ފީފާ ކްލަބް ވޯލްޑް ކަޕްގެ ސެމީ ފައިނަލުގެ ދެވަނަ މެޗުގައި އެފްރިކާގެ ޗެމްޕިއަން، މިސްރުގެ އަލް އަހްލީ ފަސޭހަކަމާއި އެކު 4-1 ގެ ނަތީއްޖާއަކުން ބަލިކޮށް ޔޫރަޕްގެ ޗެމްޕިއަން ރެއާލް މެޑްރިޑުން މުބާރާތުގެ ފައިނަލުން ޖާގަހޯދައިފިއެވެ. ކްލަބް ވޯލްޑް ކަޕްގެ އެންމެ ކާމިޔާބު ކުލަބް ރެއާލް މެޑްރިޑުން ވަނީ މި މުބާރާތުގެ ޗެންޕިއަންކަން 2014، 2016، 2017 އަދި 2018 ވަނަ އަހަރު ހޯދާފައެވެ.

އަންނަ ހޮނިހިރު ދުވަހުގެރޭ ކުޅޭ ފައިނަލުގައި ރެއާލުން ނުކުންނާނީ އޭޝިއާގެ ޗެމްޕިއަން، ސައުދީ އަަރަބިއްޔާގެ އަލް-ހިލާލްއާ ދެކޮޅަށެވެ. ސެމީގެ ފުރަތަމަ މެޗުގައި އަލް-ހިލާލް ވަނީ ދެކުނު އެމެރިކާގެ ޗެމްޕިއަން، ބްރެޒިލްގެ ފްލަމެންގޯ 3-2 ގެ ނަތީއްޖާއަކުން ބަލިކޮށްފައެވެ.

މޮރޮކޯގެ ޕްރިންސް މޯލޭ އަބްދުﷲ ސްޓޭޑިއަމްގައި ރޭ ކުޅެވުނު ސެމީ ފައިނަލްގެ މެޗަށް ރެއާލުން ނުކުތީ އެޓީމުގެ ފުރަތަމަ އެގާރައިގައި އާންމުކޮށް ކުޅޭ މުހިންމު ހަތަރު ކުޅުންތެރިއަކާއި ނުލައެވެ. މިވަގުތު އެ ޓީމުގެ ކެޕްޓަން، އަދި އެންމެ މުހިންމު ފޯވާޑް ކަރީމް ބެންޒެމާ އާއި އެއް ނަންބަރު ގޯލްކީޕަރު، ތިބޯ ކޯޓުއާގެ އިތުރުން މުހިންމު ދެ ޑިފެންޑަރުން ކަމަށްވާ އެޑާ މިލިޓާއޯ އާއި ފާލަންޑް މެންޑީ ހުރީ އަނިޔާގައެވެ.

ދެޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔަ ފުރަތަމަ ހާފުގައި ރެއާލް ޓީމުން އެންމެ ރަގަޅު ފުރުސަތެއް ލިބުނީ ބްރެޒިލްގެ ފޯވާޑް ރޮޑްރިގޯ އަށެވެ. އަލް އަހްލީގެ ކީއްޕަރު ކައިރިން ނައްޓާލުމަށްފަހު ރޮޑްރިގޯ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

މި މެޗުގައި ރެއާލްގެ ފުރަތަމަ ލަނޑު ފުރަތަމަ ހާފުގެ 42 ވަނަ މިނިޓްގައި ކާމިޔާބުކޮށްދިނީ ވިނީޝިއަސް ޖޫނިއާ އެވެ. މިއީ އަލް އަހުލީގެ ޑިފެންޑަރުންނަށް ހެދުނު ގޯހެއްގެ ފައިދާނަގައި އެޓީމުގެ ޕެނަލްޓީ އޭރިއާތެރެއަށް ބޯޅައާއެކު ވަދެ ވަރަށް ހަމަޖެހިލާފައި ކީއްޕަރުގެ ބޯމަތިން ގޯލްތެރެއަށް ބޯޅަ ފޮނުވާލައިގެން ވިނީޝިއަސް ކާމިޔާބުކުރި ލަނޑެކެވެ. ފުރަތަމަ ހާފުގައި އަލް އަހްލީ އިން ވެސް ރަގަޅު ދެހަމަލާއެއް ރެއާލްގެ ގޯލަށް އަމާޒުކޮށް ފޮނުވާލިއެވެ.

