ސަލްމާން މިސްކިތުގެ އޭސީ ޔުނިޓްތައް ހަލާކު ވުމާއި ގުޅިގެން ބޭރުން ގެނައުމަށް ހަމަ ޖެހިފައިވާ ޓެކްނިކަލް ޓީމް މާލެ އައިސްފައިވާކަމަށް އިސްލާމިކް މިނިސްޓްރީން ވިދާޅުވެއްޖެއެވެ.

މިކަން ހާމަކޮށްފައިވަނީ މިއަދު އެ މިނިސްޓްރީގެ މީޑީއާ އޮފިޝަލް ވޮއިސް އަށް ދެއްވި ބަސްދީގަތުމެއްގައެވެ.

ސައޫދީ ރަސްގެފާނު ސަލްމާން ބިން ޢަބްދުލްޢަޒީޒުގެ ހިލޭ އެހީގައި ރައީސް ޔާމީންގެ ސަރުކާރުން މާލޭގައި ޢިމާރާތްކޮށްފައިވާ ކިންގް ސަލްމާން މިސްކިތުގައި ނަމާދުކުރަން ފަށާފައިވަނީ މިދިޔަ އަހަރުގެ އޭޕްރީލް މަހުގެ ތެރޭގައިއެވެ. ނަމަވެސް މިސްކިތް ހުޅުވިތާ ދެމަހެއްހާ ދުވަސް ފަހުން، އޭސީތަކުން ފިނިނުވާ މައްސަލަ ފެންމަތިވިއެވެ. އޭގެ ސަބަބުން އެ މިސްކިތަށް ނަމާދު ކުރަންދާ ގިނަ އަދަދެއްގެ މީހުން އަންނަނީ ޝަކުވާކޮށް ނުރުހުން ފާޅުކުރަމުންނެވެ.

Advertisement

ސަލްމާން މިސްކިތުގައި އޭސީ ހަރުކޮށްފައި ވަނީ ބޭރުގެ ކޮންޓްރެކްޓަރުން ކަމަށް ވުމާއެކު، ރާއްޖޭން އޭސީތައް މަރާމާތު ކުރުމުގެ މަސައްކަތް ވަނީ ނާކާމިޔާބުވެފައިކަމަށް މިނިސްޓްރީން ހާމަކުރައްވައެވެ.

އެކަމާ ގުޅިގެން އިސްލާމިކް މިނިސްޓްރީން ބުނީ، އޭސީ ހެދުމަށް ބޭނުންވާ ސާމާނާއެކު، އޭސީ މަރާމާތު ކުރާ ޓެކްނިކަލް ޓީމު، މި މިހާރު މާލެ އައިސްފާއިވާކަމަށެވެ.

މިހާރު ޓެކްނިކަލް ޓީމް މާލެ އައިސްފައިވީ ނަމަވެސް މަރާމާތު ކުރުމަށް ބޭނުންވާ ސާމާނު ލިބޭނީ ކުރިއަށް އޮތް އާދިއްތަ ދުވަހު ކަމަށް އިސްލާމިކް މިނިސްޓްރީ އިން ވަނީ މައުލޫމާތު ދެއްވާފައެވެ.

މީގެ އިތުރުން، މި ކަން ހައްލު ކުރުމަށް ބޭނުންވާ ސާމާނު ލިބުމުގެ ކުރިން ކުރެވެން ހުރި މަސައްކަތްތައް ދަނީ ކުރަމުން ކަމަށާއި މަރާމާތު ކުރުމަށް ނަގާނެ މުއްދަތެއް އެނގޭނީ ބޭނުންވާ ސާމާނު އައުމުން ކަމަށް ވެސް މިނިސްޓްރީިއިން ވަނީ ވިދާޅުވެފައެވެ.

ވޭތުވެދިޔަ ޑިސެމްބަރު މަހު މި މައްސަލަ ހައްލު ކުރާނެ ކަމަށް މިނިސްޓްރީ އިން ބުނި ނަމަވެސް މަރާމާތު ކުރުމުގެ މަސައްކަތް ވަނީ މިއަދާ ހަމައަށް ދިގު ދެމިގެން ގޮސްފައެވެ.