ސްޓެލްކޯ އެމްޑީ ނޫސްތަކަށް އިންޓަވިއު ދެއްވީ މާލެ ސިޓީ ކައުންސިލަށް ދިން ޖަވާބު ނޫން ކަމަށާއި، އެ ފަރާތަށް ދެއްވި ޖަވާބު މުޅިން ތަފާތު ކަމަށް މާލޭ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
އިއްޔެ ހަބަރުތަކުގައި އޮތް ވާހަކައަކީ، މާލެ ސިޓީ ކައުންސިލުން ކަރަންޓު ބިލް ނުދައްކައިގެން ލޮނުޒިޔާރަތް ޕާކުން ކަރަންޓު ކަނޑާލި ވާހަކައެވެ.
އެކަމަށް އިޝާރާތް ކުރައްވާ، މިއަދު ކުރިއަށްދިޔަ މާލެ ސިޓީ ކައުންސިލްގެ ހަތަރު ވަނަ ދައުރުގެ 86 އަހަރީ އާއްމު ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، މާލޭގެ ބައެއް ތަންތަކުން ކަރަންޓު ކަނޑާލުމަކީ ވަރަށް ސީރިއަސް މައްސަލައެއް ކަމަށެވެ.
މީގެ ދެތިން ދުވަސް ކުރިން ކަރަންޓު ކަނޑަން ފެށިކަން ފާހަގަ ކުރައްވަމުން މުއިއްޒު ވިދާޅުވީ ކަރަންޓު ކަނޑާފައި ވަނީ މާލެ ސިޓީގެ ބައެއް އޮފީސްތަކުން ކަމަށެވެ.
"މިސާލަކަށް ވިލިމާލެ ސެކްޝަން އޮފީހުން ކަރަންޓު ކަނޑާލި. ވިލިމާލޭގަ ހުރިހާ ހިދުމަތެއް ދޭ އޮފީހަކީ ސެކްޝަން އޮފީސް. ހުޅުމާލޭ ސެކްޝަން އޮފީހުން ކަރަންޓު ކަނޑާލި. ހުޅުމާލޭގަ އަޅުގަނޑުމެން ދޭ ހިދުމަތެއް ވިއްޔަ މި ދެނީ ހުޅުމާލޭ އޮފީހުން. ލޮނުޒިޔާރަތް ޕާކު، ސަލްޓަން ޕާކު، މިހެންގޮސް އެކި ތަންތަނުން. އަދި އާއްމު ހިދުމަތްތަކާ ބެހޭ ބައިގަ ބޭރު މުވައްޒަފުން ކައްކަން ބޭނުންކުރާ ބަދިގެ ހުރި ސަރަހައްދު(ވެސް ހިމެނޭ)،" މުއިއްޒު ވިދާޅުވިއެވެ.
މުއިއްޒު ވިދާޅުވީ ގަޑިއެއްހާއިރުތެރޭ މާލެ ސިޓީ ކައުންސިލްގެ އެކި އިމާރާތްތަކުން ކަރަންޓު ކަނޑާލި ކަމަށެވެ. އޭރު މި ވާނުވާއެއް ވެސް ނޭނގޭ ކަމަށާއި، ކަރަންޓު ކަނޑާލި ބިލްތައް ނުދައްކައިގެން ކަމަށް ފުރަތަމަ ހީކުރެވުނު ކަމަށް މުއިއްޒު ވިދާޅުވިއެވެ.
"ދެން އެކަމަކު އެހެންނެއް ނޫން މި ވީކީއެއް. އަޅުގަނޑަށް ގުޅުއްވި. ފުރަތަމަ ގުޅައިގެން ބިޒީކޮށްލަނީ. ފަހުން، ދޮޅު ގަޑިއިރެއްހާއިރު ފަހުން ގުޅުއްވި އެމްޑީ ޝަރީފް. ގުޅުއްވާފަ ވިދާޅުވީ ކައުންސިލް އޮފީހަށް ތިމަންނަމެން ގުޅީމަ ތިތަނުގެ އާދައިގެ މުވައްޒަފުން ފޯނު ނަގާފަ އެބަ ބުނެޔޭ ތިމަންނަމެން އެދިފަ ހުރި ބައެއް ކަންކަން ހިފަހައްޓަން ކައުންސިލުން އޮތީ ބުނެފައޭ. އެބޭފުޅުން އެދޭނީ ޑެއިލީ ވޯކްސް، ގޭގެއަށް ކަރަންޓު ލުމަށް ކޭބަލް އެޅުން، މިކަހަލަ ކަންކަމަށް. އަޅުގަނޑުމެން ހިފަހައްޓާނެ ކަންކަމެއް ނޫން އެއިކީއެއް. އަބަދުވެސް މަގު ކޮންނަން ހުއްދަދެން، ގޭގެއަށް ކަރަންޓު ލައިދޭން. ތިމަންނަމެން ގުޅީމަ ތިތާގެ މުވައްޒަފުން އެބަ ބުނެޔޭ، ކައުންސިލުން އޮތީ މިހާރު ސްޓެލްކޯއިން މިކަންތައް ހިފަހައްޓަން ބުނެފައޭ. އެހެންވެގެން ތިމަންނަމެންނަށްވެސް ލިބިފަ އޮތް ބާރެއްގެ ދަށުން ކަރަންޓު ކެނޑީއޭ،" މުއިއްޒު ވިދާޅުވިއެވެ.
މީގެ އިތުރުން މުއިއްޒު ވިދާޅުވީ، ސްޓެލްކޯއަކީ އަމިއްލަ މީހެއްގެ ކުންފުންޏެއް ނަމަ ކަރަންޓު ކަނޑަންވީ ކަމަށާއި ނަމަވެސް އާއްމު ހިދުމަތްތަކުން ކަރަންޓު ކެނޑުމަކީ ކުރެވޭނެ ކަމެއް ނޫން ކަމަށެވެ.
Advertisement
This content is created and paid for by advertisers and does not involve Voice Journalists
