މާލެ އަދި ވިލިމާލޭގެ އާންމު ސަރަޙައްދުތަކާއި ތަކުން ކުނި ނެގުމުގެ މަސައްކައްތައް ހަރުދަނާ ކުރުމުގެ ގޮތުން މާލެ ސިޓީ ކައުންސިލްގެ ވޭސްޓް މެނޭޖްމެންޓް ސެކްޝަން މިއަދު ހުޅުވައިފިއެވެ.
މިއަދު ހެނދުނު މާލެ ސިޓީ ކައުންސިލްގެ ވޭސްޓް މެނޭޖްމެންޓް ސެކްޝަން ރަސްމީކޮށް ހުޅުވައިދެއްވީ މާލެ ސިޓީގެ މޭޔަރ ޑރ.މުޙައްމަދު މުޢިއްޒުއެވެ.
ވޭސްޓް މެނޭޖްމެންޓް ސެކްޝަން ހުޅުވައިދެއްވުމަށްފަހު މޭޔަރު މުޢިއްޒު ވިދާޅުވީ މިއަދު މިހުޅުވުނު އޮފީހަކީ މާލެ ސިޓީ ކައުންސިލުން މާލެތެރެ ކުނިކަހާ އަދި ކުނިނަގާ ސާފުކުރުމުގެ މަސައްކަތް ކުރިއަށްގެންދިއުމާއި ހަވާލުވެ އެމަސައްކަތާއިގުޅޭ އިދާރީ ކަންކަން ކުރިއަށްގެންދިއުމަށް ޖާގަ ނެތުމާއިއެކީގައި ޖާގަ ހަމަޖެއްސުމަށްޓަކައި ކުރެވުނު މަސައްކަތުގެތެރެއިން ހުޅުވުނު އޮފީހެއްކަމަށެވެ.
”މިހާރު މަސައްކަތްކުރާ އިދާރީ އަދި މެނޭޖީރިއަލް ލެވެލްގެ ހުރިހާ ސްޓާފުންނަށް ރަނގަޅަށް މަސައްކަތް ކުރެވޭވަރުގެ ޖާގަ އެތަނުގައި ހަމަޖެހިފައިވާނެ“ މުޢިއްޒު ވިދާޅުވިއެވެ.
މޭޔަރު ވިދާޅުވީ އެންމެފަހުން މާލޭ މުނިސިޕަލްޓީގައި މާލޭގައި ވޭސްޓް މެނޭޖްމެންޓް މަސައްކަތް ކުރިއަށްގެންގޮސް އެތައް އަހަރުތަކަކަށްފަހު މިހާރު އަނެއްކާވެސް މި މަސައްކަތް ފެށިފައިވާކަމަށެވެ.
”މިއީ ޙަޤީގަތުގައި ވަރަށް ތާރީޚީދުވަހެއް. އެންމެފަހުން މާލޭ މުނިސިޕަލްޓީގައި މާލޭގައި ވޭސްޓް މެނޭޖްމެންޓް މަސައްކަތް ކުރިއަށްގެންދިޔައީ. ދެން އެއަށްފަހު އެތައް އަހަރެއް ގޮއްސަ މިހާރު މިގޮތަށް މި ހަމަޖެހިގެން ދިޔައީ“ މުޢިިއްޒު ވިދާޅުވިއެވެ.
މޭޔަރު ވިދާޅުވީ މިއީ މާލެ ސިޓީގެ ރައްޔިތުންނާއި ގާތުން ރައްޔިތުން އިންތިޚާބުކޮށްފައިތިބި ކައުންސިލަރުންގެ ބެލުމުގެ ދަށުން މާލެތެރެ ސާފުތާހިރުކޮށް ބެލެހެއްޓުމުގެ މަސައްކަތް ހަރުދަނާގޮތެއްގައި ގެންދިއުމަށް އެޅުނު ވަރަށްބޮޑު ފިޔަވަޅެއްކަމަށެވެ. އަދި މި އޮފީސް ހުޅުވިގެން ދިއުމަކީ ލިބުނު ވަރަށްބޮޑު ކުރިއެރުމެއް ކަމުގައި މޭޔަރު ވިދާޅުވިއެވެ.
”މީގެ ނަތީޖާއަކަށް ވާނީ އިރާދަކުރެއްވިއްޔާ ކުރިއަށްއޮތް ތަނުގައި އިތުރަށް ހަރުދަނާކޮށް މާލެތެރެ ރީތިކޮށްސާފުކޮށް ބޭއްވުމުގެ މަސައްކަތް ރަނގަޅަށް ގެންދިއުން“ މުޢިިއްޒު ވިދާޅުވިއެވެ.
މޭޔަރު ވަނީ ކުރިއަށް މިއޮތް ދެތިން ހަފްތާގެތެރޭގައި އިތުރު ފިޔަވަޅުތައް އެޅި މާލެތެރެ ސާފުކުރުން ހަރުދަނާ ކުރުން އިތުރުވެގެންދާނެ ކަމުގެ ޔަޤީންކަން ދެއްވާފައެވެ.
މީގެ އިތުރުން މޭޔަރ ވިދާޅުވީ، ވޭސްޓް މެނޭޖްމެންޓް ސެކްޝަން ގައި މަސައްކަތް ކުރައްވާނީ 225 މުވައްޒަފުން ކަމަށާ، އެ މުވައްޒަފުންގެ އިދާރީ، އޮޕަރޭޝަނަލް އަދި މެނޭޖޭރިއަލް ހުރިހާ މަސައްކަތެއް ކުރާނީ މާލެ ސިޓީގެ ޢާއްމު ޚިދުމަތް ތަކާއިބެހޭބައިގައި ކަމަށެވެ.
އަދި އޮފީހުގެ މަސައްކަތް ކޮށްފައިވަނީ ވޭހާވެސް ޚަރަދު ކުޑަކޮށް ކަމަށާ، އެގޮތުން ކޮންޓްރެކްޓަރ އެއް ނުހޯދައި އޮފީހުގެ ޢަމަލީ މަސައްކަތް ކުރީ ސިޓީ ކައުންސިލްގެ މުވައްޒަފުން އަމިއްލަ އަށް ކަމަށް މޭޔަރު ވިދާޅުވި އެވެ. މޭޒު ފަދަ ފަރުނީޗަރު އަމިއްލަ އަށް ފިލާ ގަނެގެން ހެދިއިރު، ހިޔާ ކުރަން ބޭނުން ކުރީ ކުރިން ބޭނުންކުރި ދަނގަޑާއި ހޮޅި ބޭނުން ކޮށްގެން ކަމަށްވެސް ވިދާޅުވި އެވެ.
އަދި މިކަމަށް ކަނޑައެޅީ ގިނަވެގެން 3 ލައްކަ ރުފިޔާގެ ބަޖެޓެއް ކަމަށާ، ވަކި އޮފީހެއް ހަދަން ޖެހުނީ އެ ސެކްޝަނުގެ މުވައްޒަފުން އެއްވެސް ޖާގައެއް ނެތި ދޮޅުމަސް ދުވަހު މަސައްކަތް ކޮށްފައިވަނިކޮށް ކަމަށް ވެސް މޭޔަރު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
