ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމުގައިވާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގައި ވަދަކުރާ އިގުރައިދޫ ފުޓްސަލް ޓީމުގެ ޖާޒީ ހާވާލުކުރުމުގެ ރަސްމިއްޔާތް ރޭ ބާއްވައިފިއެވެ. ގްރީންޒޯން ކޭފެގައި ރޭ ބޭއްވި ކުޑަ ހަފްލާއެއްގައި އެޓީމުގެ ކުޅުންތެރިންނާއި ޖާޒީ ހަވާލުކޮށްދެއްވީ އިގުރައިދު ދާއިރާގެ މަޖުލީސް މެންބަރު ހަސަން އަހުމަދު އެވެ.

އިގުރައިދޫ ދައިރާގެ އެމްޕީ ހަސަން އަހުމަދު ކުޅުންތެރިއަކަށް ޖާޒީ ހަވާލުކޮށްދެނީ

މުބާރާތުގެ ފުރަތަމަ މެޗުގައި މިރޭ އިގުރައިދޫ ނުކުންނާނީ އިންނަމާދޫ އާއި ދެކޮޅަށެވެ. މި މެޗާއި ބެހޭގޮތުން ވޮއިސް އަށް މައުލޫމާތް ދެމުން އިގުރައިދޫ ޓީމުގެ މެނޭޖަރ އަރީފް ޚާލިދު ބުނީ އެޓީމު އޮތީ މިރޭގެ މެޗަށް ވަރަށް ރަގަޅަށް ތައްޔާރުވެފައި ކަމަށެވެ. ކުޅުންތެރިން ތިބީ ވަރަށް ރަގަޅު ރޫހެއްގައި، ކޮންމެ މެޗަކީވެސް އުދަގޫ މެޗެއްކަން ދަނެގެން އިގުރައިދޫ ޓީމު ނުކުންނާނީ. 

އިގުރައިދޫ ދައިރާގެ އެމްޕީ ހަސަން އަހުމަދު ކުޅުންތެރިއަކަށް ޖާޒީ ހަވާލުކޮށްދެނީ

އިތުރަށް ވާހަކަދައްކަމުން އަރީފް ބުނީ މިވަގުތު ޓީމަށް އެންމެ މުހިންމު އެއްޗަކީ ސަޕޯޓަރުންގެ ތަރުހީބު ކަަމަށެވެ. ކުޅުންތެރިން ތިބީ އާދަޔާ ޚިލާފު ރޫހެއްގައި، "އަޅުގަނޑުމެން އެދެން ވީހާވެސްގިނަ ސަޕޯޓަރުން މާލެ، ހުޅުމާލެ އަދި ވިލިމާލޭގައި ދިރިއުރޭ އިގުރައިދޫގެ ހުރިހާ ރައްޔިތުންވެސް ދަނޑަށް އައިސް ޓީމަށް ހިތްވަރު ދިނުމަށް، އިރާދަކުރެއްވިއްޔާ އަހަރެމެން އެންމެން ގުޅިގެން މިފަހަރު މިކަން ކާމިޔާބުކުރާނަން"

މި އަހަރުގެ މުބާރާތުގައި އަތޮޅު ބުރުގައި ރ. އަތޮޅުން ވަނީ ފަސް ޓީމު ބައިވެރިވެފައެވެ. އެއީ އިގުރައިދޫގެ އިތުރުން ދުވާފަރު، އަލިފުށި، މީދޫ އަދި އިންނަމާދޫ އެވެ. ފުރަތަމް މެޗުގައި އިގުރައިދޫ ފެބުރުއަރި 8 ވަނަ ދުވަހު ނުކުންނާނީ އިންނަމާދޫ އާއި ދެކޮޅަށެވެ. އަދި ދެވަނަ މެޗުގައި ފެބުރުއަރީ 11 ވަނަ ދުވަހު އެޓީމު ނުކުންނާނީ މީދޫ ފުޓްސަލް ޓީމާއި ދެކޮޅަށެވެ. އަދި ގުރޫޕް ތިން ވަނަ މެޗުގައި ފެބުރުއަރީ 15 ވަނަ ދުވަހު އެޓީމު ނުކުންނާނީ އަލިފުށީ ފުޓްސަލް ޓީމާއި ދެކޮޅަށެވެ. ގުރޫޕް ސްޓޭޖް ފަހު މެޗުގައި ދުވާފަރު ފުޓްސަލް ޓީމާއި ދެކޮޅަށް އިގުރައިދޫ ނުކުންނާނީ ފެބުރުއަރީ މަހުގެ 25 ވަނަ ދުވަހުގައެވެ.

މި މުބާރާތުގައި އިގުރައިދޫ ޓީމުގެ މީޑިއާ ޕާޓްނަރަކަށް ވޮއިސް އެމްވީ ހަމަޖައްސާފައިވާއިރު، އެޓީމުގެ ސްޕޮންސަރުންނަކީ ޒީން، ސުޕާރީ ފިހާރަ އަދި ބޯލްޑް އެވެ. އެޓީމުގެ ކިޓް ސްޕޮންސާރ އަކީ ޖާޒިއާ އެމްވީ އެވެ.