މާލެ ސިޓީ ކައުންސިލުން އެދުނު ކަމުގައި ވިޔަސް، ސްޓެލްކޯގެ މައި އިންޖީނުގެއާއި އިން ވެގެންހުރި މަގުތަށް ހުޅުވޭކަށް ނެތް ކަމަށް އެ ކުންފުނީގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.
މާލެ ސިޓީގެ ބޮޑު ތަކުރުފާނު މަގާއި އަމީނީ މަގުގެ ޓްރެފިކް ފްލޯއަށް މުހިންމު ތިން މަގެއް ސްޓެލްކޯއިން ބަންދު ކޮށްފައިވާ ކަމަށާ، އެ މަގުތައް ހުޅުވުމަށް ތަކުރާރުކޮށް ސިޓީ ކައުންސިލުން އެންގުމުންވެސް ހުޅުވާފައި ނުވާ ކަމަށް މާލެ ސިޓީ ކައުންސިލްގެ މޭޔަރު ޑރ މުހައްމަދު މުއިއްޒު ވަނީ މިއަދު ވިދާޅުވެފައެވެ.
މި ކަމާއި ގުޅިގެން، މިއަދު ބޭއްވި ނޫސްވެރިންގެ ބައްދަލުވުމުގައި "ވޮއިސް" އިން ކުރި ސުވާލަށް ޖަވާބު ދެއްވަމުން ޝަރީފް ވިދާޅުވީ، އެ މަގުތައް ހުޅުވާލުމަަށް އެދި ސިޓީ ކައުންސިލް ސްޓެލްކޯއާއި އެކުގައި މަޝްވަރާތައް ކޮށްފައިވާ ކަމަށެވެ. އަދި އެ މަގުތައް ހުޅުވާލެވެން ނެތް ކަމަށްވެސް ސްޓެލްކޯއިން ހާމަކޮށްފައި ވާނެ ކަމަށާ، އެ މަގުތައް ހުޅުވައިގެންވެސް މާލޭގެ މަގުތަކުގެ ޓްރެފިކް ފްލޯއަށް ލުއެއް ނުވާނެ ކަމަށެވެ.
އެ ތިން މަގުވެސް އައިސްފައި އިންނަނީ ސްޓެލްކޯ ތެރޭގައި، މެއިން އިމާރާތް ތެރޭގައި އަޅުގަނޑުމެންގެ މެއިން ޕަވާ ހައުސް ތަކާއި އިން ވެގެން އިންނަނީ. ދެން އަޅުގަނޑުމެން ބަލާލާއިރުގައި، މާލޭގެ އެ މަގުތައް ހުޅުވައިގެންނޭ ކިޔާފައި މާލޭ ގެ ޓްރެފިކަށް އެއްވެސް ބަދަލެއް ނާންނާނެ. މިސަރަހައްދު ތެރޭގައި އިތުރު ގެއެއް ހުރީކީ ނޫން، ނުވަތަ އިތުރު ތަނެއް ހުރީކީ ނޫން.
އަހުމަދު ޝަރީފް
މިއާއެކު ޝަރީފް ވިދާޅުވީ، އެ ތިން މަގަކީ މާލޭގައި ދިރިއުޅެމުންދާ ރައްޔިތުންގެ ސަލާމަތާއި ރައްކާތެރިކަމާއި ވަރަށް ބޮޑަށް ގުޅިފައިވާ ތިން މަގު ކަމަށެވެ. އެހެންކަމުން، ސްޓެލްކޯގެ ހުއްދަ އާއި ނުލައި އެ ތިން މަގުން (ސްޓެލްކޯގެ މައި އިންޖީނުގެ ކައިރިން) އެއްވެސް އުޅަނދެއް ދުއްވުމުގެ ހުއްދަ އެއްވެސް ފަރާތަކަށް ދެވެން ނެތް ކަމަށްވެސް އޭނާ ވިދާޅުވި އެވެ.
ޝަރީފު އިތުރަށް ވިދާޅުވީ، އެ ތިން މަގަކީ ސްޓެލްކޯގެ އިހްތިސާސް ތެރޭގައި ހިމެނޭ މަގުތަކަކަށް ހެދުމަށްޓަކައި ސަރުކާއިއެކު މަޝްވަރާ ކުރައްވަމުން ގެންދަވާ ކަމަށެވެ.
Advertisement
This content is created and paid for by advertisers and does not involve Voice Journalists
