމުން ރަހުނު ކުރެވުނު ފައިސާ އޭގެ ވެރިފަރާތުގެ ރިޓަޔަރމެންޓް ސޭވިންގްސް އެކައުންޓަށް ޖަމާ ކުރެވޭނެއެވެ. ނަމަވެސް ލޯނު ނަގާ ފަރާތުން ލޯނު ދެއްކުމަށް ނުކުޅެދިއްޖެނަމަ، އެ ފައިސާ ހޯދުމަށްޓަކާ ލޯނު ނަގައިގެން ގަތް އިމާރާތް ވިއްކާލެވޭނެއެވެ. އަދި އެ އިމާރާތެއް ވިއްކާލައިގެން ލޯނު ނެގި ފަރާތުން ދައްކަންޖެހޭ އަދަދު ހަމަ ނުވާނަމަ އެ އަދަދު ހަމަކުރުމަށް ބޭނުންވާ ފައިސާ ރަހުނު ކުރެވިފައިވާ ފައިސާއިން ދޫކުރެވޭނެ ކަމަށް ޕެންޝަން އޮފީހުން ބުނެއެވެ.