މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ދެބައިވެފައިވާއިރު، ސަރުކާރާއި ދެކޮޅު ފެކްޝަނުން ކުރާ ހަމައެކަނި ކަމަކީ ސަރުކާރަށް ވަގަށް ގޮވުމާއި ފުރައްސާރަކުރުން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު (މަވޯޓާ) ވިދާޅުވެއްޖެ އެވެ. 

ޝަރީފު މިފަދައިން ވިދާޅުވެފައިވަނީ އެމްޑީޕީގެ ރައީސް މުހައްމަދު ނަޝީދާއި އޭނާއަށް ތާއީދުކުރައްވާ ފަރާތްތައް ސަރުކާރަށް ފާޑުވިދާޅުވެ ދައްކަވަމުންދާ ވާހަކަތަކަށް ޓްވީޓާގައި ރައްދުދެއްވަމުން ނެވެ. 

އެމްޑީީޕީގެ ދެ ފެކްޝަންގެ ދެމެދުގައި އުފެދިފައިވާ ނުތަވަސްކަން ރައްޔިތުންގެ މަޖިލީހުގެ މި ދައުރުގެ ޖަލްސާތަކުންވެސް ހާމަކަން ބޮޑުގޮތެއްގައި ފެނިގެންދާއިރު، ދެ ފެކްޝަނުގެ މެމްބަރުންގެ މެދުގައި ދަނީ ބަހުގެ ހަމަލާތައް ހުއްޓުމެއްނެތި ބަދަލުކުރެވެމުން ނެވެ. 

Advertisement

އެކަންކަމަށް އިޝާރާތް ކުރައްވާ މަވޯޓާ ކުރެއްވި ޓްވީޓެއްގައި ވިދާޅުވީ ސަރުކާރާއި ވާދަވެރި ޕާޓީތަކާއި، އެމްޑީޕީ އެތެރޭގައި އުފެދިފައިވާ ސަރުކާރާއި ދެކޮޅު ފެކްޝަނުން މިހާރު ކުރަމުންދާ މަސައްކަތަކީ ސަރުކާރަށް ވަގަށް ގޮވައި ފުރައްސާރަކުރުން ކަމަށެވެ. އަދި ސަރުކާރާއި މެދު ރައްޔިތުންގެ ހިތްތަކުގައި ނަފްރަތު އުފައްދާ ފިތުނަ އުފެއްދުން ކަމަށެވެ. 

ސަރުކާރާއި މެދު ނަފްރަތު އުފެދޭފަދަ ވާހަކަތައް ފަތުރަމުން ދިޔަ ނަމަވެސް، އެމްޑީޕީގެ އިދިކޮޅު ފެކްޝަނުގައި ގައުމު ކުރިއަށް ގެންދިއުމުގެ އެއްވެސް ވިސްނުމެއް އަދި އެފަދަ ސިޔާސަތެއް ނެތްކަމަށް ޝަރީފު ވިދާޅުވި އެވެ. 

ޝަރީފު ވިދާޅުވީ ގައުމު ކުރިއަރާ ދާނީ ސުލްހަ މަސަލަސްކަން ގާއިމު ކުރެވިގެން ކަމަށެވެ. އިރުއަރާ ކޮންމެ ދުވަހަކު ދުނިޔެ ހަލަބޮލި ކުރުމަކީ އެއްވެސް ބަޔަކު ކުރާ ކަމެއް ނޫންކަމަށާއި، ދިވެހިންނަށް ދަސްވެގެން މި އުޅެނީ އާ ވައްތަރެއްގެ ޑިމޮކްރަސީއެއްކަމަށް އޭނާ ވިދާޅުވި އެވެ. 

ޝަރީފުގެ އެ ފާޑުކިޔުން އަމާޒުކުރައްވާފައިވަނީ އިދިކޮޅުން މާލޭގައި ސިލްސިލާގޮތެއްގައި ކުރިއަށް ގެންދާ މުޒާހަރާތަކަށް ކަމަށް ބެލެވެއެވެ. 

އެކަންކަން ފާހަގަކުރައްވާ ޝަރީފު ވިދާޅުވީ ޕާޓީގެ އެތެރެއިންނާއި ބޭރުން ސަރުކާރަށް ކުރާ ފުރައްސާރަތަކަށް ބެއްލެވުމެއް ނެތި ރައީސް ޞާލިހު ގެންދަވަނީ "ހެޔޮވެރިކަމެއް" މި ގައުމުގައި ކޮށްދެއްވަމުން ކަމަށެވެ.

ދިވެހިރާއްޖޭގައި ސުލްހަ މަސަލަސްކަން ގާއިމްކުރުމަށް ރައީސް ޞާލިހު ކުރައްވަމުން ގެންދަވާ މަސައްކަތަށް ތައުރީފު ހައްގުކަމަށް އޭނާ ވިދާޅުވި އެވެ.