ދީނީ އިލްމުވެރިން ސިޔާސީ މަޝްރަހުގައި ތިބުމަކީ މުހިންމު ކަމެއް ކަމަށާ އެހެން ނަމަވެސް ބައެއް ދީނީ މީހުން އުޅެނީ ދީނީ ސިޔާސީ ޝަޚަސިއްޔަތުން އުޅޭ ގޮތަށް ނޫން ކަމަށް ކުރީގެ އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އަދާލަތު ޕާޓީގެ ރައީސް އަދި ހޯމް މިނިސްޓަރު ޢިމްރާން އާއި، އެޕާޓީގައި ބައެއް އިސްވެރިންގެ ފޮޓޯ އަކާއި އެކު އޮންލައިން ނޫހަކުން ލިޔެފައިވާ ޚަބަރެއް ހިއްސާ ކުރައްވައި ޝަހީމް މިއަދު ކުރެއްވި ޓްވީޓެއްގައި އޭނާ ވަނީ، ދީނީ އިލްމުވެރިން ސިޔާސީ މަޝްރަހުގައި ތިބުމަކީ މުހިންމު ކަމެއް ކަމަށް ވިދާޅުވެފައެވެ.
އެހެން ނަމަވެސް ބައެއް ދީނީ މީހުން އުޅެނީ ދީނީ ސިޔާސީ ޝަޚަސިއްޔަތުން އުޅޭ ގޮތަކަށްނޫންކަމަށްވެސް އޭނާ ވިދާޅުވި އެވެ.
އެގޮތުން ރާއްޖޭގައި 30 އަހަރު ވެރިކަން ކުރެއްވި ރައީސް މައުމޫނަކީ ދީނީ އިލްމުވެރިއެއް ކަމަށް ފާހަގަ ކޮށްފައިވެއެވެ. އަދި އެމަނިކުފާނުގެ ބައެއް ކަންކަމާއިމެދު ހިޔާލު ތަފާތު ވިޔަސް ރާއްޖޭގެ ވެރިކަމާއި އެމަނިކުފާނު ހަވާލުވި އިރު ރާއްޖެ އޮތް ގޮތާއި، އެމަނިކުފާނުގެ ޒައާމަތުގައި ރާއްޖެ ވާސިލް ކޮށްދެއްވި ހިސާބު ވަރަށް ސާފުކަމަށް ޝަހީމް ވަނީ ވިދާޅުވެފައެވެ. އަދި ރައީސް މައުމޫންގެ އަރިހުގައި އޭރު ތިއްބެވީ އަޒްހަރިގެ ގްރެޖުއެޓްސް އަދި ސައުދި ގްރެޖުއެޓްސް ކަންވެސް އޭނާ ފާހަގަކުރެއްވިއެވެ.
"މިއަދު ޖެހިގެން އުޅޭ މައްސަލައަކީ ދީނީ އިލްމުވެރިން ސިޔާސީ ވުމެއްނޫން. ބެނުންވާ ހާލަތަކާ ގުޅިގެން އެކްޓިވިސްޓް ސްޓައިލްއަށް ދީން ބެނުން ކުރާ މަދު ބަޔަކު ފާޅުވީ. މީހުންނަށް އެއްޗެހި ގޮވުން ފިޔަވާ އެހެން ކަމެއް ނުކުރޭ". ޝަހީމް ވިދާޅުވިއެވެ.
މިއާއިއެކު ގައުމު ހިންގުމަށް އިސްލާމް ދީނުގައިވާ ހަރުދަނާ ސިޔާސީ، އިޖްތިމާއީ، އިޤަތިޞާދީ، ތައުލީމީ، ބޯހިޔާވަހިކަން ފަދަ ސިޔާސަތުގެ ވާހަކަ ނުދައްކާ، މުޅިން ދައްކަނީ މީހުން ގޯސް ވާހަކާ ކަމަށާ، އެ ބޭފުޅުންގެ އެއްވެސް ތަސައްވުރެއްނެތް ކަމަށް ޝަހީމް ވަނީ ވިދާޅުވެފައެވެ.
މީގެ އިތުރުން އަދާލަތު ޕާޓީ (އޭޕީ) އުފެދިގެން ގައުމީ ރަނގަޅު ކިތަންމެ ޚިދުމަތްތަކެއް އުފައްދަން މަސައްކަތް ކުރި ކަމަށް ޝަހީމް ވަނީ ފާހަގަ ކުރައްވާފައެވެ.
އެގޮތުން ޝަހީމް ވިދާޅޫވެފައިވަނީ އިސްލާމީ ފިޤްހު އެކަޑަމީ، އިސްލާމިކް ބޭންކް، ހައްޖު ކޯޕަރޭޝަން، އައުގަފް ކޮލެޖް، ޔުނިވާސިޓީ، މިފަދަ ކިތަންމެ ކަމެއް ޤާއިމް ކުރުމުގައި އޭޕީގެ މެންބަރުން ދައުރު އަދާ ކުރިކަމަށެވެ.
ނަމަވެސް ފަހުން އޭޕީ ހިސާރު ކުރީ އެކްޓިވިސްޓް ބައެއްގެ ނުފޫޒުކަމަށާ އޭގެ ނަތީޖާ އަކަށްވީ ބިނާކުރުނަވިނި ވިސްނުން ދޫކޮށް ވެރިންނަށް ސަނާކިޔާ ސްޓައިލްގެ ދީނީ ވިސްނުން އުފެދުންކަމަށް ޝަހީމް ވިދާޅުވި އެވެ.
އަދި މިކަމާއި ގުޅިގެން ދެންނިކުތް ނަތީޖާއަކީ 5 އަހަރުވީ އިރުވެސް ހަރުދަނާ ކަމެއްނުވުން ކަމަށާއި އެންމެ ކުޑަމިނުން ފަތުވާ ކައިންސިލް ވެސް މަރާލުން ކަމަށެވެ.
މިއާއެކު ޝަހީމް ވަނީ ރާއްޖެއަށް ޓަކައި އޭޕީ ސާފުކޮށް އޭޕީ ގާއިމް ކުރެވުނު އަސްލު ތަސައްވަރަށް މިސްރާބު ހިފުމަށް އިމްރާން ގެ އަރިހުން އެދިފައެވެ.
"އޭޕީ އުފެދިގެން ގިނަ ޒަމާން ތަކެއް ވަންދެން ރާއްޖޭގެ އެންމެ މުހިންމު ދެ ވުޒާރާ ހައުސިންގް އަދި އިސްލާމިކް މނިސްޓްރީ ހިންގީ ދީނީ ވިސްނުމުގެ މީހުން. ބައްލަވާ އޭރު އައިސްފައި ހުރި ކަންކަން. ކޮށްފައި ހުރި ކަންކަން. ހިންގާފައި ހުރި މަޝްރޫއުތައް. އެހެންވީމާ ދީނީ އިލްމުވެރިންނޭ ކިޔާފަ ޓްވިޓަގައި ދޮބޯ ގެރި ދެތިންމޭހުންގެ ސަބަބުން މުޅި އިސްލާމީ މަސްރޫއުގެ އަގު ވެއްޓޭކަށް ނުޖެހޭ. ހަރުދަނާ ދީނީ އިލްމުވެރިން މަސްރަހުގައި ސާބިތުވެ ތިއްބެވުމަށް އިލްތިމާސް ކުރަން" ޝަހީމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
