އެމްޑީޕީގެ ރިޔާސީ ޓިކެޓް ކާމިޔާބުކުރެއްވި ފަރާތާއި ދެކޮޅަށް ޕާޓީގެ އެތެރޭގައި ފެކްޝަނެއް އުފެއްދުމަކީ އެމްޑީޕީގެ އަސާސީ ޤަވާއިދާއި ޚިލާފު ކަމެއް ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވެއްޖެއެވެ.

އިކްރާމް އިއްޔެ ކުރެއްވި ޓްވީޓެއްގައި ވިދާޅުވީ އެތެރޭގެ އިންތިޚާބު ނާކާމިޔާބުވުން ރައީސް މުހައްމަދު ނަޝީދު "ފިކުރެއްގެ ދިރުން" ނަމުގައި ގޮތްޕެއް އުފެއްދެވުމަށް މަސައްކަތްޕުޅު ކުރައްވަނީ، ރައީސް އިބްރާހިމް މުހައްމަދު ޞާލިހު އަށް ދެވަނަ ދައުރެއް ލިބުނަ ނުދިނުމުގެ މަގްސަދުގައި ކަމަށެވެ. 

އިކުރާމުވަނީ "ފިކުރެއްގެ ދިރުން" ގޮފި ރަޖިސްޓާ ކުރުމަށް ނަޝީދު ގެންގުޅުއްވާ ފޯމުގެ ފޮޓޯއެއްވެސް ޓްވީޓާގައި ހިއްސާކުރައްވާފައެވެ.

Advertisement

އެއާއެކު އޭނާ ވަނީ ނަޝީދު އުފައްދަވަން މަސައްކަތްޕުޅު ކުރައްވަނީ ގޮތްޕެއްތޯ ނުވަކަ ވަކި ޕާޓީއެއްތޯވެސް އައްސަވާފައެވެ. އަދި އެފަދައިން އެކަން ކުރުމަށް ޕާޓީގެ އަސާސީ ގަވައިދު ޖާގަ ދޭތޯ އިކުރާމު ސުވާލުކުރެއްވި އެވެ. 

ޕާޓީގެ މަސްލަހު ގެއްލޭގޮތަށް އިތުރު ފެކްޝަނެއް އުފެއްދުމަށް ރައީސް ނަޝީދު މަސައްކަތްޕުޅު ކުރައްވާކަން ސިފަކުރައްވާ އިކުރާމު މިއަދު ކުރެއްވި ޓްވީޓެއްގައި ވިދާޅުވެފައިވަނީ ރިޔާސީ ޓިކެޓް ނުލިބުމުން އިދިކޮޅުވުމަށް ޕާޓީގެ އެތެރޭގައި ފެކްޝަނެއް އުފެއްދުމަކީ ޕާޓިިގެ އަސާސީ ޤަވައިދުގެ 16 ވަނަ މާއްދާގެ (ބ) އާއި ޚިލާފަށް ކުރެވެ ކަމެއް ކަމަށެވެ.

ޕާޓީގެ އަސާސީ ގަވައިދު އެންމެންގެ މައްޗަށްވެސް ހިންގަންވާނީ ހަމަހަމަކަމާއެކުގައި ކަމަށް އޭނާ ވިދާޅުވި އެވެ. 

އެމްޑީޕީގެ އަސާސީ ގަވައިދު ބުނާ ގޮތުން މެމްބަރުންގެ މަސްއޫލިއްޔަތުގެ ތެރޭގައި ޕާޓީގެ ކެންޑިޑޭޓުންނަށް ތާއީދުކުރުމާއި، ވޯޓުހޯދާދިނުމަށް މަސައްކަތްކުރުމާއި ވޯޓުދިނުން ހިމެނޭކަމަށެވެ.

މިދިޔަ ހޮނިހިރު ދުވަހު ބޭއްވުނު ރިޔާސީ ޕްރައިމަރީގައި ރައީސް ނަޝީދާއި ވާދަކުރައްވާ ރައީސް ޞާލިހު ތަފާތު ބޮޑު ނަތީޖާއަކުން ކުރި ހޯއްދަވާފައި ވާއިރު އެ ނަތީޖާ ގަބޫލު ކުރައްވާކަމަށް ރައީސް ނަޝީދުވެސް ވަނީ ވިދާޅުވެފައެވެ.  

އެހެން ނަމަވެސް ރައީސް ޞާލިހާއެކު ރިޔާސީ އިންތިޚާބުގައި މަސައްކަތްޕުޅު ކުރައްވަން ބޭނުންފުޅު ނުވާކަމަށް ވިދާޅުވެ ނަޝީދުވަނީ "ފިކުރެއްގެ ދިރުން" މި ނަމުގައި ގޮއްޕެއް އުފެއްދުމުގެ މަސައްކަތް ފަށާފައެވެ. 

ނަޝީދު ވިދާޅުވީ އެމަނިކުފާނު ދެކޭގޮތުގައި، އެމްޑީޕީ ތެރޭގައި "ފިކުރެއްގެ ދިރުން" އަށް އިންތިޒާމް ވެވޭނެ ކަމަށާ، ޕާޓީގެ ގަވައިދު ތަކާއި އުސޫލުތައްވެސް އެކަމަށް ޖާގަ ދޭ ކަމަށެވެ.