ހޮރްމުޒް ކަނޑުއޮޅީގައި ހުރި އީރާނުގެ އަސްކަރީ މަރުކަޒުތަކަށް ހަމަލާދިނުމަށްޓަކައި، ފޯޅަވަހީގައި ހުންނަ އިނގިރޭސިވިލާތުގެ އަސްކަރީ މަރުކަޒުތައް ބޭނުންކުރުމުގެ ހުއްދަ އިނގިރޭސި ސަރުކާރުން އެމެރިކާއަށް ދީފިއެވެ.
މި ނިންމުމާ ގުޅިގެން އިނގިރޭސި ބޮޑުވަޒީރު ކިއަރ ސްޓާމަރަށް ބޮޑެތި ފާޑުކިޔުންތަކެއް ވަނީ އަމާޒުވެފައެވެ.
މީގެކުރިން ސްޓާމަރ ހުއްދަ ދެއްވާފައި އޮތީ ހަމައެކަނި ދިފާއީ އޮޕަރޭޝަންތަކުގައި އެ މަރުކަޒުތައް ބޭނުންކުރުމަށެވެ. ނަމަވެސް، ހުކުރު ދުވަހު ޑައުނިންގް ސްޓްރީޓުން ބުނި ގޮތުގައި، ތެޔޮ އުފުލާ މުހިންމު މަގުކަމަށްވާ ހޮރްމުޒް ކަނޑުއޮޅިން ދަތުރުކުރާ އުޅަނދުފަހަރު ހިމާޔަތްކުރުމަށްޓަކައި، މިހާރު ވަނީ އަމާޒުތައް ފުޅާކުރުމަށް ވަޒީރުން އެއްބަސްވެފައެވެ.
މި ނިންމުމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ބުނީ އިނގިރޭސިވިލާތުން މިއަށްވުރެ މާ އަވަހަށް ފިޔަވަޅު އަޅަންޖެހޭނެ ކަމަށެވެ. އަދި މިއީ އިނގިރޭސިވިލާތުން މިފަދަ ނިންމުމެއް ނިންމި ފުރަތަމަ ފަހަރުކަންވެސް އޭނާ ފާހަގަކޮށްފައުވެއެވެ. މީގެކުރިން ޓްރަމްޕް ވަނީ ކަނޑުއޮޅި ހުޅުވުމަށް އެހީތެރިނުވާ ނޭޓޯގެ ގައުމުތަކަކީ "ފިނޑިން" ކަމަށް ސިފަކޮށްފައެވެ.
އީރާނުގެ ޚާރިޖީ ވަޒީރު ސައްޔިދު އައްބާސް އަރާގްޗީ ވަނީ މި ނިންމުމުގެ ސަބަބުން އިނގިރޭސި ރައްޔިތުންގެ ފުރާނަ ނުރައްކަލަށް ހުށަހެޅިގެންދާނެ ކަމަށް ބުނެ އިންޒާރު ދީފައެވެ. އޭނާ ވިދާޅުވީ މިއީ އީރާނާ ދެކޮޅަށް ހިންގާ އުދުވާނެއްގައި ބައިވެރިވުން ކަމަށާއި، އީރާނުން އަމިއްލަ ދިފާއުގައި ފިޔަވަޅު އަޅާނެ ކަމަށެވެ.
އިނގިރޭސިވިލާތުގެ އިދިކޮޅު ޕާޓީތަކުން ވެސް ދަނީ މިކަމާ ކަންބޮޑުވުން ފާޅުކުރަމުންނެވެ. ކޮންޒަވޭޓިވް ޕާޓީގެ ލީޑަރު ކެމީ ބޭޑެނޮކް މި ނިންމުން ސިފަކުރެއްވީ ސަރުކާރުން ނިންމި ބޮޑު "ޔޫ-ޓާން" އެއްގެ ގޮތުގައެވެ. ލިބަރަލް ޑިމޮކްރެޓްސް އާއި ގްރީން ޕާޓީން ވަނީ މި އެއްބަސްވުމާ މެދު މަޖިލީހުގައި ވޯޓެއް ނެގުމަށް ގޮވާލާފައެވެ.
އެމެރިކާއިން ބޭނުންކުރާ އިނގިރޭސި އަސްކަރީ މަރުކަޒުތަކުގެ ތެރޭގައި ގްލޮސްޓަރޝަޔަރގައި ހުންނަ އާރް.އޭ.އެފް ފެއަރފޯޑް އަދި އިންޑިއާ ކަނޑުގައި އޮންނަ ޑިއޭގޯ ގާސިއާ ހިމެނެއެވެ.
ތަފާސްހިސާބުތަކުން ދައްކާގޮތުގައި، ހަނގުރާމައިގެ ކުރިން ދުވާލަކު 138 އުޅަނދު ހޮރްމުޒް ކަނޑުއޮޅިން ދަތުރުކުރިއެވެ. ނަމަވެސް، އީރާނުގެ ހަމަލާތަކުގެ ބިރާ ހުރެ މިހާރު މި އަދަދު ވަނީ ވަރަށް ބޮޑަށް ދަށްވެފައެވެ. މި މަހުގެ ކުރީކޮޅުން ފެށިގެން މިހާތަނަށް އެ ސަރަހައްދުން ދަތުރުކޮށްފައިވަނީ 100 އަށްވުރެ މަދު އުޅަނދެވެ.
Advertisement
This content is created and paid for by advertisers and does not involve Voice Journalists
