އިންތިޚާބުން ބަލިވުމުން ބަލި ގަބޫލު ނުކޮށް ބަހަނާ ދެއްކުމަކީ ޑިކްޓޭޓަރުންގެ ސިފަ ކަމަށް މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ ޝަރީފް) ވިދާޅުވެއްޖެއެވެ. 

މިމަހުގެ 28 ވަނަ ދުވަހު ބޭއްވިގެންދިޔަ އެމްޑީޕީގެ ވާދަވެރި ރިޔާސީ ޕްރައިމަރީ ނިމި، ނަތީޖާ އިއުލާން ކުރިތާ 1 ދުވަސް ފާއިތުވެގެން ދިޔައިރު، އިންތިޚާބު ގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި ވާދަ ކުރެއްވި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގެ ފަރާތުން އިންތިޚާބާއި ގުޅިގެން ވެސް އެނޫންވެސް ގޮތުން އެއްވެސް ޚަބަރެއް ނުވެއެވެ. އެމަނިކުފާނު ނަތީޖާ ގަބޫލު ކުރެއްވި ކަމެއްވެސް ނުކުރައްވާ ކަމެއްވެސް، އަދި ހާމައެއް ނުކުރައްވައެވެ. 

އެހެން ނަމަވެސް، އެމަނިކުފާނުގެ ކެންޕެއިން ޓީމުގައި ތިއްބެވި ބައެއް މެމްބަރުން އަންނަނީ އިންތިޚާބު އިންސާފުވެރި ނޫން ކަމަށް ވިދާޅުވެ، ގިނަ ވާހަކަތައް ދައްކަވަމުންނެވެ. 

Advertisement

އެކަމާއި ގުޅިގެން ޝަރީފް ކުރެއްވި ޓުވީޓެއްގައި އޭނާ ވިދާޅުވީ، އިންތިޚާބު ގެ ނަތީޖާ ގަބޫލު ކުރުމަކީ ޑިމޮކްރަސީގެ ހަމަތައް ގަބޫލުކުރާ ލީޑަރުންގެ ސިފައެއް ކަމަށެވެ. އެގޮތުން، އެމެރިކާގެ ކުރީގެ ނާއިބު ރައީސާއި، ހިލަރީ ކްލިންޓަން ވެސް އިންތިޚާބުން ބަލިވުމުން އެކަން ގަބޫލު ކުރެއްވިކަމަށެވެ. 

"އަބަދުވެސް ތިމާގެ އަމިއްލަ މަސްލަހަތަށްވުރެ ގައުމުގެ މަސްލަހަތަށް އިސްކަންދޭންވާނެ." ޝަރީފް ވިދާޅުވި އެވެ. 

މިއާއެކު ޝަރީފު ކުރެއްވި އެހެން ޓުވީޓެއްގައި އޭނާ ވަނީ އިންތިޚާބުން ބަލިވުމުން ބަލި ގަބޫލު ނުކޮށް ބަހަނާ ދެއްކުމަކީ ޑިކްޓޭޓަރުންގެ ސިފަ ކަމަށް ވިދާޅުވެފައެވެ.