ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގައި ހޯރަފުށި ކުޅުނު ފުރަތަމަ މެޗު އުތީމާއި ވާދަކޮށް 2-2 ގެ ނަތީއްޖާއަކުން އެއްވަރުވެއްޖެއެެވ.

ހުޅުމާލޭ ރެހެންދި ފުޓްސަލް ގުރައުން ދޭއްގައި ރޭ ކުޅެވުނު ހއ.އަތޮޅު ގުރޫޕް ދޭއްގެ ދެ ވަނަ މެޗުގައި ފުރަތަމަ ލަނޑުޖަހައި ކުރިހޯދީ ހޯރަފުށީ ޓީމުންނެވެ. މި ލަނޑު އެޓީމަށް ކާމިޔާބުކޮށްދިނީ ޓީމުގެ ކެޕްޓަން އަބްދުﷲ ޔާމީން (ޔާނު) އެވެ. ނަމަވެސް ފުރަތަމަ ހާފު ނިމުމުގެ ކުރިން އުތީމުން މެޗުގެ ނަތީއްޖާ އެއްވަރު ކުރިއެވެ. އުތީމުން އެއްވަރުކުރި ލަނޑު ކާމިޔާބުކޮށްދިނީ އެޓީމުގެ އަހުމަދު އައިހަމް އެވެ. މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މިހާފުގެ ކުޅުން ނިމުނީ 1-1 ގެ ނަތީއްޖާއަކުން ދެޓީމު އެއްވަރުވެފައި އޮވެގެންނެވެ.

ދެވަނަ ހާފުގައި ވެސް ފުރަތަމަ ލަނޑުޖަހައި ލީޑު ހޯދީ ހޯރަފުށީ ޓީމުންނެވެ. މި ލަނޑު އެޓީމަށް ކާމިޔާބުކޮށްދިނީ ބަދަލުކުޅުންތެރިއެއްގެ ގޮތުގައި ކުޅެންނުކުމެ މުހައްމަދު ރިޝާން އެވެ. އުތީމުން ދެވަނަ ފަހަރަށް މެޗުގެ ނަތީއްޖާ އެއްވަރުކުރީ ބަދަލުކުޅުތެރިއެއްގެ ގޮތުގައި ކުޅެންނުކުތް އަލީ އިލްހާމް އެވެ.

މެޗަށް ފަހު ވޯއިސް އަލް މައުލޫމާތް ދެމުން ހޯރަފުށީ ފުޓްސަލް ޓީމުގެ މެނޭޖަރު އުސައިދު މޫސާ ބުނީ ރޭގެ މެޗުގައި ޓީމުގެ ފަރާތުން ފެނުނު ކުޅުމާއި މެދު ވަރަށް ހިތްހަމަޖެހޭ ކަމަށާއި މެޗުގެ މިގުރޫޕްގެ ހުރިހާ މެޗަކީވެސް ވަރަށް ވަރުގަދަ މެޗުތަކެއްކަމަށެވެ. މޮޅުވާން ޓީމު ކުޅުނީ ދެފަހަރަށް ލީޑުވެސް ހޯދި، އެކަމަކު ކުރިއަށް ހުރި މެޗުތަކުގައި މި މެޗުގައި ހެދުނު މިސްޓޭކުތައް ރަގަޅުކޮށް މިއައްވުރެ ވަރުގަދަ ކުޅުމެއް ހޯރަފުށީ ޓީމުގެ ފަރާތުން ފެނިގެން ދާނެކަމަށެވެ.

މިގުރޫޕްގެ ދެވަނަ މެޗުގައި މާދަމާރޭ ހޯރަފުށި ނުުކުންނާނީ ވަށަފަރު ފުޓްސަލް ޓީމާއި ދެކޮޅަށެވެ. ވަށަފަރު ވަނީ ރޭ އިހަވަންދޫ އާއި ވާދަކޮށް 4-0 ގެ ނަތީއްޖާއަކުން މޮޅުވެފައެވެ.