އަންނަ ހޮނިހިރު ދުވަހު ބާއްވާ އެމްޑީޕީގެ ރިޔާސީ ޕްރައިމަރީ އަށް ފަހު ގދ. ތިނަދުއަށް ވަޑައިގަންނަވާނީ އެރަށް ސިޓީއަކަށް ބަދަލުކުރުމުގެ ރަސްމީޔާތަށް ކަމަށް ރައީސް އިބުރާހިމް މުހައްމަދު ޞާލިހު މިއަދު ވިދާޅުވެއްޖެ އެވެ.

މި މަހު ބާއްވާ އެމްޑީޕީގެ ޕްރައިމަރީގެ ކެމްޕޭނަށް މިއަދު ހުވަދު އަތޮޅަށް ވަޑައިގެން ގދ. ތިނަދޫގައި ސަޕޯޓަރުންނާ އެކީ ބޭއްވި ބައްދަލުވުމުގައި ރައީސް ވިދާޅުވީ މި ސަރުކާރުގެ ތަރައްގީގެ ސިޔާސަތުގައި ތިނަދޫއަކީ މުހިންމު ރަށެއް ކަމަށެވެ.

ރައީސް ވިދާޅުވީ، ތިނަދޫގެ ތަރައްގީގެ މަޝްރޫއުތަކުގެ ލިސްޓު ދިގުކަމަށާއި ސަރުކާރުން ތިނަދޫގައި މަގު ހެދުމާއި، ފެން ހިންދާ ނިޒާމު އަދި އިންޖީނުގެ މަސައްކަތް ކުރަމުންގެންދާކަމަށެވެ. 

Advertisement

އަދި މީގެ އިތުރުން، ތިނަދޫގައި ސިޓީއަކަށް ބޭނުންވާ ހުރިހާ ވަސީލަތެއް ފުރިހަމަ ކަން ފާހަގަ ކުރައްވައި ރައީސް ޞާލިހް ވިދާޅުވީ، އެރަށް ސިޓީ އަކަށް ހެދުމަށް އިތުރަށް ކުރަން ޖެހޭ މަސައްކަތްތަކަކީ ބައިނަލްއަގުވާމީ ކޮމާޝަލް ޕޯޓަކާއި ރަށާއި ކައިރީގައި ފެންވަރު ރަނގަޅު އެއާޕޯޓެއް އަދި ހޮސްޕިޓަލްގެ މަސައްކަތެއް ކަމަށެވެ. 

މިއާއެކު، ރައީސް ވަނީ ތިނަދޫގައި ބައިނަލްއަގުވާމީ ކޮމާޝަލް ޕޯޓެއް އަޅުއްވާނެ ކަމަށާ، އެ މަޝްރޫއު ގެ ފުރަތަމަ ފިޔަވަހީގެ މަސައްކަތް މިހާރު ކުރިއަށްދާ ކަމަށް ވިދާޅުވެފައެވެ.

އަދި މީގެ އިތުރުން ތިނަދޫ ކައިރީގައި ބައިނަލްއަގުވާމީ އެއާޕޯޓެއް އަޅުއްވާނެ ކަމަށާ، އެރަށު ހޮސްޕިޓަލު ތަރައްގީ ކޮށް، މުޅިން އަލަށް ޓާޝަރީ ހޮސްޕިޓަލެއް އަޅައި، ތިނަދޫގެ ދަރިންނަށް ރަށުގައި ތިބެގެން ރަނގަޅު ފެންވަރުގެ ތައުލީމު ހާސިލްކުރެވޭނެ އިންތިޒާމުތައް ގާއިމުކުރުމުގެ މަސައްކަތް ވެސް ސަރުކާރުން މިހާރު ކުރަމުންދާ ކަމަށް ވިދާޅުވި އެވެ.

ހަމައެހެންމެ، ރައްޔިތުންގެ ޖުމްލަ ކަންބޮޑުވުންތަކަކީ ކޮބައިތޯ އާއި، އާބާދީ އާއި ގުޅޭގޮތުން މައުލޫމާތު ސާފު ކުރުމަށް ކައުންސިލާއި އެކު މަޝްވަރާތައް ކުރިޔަށްގެންދަވާނެކަމަށް ރައީސް ވިދާޅުވި އެވެ. 

"އިރާދަކުރެއްވިއްޔާ މި އިންތިހާބަށްފަހު ލަސްތަކެއް ނުވެ، މި ރަށް ސިޓީއަކަށް ބަދަލުވުމުގެ ރަސްމިއްޔާތުގައި ބައިވެރިވާން އަޅުގަނޑު އަންނާނަން،" ރައީސް ސޯލިހު ވިދާޅުވި އެވެ.

ތިނަދު އަށް ސިޓީއެއްގެ ދަރަޖަ ހޯދަން އެ ރަށު ކައުންސިލުން ވެސް ތަކުރާރުކޮށް ސަރުކާރުގައި އެދިފައިވެ އެވެ. އަދި ތިނަދު އަކީ ހުވަދު އަތޮޅުގެ މައި ރަށުގައި ގޮތުގައި ފާހަގަކޮށްލެވޭ ރަށެވެ. އެގޮތުން އެ ރަށަކީ އެކި ބޭނުންތަކުގައި ގދ. އާއި ގއ. އަތޮޅުގެ ރަށްތަކުގެ މީހުން ވަރަށް ގިނައިން ދަތުރުކުރާ ރަށެކެވެ.

ލާމަރުކަޒީ ގާނޫނު ބުނާ ގޮތުން ސިޓީއެއްގެ ދަރަޖަ ލިބެނީ ރަށެއްގެ ރަޖިސްޓްރީގައި ވާ އެ ރަށުގެ އާބާދީ މަދުވެގެން 10،000 އިން މައްޗަށް އެރުމުންނެވެ.

މިދިޔަ އަހަރު ކައުންސިލުން، އެލްޖީއޭއަށް ލިޔެކިއުންތައް ފޮނުވުމުން އެލްޖީއޭގެ ސީއީއޯ އަފްޝަން ލަތީފް ވަނީ ރަށުގެ ރަޖިސްޓްރޭޝަން އާބާދީ މަދު ނަމަވެސް ރަށުން ހިދުމަތް ހޯދާ މީހުންގެ އާބާދީ 12،000 އަށް އަރާކަމަށް ކައުންސިލާއި ހަވާލާ ދީ ވިދާޅުވެފަ އެވެ.

ތިނަދޫގެ ރަޖިސްޓަރއާބާދީ 10،000 އިން ދަށް ނަމަވެސް ސިޓީއެއްގައި ހަމަވާންޖެހޭ އެހެން ޝަރުތުތައް ހަމަވާކަމަށް ކައުންސިލުން ބުނެ އެވެ.