ސްޕެނިޝް ލަލީގާގައި މިއަދު ހަވީރު ރަށުން ބޭރުގައި މަލޯރްކާ އާއި ވާދަކޮށް 1-0 ގެ ނަތީއްޖައަކުން ބަލިވެ އެންމެ ފަހުގެ ޗެންޕިއަން ރެއާލް މެޑްރިޑަށް ލީގު ދިފައުކުރުމުގެ ފުރުސަތު ކުޑަވެއްޖެއެވެ.

އަނިޔާގެ ސަބަބުން ރެއާލް މެޑްރިޑްގެ މުހިންމު ތިން ކުޅުންތެރިންކަމަށްވާ ކެޕްޓަން ބެންޒެމާ އާއި ޑިފެންޑަރ މިލީޓޯގެ އިތުރުން ގޯލްކީއްޕަރު ތިބައު ކޯޓުއާ މިމެޗުގައި ނުކުޅެއެވެ. އަދި މި މެޗުގައި ރެއާލްގެ ތަޖުރިބާކާރު ދެ މިޑްފީލްޑަރުން ކަމަށްވާ ޓޯނީ ކުރޫސް އާއި ލޫކާ މޮޑްރިޗު ވެސް މެޗު ފެށީ ބެންޗުންނެވެ.

ފުރަތަމަ ހާފުގައި ރެއާލް މެޑްރިޑުން ގިނަވަގުތު ބޯޅަ ގެންގުޅެ މެޗު ޑޮމިނޭޓު ކުރި ނަމަވެސް މަލޯރްކާގެ ގޯލަށް އަމާޒުކޮށް މިހާފުގައި އެޓީމަށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ. އަދި މި ހާފުގައި މަލޯރްކާ އިން ކާމިޔާބުކުރި ލަނޑަކީ ފުރަތަމަ ހާފުގެ 13 ވަނަ މިނެޓުގައި އެޓީމުގެ ކުޅުންތެރިއަކު ރެއާލްގެ ގޯލު ކުރިމައްޗަށް ހުރަސްކުރި ބޯޅައެއް ދިފާއު ކުރަން އުޅުމުގެ ތެރޭގައި ރެއާލްގެ ޑިފެންޑަރ ނަޗޯ ފެނާންޑޭޒް ބޮލުގައި ޖެހިފައި ބައިކޮލަށް ވަން ގޯލެކެވެ.

Advertisement

މަލޯރްކާ ކުޅުންތެރިން ލަނޑުޖެހުމަށް ފަހު އުފާ ފާޅުކުރަނީ

މަލޯރްކާގެ ލަނޑަށް ފަހު މުޅި ޓީމު އެކީ ފަހަތައްޖެހި ޑިފެންސްކުރުމުގެ ނަތީއްޖާއެއްގެ ގޮތުން މިހާފުގައި ރެއާލް މެޑްރިޑްގެ ކުރިއަށް ކުޅެމުންދިޔަ ކުޅުންތެރިންނަށް އެންމެ އެދެވޭ ކުޅުމެއް ދެއްކޭގޮތެއް ނުވިއެވެ. ނަމަވެސް ދެވަނަ ހާފުގައި ރެއާލް މެޑްރިޑުން އެޓީމުގެ ކުޅުން ރަގަޅުކޮށް ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރިއެވެ. މިގޮތުން މެޗުގެ ނަތީއްޖާ އެއްވަރުކުރުމަށް އެންމެ ރަގަޅު ފުރުސަތެއް ލިބުނީ ރެއާލްގެ އަސެންސިއޯ އަށެވެ.

ދެވަނަ ހާފުގެ 60 ވަަނަ މިނެޓުގައި މަލޯރްކާގެ ޕެނަލްޓީ އޭރިއާ ތެރެއިން އެޓީމުގެ ގޯލްކީއްޕަރު ޕްރެޑްރޭގް ރާޖްކޮވިޗް ރެއާލްގެ ވިނީޝިއަސް އަށް ކުރި ފައުލަކާއި ގުޅިގެން އެޓީމަށް ލިބުނު ޕެނަލްޓީ އަސެންސިއޯ ފޮނުވާލުމުން މަލޯރްކާގެ ސާބިއާ ކީއްޕަރު ޕްރެޑްރޭގް ރާޖްކޮވިޗް ވަނީ ދިފާއުކޮށްފައެވެ.

މެޗުގެ ފަހުކޮޅު ރެއާލް މެޑްރިޑުން ކުރިއަށްޖެހި ގިނަ ހަމަލާތަކެއް މަލޯރްކާގެ ގޯލައް ފޮނުވާލި ނަމަވެސް އެޓީމަށް ލަނޑެއް ކާމިޔާބުކުރެވޭގޮތެއް ނުވިއެވެ. މި މެޗުން ލިބުނު ތިން ޕޮއިންޓާއި އެކު މަލޯރްކާ އަށް 20 މެޗުން ވަނީ 28 ޕޮއިންޓް ލިބިފައެވެ. އަދި މި މެޗުން ބަލިވި ރެއާލް މެޑްރިޑަށް 20 މެޗުން ލިބިފައި ވަނީ 45 ޕޮއިންޓާއި އެކު ތާވަލުގެ ދެވަނަ އެވެ. އެއްވަނާގައި އޮތް ބާސެލޯނާއަށް 19 މެޗުން 50 ޕޮއިންޓް ލިބިފައިވާއިރު މިރޭ އަމިއްލަ ދަނޑުގައި ސެވިއްޔާ އަތުން މޮޅުވެ ލީގު ތާވަލުގެ ކުރީގައި 8 ޕޮއިންޓުގެ ލީޑެއް ނެގުމުގެ ފުރުސަތު އެޓީމަށް އެބައޮތެވެ.