ކުޑަކުދިން ބައިވެރިކުރުން މަނާ މަސައްކަތްތަކުގެ ލިސްޓަށް ބަދަލު ގެނެސްފިއެވެ.

ގެޒެޓްގައި އިއްޔެ ޝާއިއު ކުރި އިއުލާނުގައި ވަނީ ކުޑަކުދިންގެ ހައްޤުތައް ރައްކާތެރި ކުރުމުގެ އާންމު ޤަވައިދުގެ 10 ވަނަ މާއްދާއަށް އިސްލާހު ގެނެސްފައެވެ. އެގޮތުން ގެނެވުނު އިސްލާހާއި އެކު ކުޑަ ކުދިން ބައިވެރި ކުުރުން މަނާ މަސައްކަތުގެ ތެރޭގައި ހިމެނެނީ 7 މަސައްކަތެވެ. ކުރީގައި މި ޤަވައިދުގެ ދަށުގައި ވަނީ 17 މަސައްކަތެވެ.

އެގޮތުން މިހާރު މި ލިސްޓްގައި ހިމެނެނީ ނުރައްކައުތެރި ކެމިކަލްތަކާއި ގޮވާތަކެތި އުފުލުމާއި، އެ ތަކެތި ރައްކައުކުރުމާއި، ހިފައި ގެންގުޅުމާއި، އެއް ތަނުން އަނެއް ތަނަށް ގެންދިއުމުގެ މަސައްކަތްތަކާއި، ތެލާއި ޕެޓްރޯލު ފޯރުވުމުގެ ޢަމަލީ މަސައްކަތްތަކެވެ.

އަދި ސިނގިރޭޓާއި، ދުންފަތުގެ އެހެނިހެން ބާވަތްތަކާއި، ވޭޕިން ފަދަ އެއްވެސް ބާވަތެއް ވިއްކުމުގެ ޢަމަލީ މަސައްކަތްތައް ވެސް މި ލިސްޓުގައި ހިމެނެއެވެ.

މީގެ އިތުރުން ދިވެހިރާއްޖޭގައި ހިންގާ ބަނދަރެއްގައި ކުރާ މަސައްކަތުގެ ތެރެއިން ބަނދަރުގައި ކުރާ ހެވީ މެޝިނަރީ އޮޕަރޭޝަންސް ފަދަ ބާވަތްތަކުގެ މަސައްކަތްތައް އަދި ސަފާރީތަކާއި ޔޮޓުތަކުގައި ކުރާ ހުރިހާ ބާވަތެއްގެ މަސައްކަތްތަކެއް ހިމެއެނެއެވެ.

އަދި ހަމަ އެއާއިއެކު ކޮންސްޓްރަކްޝަންގެ މަސައްކަތްތަކުގެ ތެރެއިން ރޭނުމާއި ސިމެންތިޖެހުން ފިޔަވައި އެހެން މަސައްކަތްތައް ވެސް ހިމެނެއެވެ.

ހަމަ އެހެންމެ ދިވެހިރާއްޖޭގެ އެއްވެސް ޤާނޫނެއްގައި ނުވަތަ ގަވާއިދެއްގައި މަނާކޮށްފައިވާ މަސައްކަތެއް، ނުވަތަ އިސްލާމްދީން މަނާކުރާ މަސައްކަތެއްގައި ބައިވެރި ކުރުން ވެސް ވަނީ މި ލިސްޓްގައި ހިމަނާފައެވެ.

މި ބާވަތުގެ މަސައްކަތްތައް ތަމްރީނު ދިނުމުގެ ބޭނުމުގައި ވިޔަސް، ނުވަތަ ޢާއިލާއިން ކުރާ މަސައްކަތެއްގައި ކުދިން ބައިވެރިކުރުމުގެ ބޭނުމުގައި ވިޔަސް ކުރުވުމަކީ މަނާކަމެއްކަމާއި މި ބާވަތްތަކުގެ މަސައްކަތްތަކުގައި އުމުރުން 16 އަހަރު ފުރިފައިވާ ކުދިން ލައްވާ ކުރުވަންވާނީ ނުވަތަ އެއިން މަސައްކަތެއްގައި ބައިވެރިކުރެވޭނީ، އެ ކުދިންގެ މަސައްކަތް ސުޕަވައިޒް ކުރާނެ ފަރާތެއްގެ ބެލުމުގެ ދަށުން ކަމަށް ވެސް ވަނީ ފާހަގަ ކޮށްފައެވެ.