ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2023 ގައި އިގުުރައިދޫ ކުޅުނު ފުރަތަމަ މެޗުގައި އިންނަމާދޫ އަތުން ފަސޭހަ ކަމާއިއެކު 8-0 ގެ ތަފާތުބޮޑު ނަތީއްޖާއަކުން އެޓީމު މޮޅުވެއްޖެއެވެ.

ދުރާލާ މި އަހަރުގެ މުބާރާތައް ތައްޔާރުވާން ފެށި އިގުރައިދޫ ޓީމުން ރޭގެ މެޗުގައި ކޮންމެ ހާފެއްގައިވެސް ހަތަރު ލަނޑު ކާމިޔާބުކުރި އެވެ. މިގޮތުން ރޭގެ މެޗުގައި އެޓީމުގެ އަހުމަދު އައިހަމް ތިން ލަނޑު ކާމިޔާބުކޮށް ހެޓްރިކް ހެދިއިރު އަލީ ހާފިޒް އަދި މުހައްމދު މަމްދޫހް މިއިން ކޮންމެ ކުޅުންތެރިއަކު ވަނީ ދެ ލަނޑުޖަހާފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ މުހައްމަދު ޖުމާން އެވެ.

ރޭގެ މެޗުގައި އިގުރައިދޫގެ ޓީމުގެ ފަރާތުން ތަފާތު މޮޅުކުޅުމެއް ފެނިގެން ގޮސްފައިވާއިރު، މި އަހަރު އިގުރައިދޫގެ ޓީމުގެ ކޯޗަކީ ރާއްޖޭގެ ޤައުމީ ފުޓްސަލް ޓީމުގެ އެސިސްޓެންޓް ކޯޗު އަހުމަދު ވިސާމް (އަންދު)އެވެ.  މުބާރާތުގެ ކުރިން ވޮއިސް އެމްވީ އާއި ވާހަކަދައްކަމުން އަންދު ބުނީ އިގުރައިދޫ ޓީމުގައި ތިބީ ވަރަށް ހުނަރުވެރި ކުޅުންތެރިންތަކެއް ކަމަށާއި މި މުބާރާތައް އެޓީމު ވަރަށް ރަގަޅަ ތައްޔާރުވެފައިވާ ކަމަށެވެ.

އިގުރައިދޫ ޓީމުން މުބާރާތާއި ކުރިމަތިލީ ރާއްޖޭގެ ޗެންޕިއަންކަން ހޯދުމަށް ޓާގެޓުކޮށްގެންނެވެ. އަދި މި ނަތީއްޖާގެ ސަބަބުން ކުރިއަށް ހުރި މެޗުތަކުގައި އެހެން ޓީމުތަކުން އެޓީމާއި މެދު އިތުރަށް ސަމާލުވާނެކަމަށް އަންދު ގަބޫލުކުރެއެވެ. މިގުރޫޕްގައި ކުރިއަށް ހުރީ އުދަގޫ މެޗުތަކެއް ކަމަށާއި ޓާގެޓަށް ހާސިލްވުމަށް ކޮންމެ މެޗެއްގައިވެސް ހުރިހާ ކުޅުންތެރިން ވެސް ސަތޭކަ ޕަސެންޓް ދޭންޖެހޭނެއެވެ. 

މި އަހަރުގެ މުބާރާތުގައި އަތޮޅު ބުރުގައި ރ. އަތޮޅުން ވަނީ ފަސް ޓީމު ބައިވެރިވެފައެވެ. އެއީ އިގުރައިދޫގެ އިތުރުން ދުވާފަރު، އަލިފުށި، މީދޫ އަދި އިންނަމާދޫ އެވެ. ގުރޫޕްގެ ދެވަނަ މެޗުގައި ފެބުރުއަރީ 11 ވަނަ ދުވަހު އިގުރައިދޫ ނުކުންނާނީ މީދޫ ފުޓްސަލް ޓީމާއި ދެކޮޅަށެވެ. އަދި ގުރޫޕް ތިން ވަނަ މެޗުގައި ފެބުރުއަރީ 15 ވަނަ ދުވަހު އެޓީމު ނުކުންނާނީ އަލިފުށީ ފުޓްސަލް ޓީމާއި ދެކޮޅަށެވެ. ގުރޫޕް ސްޓޭޖް ފަހު މެޗުގައި ދުވާފަރު ފުޓްސަލް ޓީމާއި ދެކޮޅަށް އިގުރައިދޫ ނުކުންނާނީ ފެބުރުއަރީ މަހުގެ 25 ވަނަ ދުވަހުގައެވެ.