މޯލްޑިވްސް އިމިގްރޭޝަންގެ ޑޭޓާބޭސްތަކަށް ކަނޑައެޅޭ ވަކި ލިމިޓެއްގެ ތެރެއިން އެންޓި ކޮރަޕްޝަން ކޮމިޝަން (އޭސީސީ)އަށް އެކްސެސް ދޭން އެއްބަސްވުމެއްގައި ސޮއިކޮށްފިއެވެ.

އިމިގްރޭޝަންގައި ބޭއްވި ރަސްމިއްޔާތުގައި މި އެއްބަސްވުމުގައި އެންޓި-ކޮރަޕްޝަން ކޮމިޝަނުގެ ފަރާތުން ސޮއިކުރެއްވި ކޮމިޝަނުންގެ ރައީސް އާދަމް ޝާމިލް އެވެ. އަދި އިމިގެރޭޝަންގެ ފަރާތުން ސޮއިކުރެއްވީ ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު އަހްމަދު ހުސައިން އެވެ.

މި އެއްބަސްވުމުގެ ދަށުން، އޭސީސީއިން ކޮރަޕްޝަނާއި ދެކޮޅަށް ހިންގާ ތަހުގީގުތަކުގައި އިމިގްރޭޝަނުގެ އެއްބާރުލުންދިނުމުގެ ގޮތުން، އިމިގްރޭޝަންގެ ޑޭޓާ ބޭސްތަކުގައި ހުރި މައުލޫމާތުތަކަށް އެސީސީއަށް ވަކި މިންވަރަކަށް އެކްސެސް ލިބިގެންދާނެއެވެ.

އަދި ދެ އިދާރާގެ މުވައްޒަފުންނަށް ކޮރަޕްޝަންގެ ކޭސްތަކަށް އިތުރަށް ހޭލުންތެރިކޮށްދިނުމަށާއި އަދި ކޮރަޕްޝަނާއި ދެކޮޅަށް އެޅޭނެ ފިޔަވަޅުތަކުގެ ތަމްރީނު ދިނުމަށްވަނީ ހަމަޖެހިފައެވެ.

މި ރަސްމިއްޔާތުގައި ވާހަކަ ދައްކަވަމުން އޭސީސީގެ މެންބަރު ޝިޔާމާ މުހައްމަދު ވިދާޅުވީ އެ އިދާރާއިން ކުރަމުންދާ ތަހުގީގުތަކަށް މައުލޫމާތު ހޯދުމުގައި އިމިގްރޭޝަންގެ ޑޭޓާބޭސްތަކަށް އޭސީސީއަށް އެކްސެސް ލިބިގެން ދިޔުމަކީ ވަރަށް މުހިންމު ކަމެއް ކަމަށާ އިމިގްރޭޝަން ދާއިރާގައި ނަޒާހަތްތެރިކަން ކުރިއެރުވުމަށާއި ދެމުއައްސަސާ ގުޅިގެން ގައުމީ ހިދުމަތުގައި ދެމިތިބުމަށް އިތުރު ބާރަކަށް ވެގެންދާނެ ކަމެއް ކަމަށެވެ.