އިގިރޭސި ޕްރެމިއާ ލީގުގައި ރޭ އަމިއްލަ ދަނޑުގައި މެންޗެސްޓާ ޔުނައިޓެޑާއި ލީޑްސް ވާދަކުރި މެޗު 2-2 ގެ ނަތީއްޖާއިކުން އެއްވަރުވެގެން ނިމިއްޖެއެވެ.

މެންޗެސްޓަރ ޔުނައިޓެޑުގެ އޯލްޑް ޓްރެފޯޑް ރޭ ކުޅެވުނު މެޗުގައި ފުރަތަމަ ލަނޑުޖަހައި ލީދުހޯދީ ލީޑްސް ޔުނައިޓެޑުން ނެވެ. މިލަނޑު މެޗުގެ ފުރަތަމަ މިނެޓުގައި ކާމިޔާބުކޮށްދިނީ އިޓަލީގެ ފޯވާޑް ވިލްފްރައިޑް ގްނޮންޓޯ އެވެ. މިއީ އެޓީމުގެ އިގިރޭސި ފޯވާޑް ޕެޓްރިކް ބެމްފޯޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. ފުރަތަމަ ހާފުގައި މެންޗެސްޓަރ އިން ގިނަވަގުތު ބޯޅަގެންގުޅެ މެޗު ޑޮމިނޭޓުކުރި ނަމަވެސް މިހާފުގައި އެޓީމަށް ލަނޑެއް ކާމިޔާބު ކުރެވޭގޮތެއް ނުވިއެވެ.

ވިލްފްރައިޑް ގްނޮންޓޯ ލަނޑުޖެހުމަށް ފަހު އުފާ ފާޅުކުރަނީ

މެޗުގެ ދެވަނަ ހާފު ފެށިގެން ތިން ވަނަ މިނެޓުގައި ލީޑްސް ޔުނައިޓެޑުން އެޓީމުގެ ލީޑު ފުޅާކުރިއެވެ. މިއީ ޔުނައިޓެޑުގެ ފުރާންސް ޑިފެންޑަރ ރަފައެލް ވަރާން އަތުން ބައިކޮޅަށް ވަން ގޯލެކެވެ. މިއާއެކު މެންޗެސްޓަރ ޔުނައިޓެޑުން އެޓީމުގެ އެޓޭކުތައް އިތުރަށް ވަރުގަދަކުރިއެވެ. ނަތީއްޖާއެއްގެ ގޮތުން ދެވަނަ ހާފުގެ 62 ވަނަ މިނެޓުގައި އެޓީމުން ލަނޑެއް ކާމިޔާބުކޮށް ފަރަގު ކުޑަކުރިއެވެ. މިލަނޑު އެޓީމަށް ކާމިޔާބުކޮށްދިނީ އިގިރޭސި ފޯވާޑް މާކަސް ރަޝްފޯޑުއެވެ. މިއީ އެޓީމުގެ ޕޯޗުގަލް ޑިފެންޑަރ ޑިއޯގޯ ޑަލޮޓް ތަނަވަސްކޮށްދިން ފުރުސަތެއްގައި ރަޝްފޯޑް ކާމިޔާބުކޮށްދިން ލަނޑެކެވެ.

މިމެޗުގައި މެންޗެސްޓަރ ޔުނައިޓެޑުން ނަތީއްޖާ އެއްވަރުކުރީ ދެވަނަ ހަފުގެ 70 ވަނަ މިނެޓުގައި، ބަދަލުކުޅުންތެރިއެއްގެ ގޮތުގައި ކުޅެން ނުކުތް އިންގިރޭސި ފޯވާޑް ސަންޗޯ ކާމިޔާބުކޮށްދިން ލަނޑުންނެވެ.

މި މެޗުން ލިބުނު އެއް ޕޮއިންޓާއި އެކު 22 މެޗުން މެންޗެސްޓަރ ޔުނައިޓެޑަށް ވަނީ 43 ޕޮއިންޓް ލިބިފައެވެ. ލީގު ތާވަލުގެ ތިންވަނާގައި އެޓީމު މިވަގުތު އޮތް އިރު 21 މެޗުން ލިބުނު 19 ޕޮއިންޓާއި އެކު ލިޑްސް ޔުނައިޓެޑް މިވަގުތު އޮތީ ޕްރެމިއާ ލީގު ތާވަލުގެ 16 ވަނައިގައެވެ.