ރައްޔިތުންގެ މަޖިލީހުގެ ޖަލްސާ ހޫނުވެ މާފަންނު ހުޅަނގުދާއިރާގެ މެމްބަރު މުހައްމަދު ފަލާހުގެ ނަން އިއްވާ މަޖިލީހުގެ ޖަލްސާއިން ނެރެފި އެވެ. 

ރައްޔިތުންގެ މަޖިލީހުގެ މިއަދުގެ ޖަލްސާ ހޫނުވީ، މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ މައުލޫއާއި ނުގުޅޭ ވާހަކަފުޅުތަކެއް ދައްކަވަމުން ދިއުމާއި ގުޅިގެން އެވަގުތު ރިޔާސަތު ބަލަހައްޓަވަމުން ގެންދެވި ވިލުފުށީ ދާއިރާގެ މެމްބަރު ހަސަން އަފީފު ހުއްޓުވުމާއި ގުޅިގެން ނެވެ. 

ޣަފޫރު ވިދާޅުވީ މިއަދު ސަރުކާރަށް ފާޑުކިޔާ ބައެއް އެމްޑީޕީ މެމްބަރުން، މަޖިލީހަކީ ސަރުކާރަށް ފާޑުކިޔުމަށް އޮތް ޕްލެޓްފޯމަކަށް ހައްދަވަމުންދާ ކަމަށެވެ. ޣަފޫރު އެ މޭރުމުން ވާހަކަދައްކަވަމުން ދިއުމާއި ގުޅިގެން ރިޔާސަތުން ވަނީ އޭނާ ހުއްޓުވާފަ އެވެ. 

Advertisement

އެއާއެކު މަޖިލީހުގެ މަޝްރަހު ހޫނު ވެގެން ދިޔައެވެ. އަދި މަޖިލީހުގައި އެވަގުތު ތިއްބެވި ބައެއް މެމްބަރުން މަޖިލީސް ކުރިއަށް ގެންދިއުމަށް އުނދަގޫވާ ވަރަށް އަޑުއުފުލަން ފެއްޓެވިއެވެ. އޭގެ ތެރޭގައި އެންމެ އިސްކޮށް ހުންނެވީ މެމްބަރު ފަލާހެވެ. 

އެއާއެކު ރިޔާސަތުން ވަނީ މަޖިލިސް ކުރިއަށް ގެންދިއުމަށްޓަކައި ފަލާހުގެ ނަން އިއްވަވާ މަޖިލީހުގެ ޖަލްސާއިން ނެރެފަ އެވެ. 

އެފަހުން މަޖިލީހުން ވަނީ ޖަލްސާ ކުރިއަށް ގެންގޮސްފަ އެވެ.