ކ. ބޮޑުގިިރިއަށް އެރި ބާޖެއް 31 މިލިއަން ރުފިޔާއިން ޖޫރިމަނާ ކޮށްފިއެވެ. 

އެންވަޔަރަންމަންޓަލް ޕްރޮޓެކްޝަން އޭޖެންސީއިން ނެރުނު ނޫސްބަޔާނެއްގައި ބުނީ، މިދިޔަ އަހަރުގެ އޮކްޓޯބަރު ތިން ވަނަ ދުވަހު 'އަމް އާގަމް' ނަމަކަށް ކިޔާ ބާޖެއް ބޮޑުގިރިއަށް އެރުމާއި ގުޅިގެން ތިމާވެއްޓަށް ލިބުނު ގެއްލުންތަކަށް، އެ އުޅަނދުގެ ވެރިފަރާތް ކަމުގައިވާ ދި މިޑްލްއީސްޓް މެރިން އެލް.އެލް.ސީ ޖޫރިމަނާ ކޮއްފައިވާކަމަށެެވެ.

މި ބާޖު ފަރަށް އެރުމާއި ގުޅިގެން އެ ފަރުގެ މާހައުލަށް ލިބުނު ގެއްލުންތަކަށް، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހެދިފައިވާ، ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ޤަވާޢިދުގެ ދަށުން ޖޫރިމަނާ ކޮށްފައި ވަނީ 31 މިލިއަން ހަތަރުލައްކަ ތިރީސް ފަސްހާސް ހަތަރުސަތޭކަ ދިވެހިރުފިޔާއިންނެވެ.

އަދި 30 ދުވަހުގެ ތެރޭގައި މި ޖޫރިމަނާގެ ފައިސާ ދެއްކުމަށް އެ ފަރާތަށް ވަނީ މިދިޔަ އަންގާރަ ދުވަހު އަންގާފައެވެ.

"މި ބާޖު ފުންކޮށް ނިމުމުން އެ ސަރަޙައްދުގެ ތިމާވެށްޓަށް ލިބުނު ގެއްލުންތައް ބެލުމަށް މި އެޖެންސީއިން ވަނީ އެ އުޅަނދުގެ ވެރިފަރާތުގެ ސަރވެޔަރުންނާއެކު 20 ނޮވެންބަރު 2022 ގައި އެ ސަރަޙައްދަށް ގޮސް ޖޮއިންޓް-ސަރވޭއެއް ކޮށްފައެވެ. މިގޮތުން، ބެލިބެލުމުން އެ ފަރުގެ 1248 އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބިފައިވާކަން ވަނީ ފާހަގަކުރެވިފައެވެ." އެ އޭޖެންސީގެ ނޫސްބަޔާނުގައި ވެއެވެ.

މިއީ މި ބާޖު ފަރަށް އަރައިގެން ތިމާވެއްޓަށް ލިބުނު ގެއްލުންތަކަށް ޖޫރިމަނާ ކުރެވޭ ތިންވަނަ މައްސަލަ ކަމަށްވެސް އީޕީއޭއިން ބުންޏެވެ.