ރާއްޖެގެ މަރުކަޒީ ބޭންކް- މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސް ހިސާބުތަކުން ޖެނުއަރީ މަސް ނިމުންއިރު ދައުލަތުގެ ރަސްމީ ރިޒާވްގައި ހުރީ 789.97 މިލިއަން ޑޮލަރު ކަމަށް ހާމަވެއްޖެއެވެ.

އެގޮތުން ޖެނުއަރީ މަހުގެ ތަފާސް ހިސާބުތަކާއި ޑިސެމްބަރު މަހުގެ ތަފާސްހިސާބުތައް އަޅާބަލާއިރު ރަސްމީ ރިސާވް އަދި ޔޫޒެބަލް ރިޒާވްގައި ހުރި އަދަދު މަދު ކަމަށް ފާހަގަ ކުރެވެއެވެ.

ޑިސެމްބަރު މަސްނިމުނު އިރު ރަސްމީ ރިޒާވްގައި ހުރީ 827.72 މިލިއަން ޑޮލަރެވެ. އަދި ޔޫޒެބަލް ރިޒާވްގައި ހުރީ 267.74 މިލިއަން ޑޮލަރެވެ.

ނަމަވެސް ޖެނުއަރީ މަސް ނިމުނު އިރު ރަސްމީ ރިޒާވްގައި ހުރީ 789.97 މިލިއަން ޑޮލަރެވެ. އަދި ޔޫޒެބަލް ރިޒާވްގައި ހުރީ 253.76 މިލިއަން ޑޮލަރެވެ.

ކުރު މުއްދަތެއްގެ ތެރޭގައި ދައްކަންޖެހޭ ދަރަނީގެ އަދަދުގެ ގޮތުގައި ހުރީ 536.21 މިލިއަން ޑޮލަރެވެ.

މިދިޔަ އަހަރު ނިމޭއިރު ރަސްމީ ރިޒާވްގައި ހުންނާނެ ކަމަށް އަންދާޒާ ކުރެވިފައި ވަނީ 657.3 މިލިއަން ޑޮލަރެވެ. ނަމަވެސް އަންދާޒާ ކުރެވުނު އަދަދަށްވުރެ 170.4 މިލިއަން ޑޮލަރު އިތުރަށް ރިޒާވްގައި ޑިސެމްބަރު މަހު ހުއްޓެވެ.

ފިނޭންސް މިނިސްޓްރީއިން މި އަހަރު ނިމޭއިރު ރަސްމީ ރިޒާވްގައި 606.3 މިލިއަން ޑޮލަރުގެ އަދަދެއް ހުންނާނެ ކަމަށް އަންދާޒާ ކުރެއެވެ.