ރެއާލްގެ ދެވަނަ ލަނޑު ދެވަނަ ހާފުގެ ފުރަތަމަ މިނެޓުގައި ކާމިޔާބުކޮށްދިނީ އުރުގުއާއީގެ މިޑްފީލްޑަރ ފެޑޭ ވަލްވޭޑޭ އެވެ. މިއީ ރޮޑްރިގޯ ފޮނުވާލި ހަމަލާއެއް އަލް އަހްލީ ކީޕަރު އެލް ޝެނާވީ އަތުގައި ޖެހިފައި ނުކުތް ބޯޅަ އަލް އަހްލީ ޕެނަލްޓީ އޭރިއާތެރެއިން ކޮންޓްރޯލް ކުރުމަށް ކީއްޕަރު ކައިރިން ނައްޓާލުމަށް ފަހު ވަރަށް ހަމަޖެހިލާފައި ގޯލުގެ ތެރެއަށް ފޮނުވާލައިގެން ވަލްވޭޑޭ ކާމިޔާބުކުރި ލަނޑެކެވެ.

މި މެޗުގައި އަލް އަހްލީ އިން ކާމިޔާބުކުރި ހަމައެކަނި ލަނޑު ދެވަނަ ހަފުގެ 65 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ޑިފެންޑަރ އަލީ މަލޫލް އެވެ. މިއީ ރެއާލްގެ ޕެނަލްޓީ އޭރިއާތެރެއިން އެޓީމުގެ އެޑޮއާޑޯ ކަމަވިންގާ އަލް އަހުލީގެ ކުޅުންތެރިއަކަށް ކުރި ފައުލަކާއި ގުޅިގެން ރެފްރި އެޓީމަށް ދިން ޕެނަލްޓީއެކެވެ.

ދެވަނަ ހާފުގެ 87 ވަނަ މިނެޓުގައި ރެއާލްގެ ވިނީޝިއަސް އަށް އަލް އަހްލީ ޕެނަލްޓީ އޭރިއާ ތެރެއިން އެޓީމުގެ ކުޅުންތެރިއަކު ކުރި ފައުލަކާއި ގުޅިގެން ރެފްރީ ރެއާލް އަށް ޕެނަލްޓީއެއް ދިނެވެ. މި ޕެނަލްޓީ ރެއާލްގެ ތަޖުރިބަކާރު މިޑްފީލްޑަރ ލޫކަ މޮޑްރިޗް ފޮނުވާލުމުން އަލް އަހްލީގެ ކީޕަރު އެލް ޝެނާވީ ވަނީ މަތަކޮށްފަ އެވެ.

ރެއާލްގެ ފަހު ދެ ގޯލު އެޓީމުން ކާމިޔާބުކުރީ މެޗުގެ އިތުރު ވަގުތުގައި ދެއްކި އަށް މިނިޓް ތެރޭގަ އެވެ. އެ ގޮތުން އިތުރު ވަގުތުގެ ދެ ވަނަ މިނިޓްގައި ރޮޑްރީގޯ ވަނީ ރެއާލްގެ ތިން ވަނަ ގޯލު ޖަހައިފަ އެެވެ. މިއީ ސްޕެނިޝް މިޑްފީލްޑަރ ޑެނީ ސެބާޔޯސް ތަނަވަސްކޮށްދިން ފުރުސަތެއްގައި ރޮޑްރިގޯ ކާމިޔާބުކޮށްދިން ލަނޑެކެވެ.

ރެއާލްގެ ފަހު ގޯލު ޖެހީ ވިނީޝިއަސްގެ ބަދަލުގައި ކުޅެން އެރި ޒުވާން ކުޅުންތެރިޔާ، ސާޖިއޯ އަރީބާސް އެވެ. އުމުރުން 21 އަހަރުގެ އަރީބާސް އަށް އަލް އަހްލީގެ އޭރިއާތެރެއިން ލިބުނު ބޯޅަ ކޮންޓްރޯލް ކުރުމަށް ފަހު އޭނާ ވަނީ ތިރިތިރިން ގޯލުގެ ކަނަށް އެބޯޅަ އަމާޒުކޮށްލާފައެވެ.