ދުވަސްގަނޑަކަށްފަހު އޮލިމްޕަހުގައި އަޅުވާ ދިވެހި ދިވެހި ފިލްމު "ބީވީމާ" ގެ 4 ޝޯވ ހައުސްފުލްވެފައިވާކަމަށް ޑާކްރެއިން އެންޓަޓެއިންމަންޓްއިން ހާމަކޮށްފިއެވެ.

މި ފިލްމުގެ ޕްރޮޑިއުސަރު މުހަންމަދު އަލީ(މޮގާ) ބުނީ ޕްރިމިއާ ޝޯގެ ޓިކެޓް ހުސްވެފައިވާ ކަމަށެވެ. އަދި ފުރަތަމަ 4 ޝޯވެސް ވަނީ މުޅިން ބުކްކޮށްފައި ކަމަށެވެ. 

ފެބްރުއަރީ 10 ގައި އެ ފިލްމު ދެ ވަގުތަކު ދައްކާނެ އެވެ. އެއީ ހަވީރު އޮންނަ ހާއްސަ ޝޯގެ އިތުރުން ރޭގަނޑު 9:00 ގައި އޮންނަ ޝޯ އެވެ.

އޮލިމްޕަސް މަރާމާތު ކުރަށްފަހު އަލުން ހުޅުވުމާއިއެކު އަޅުވާ އެންމެ ފުރަތަމަ ފިލްމު ކަމަުގައިވާ "ބީވީމާ" ގެ ޕްރިމިއާ ދެއްކުމަށް ހަމަ ޖެހިފައިވަނީ 6 ފެބްރުއަރީ ވާ ހޯމަ ދުވަހުއެވެ.

ކޮވިޑްގެ ބަލިމަޑުކަމާއެކު ސިނަމާތައްވެސް ބަންދު ކުރަން ޖެހުމުގެ ސަބަބުން، އަހްމަދު ޒަރީރު ލިޔެ ޑައިރެކްޓް ކޮށްފައިވާ ލޯބީގެ ފިލްމު އެޅުވުން ވަނީ ދިގުލައިގެން ގޮސްފައެވެ.

ނަމަވެސް މިހާރު ވަނީ ފިލްމުގެ ޓްރެއިލާގެ އިތުރުން ފިލްމުގެ ތީމް ލަވަ ވެސް ދޫކޮށްފައެވެ.

މިއާއިއެކު މި ފިލްމަށް ޓިކެޓް ދޫކުރަން ފެށިފައި ވަނީ ޖަނަވަރީ 20 ގައެވެ.

މި ފިލްމުގެ ތަރިންނަކީ މަރިޔަމް އަޝްފާ، އިސްމާއިލް ރަޝީދު (ކޮޕީ އިއްސެ)، އައިމިނަތް ރަޝްފާ(އާޝާ)، އަދި އާދަމް ޒިދާން (ނާނަ) އެވެ. މީގެ ތެރެއިން އަޝްފާ އަދި ޒިދާން އަކީ އަދި އަލަށް ފިލްމީ ދާއިރާއަށް ނިކުންނަ ދެ ތަރިންނެވެ.

"ބީވީމާ" ފިލްމުގެ ޓިކެޓެއް ވިއްކަނީ 100ރ. އަށެވެ. ޝޯގެ ޓިކެޓު އޮލިމްޕަސް ކައުންޓަރުން ކޮންމެ ދުވަހެއްގެ ހެނދުނު 10:00 އިން ރޭގަނޑު 10:00 އާ ދެމެދު ލިބޭނެ އެވެ.