ސަލްމާން މިސްކިތުގެ އޭސީ ޔުނިޓް މައްސަލަ އެއްކޮށް ހައްލު ވެއްޖެ ކަމަށް އިސްލާމިކް މިނިސްޓްރީއިން ބުނެފިއެވެ.

އެގޮތުން އިސްްލާމިކް މިނިސްޓްރީގެ މިޑިއާ އޮފިޝަލަކު މިއަދު "ވޮއިސް" އަށް މައުލޫމާތު ދެއްވަމުން ވިދާޅުވެފައިވަނީ ސަލްމާން މިސްކިތުގެ މަސައްކަތް އެއްކޮށް ނިންމާ އޭސީ ޔުނިޓްތަކުގެ މައްސަލަ މިދިޔަ ބުރާސްފަތި ދުވަހު ހައްލު ކޮއްފައިވާ ކަމަށެެވެ.

 އަދި މިހާރު އޭސީއިން ބަރާބަރަށް ފިނިވާނެ ކަމަށް ވެސް މިނިސްޓްރީއިން ވަނީ ވިދާޅުވެފައެވެ.

Advertisement

ސައޫދީ ރަސްގެފާނު ސަލްމާން ބިން ޢަބްދުލްޢަޒީޒުގެ ހިލޭ އެހީގައި ރައީސް ޔާމީންގެ ސަރުކާރުން މާލޭގައި ޢިމާރާތްކޮށްފައިވާ ކިންގް ސަލްމާން މިސްކިތުގައި ނަމާދުކުރަން ފަށާފައިވަނީ މިދިޔަ އަހަރުގެ އޭޕްރީލް މަހުގެ ތެރޭގައެވެ. ނަމަވެސް މިސްކިތް ހުޅުވިތާ ދެމަހެއްހާ ދުވަސް ފަހުން، އޭސީތަކުން ފިނިނުވާ މައްސަލަ ފެންމަތިވިއެވެ. އޭގެ ސަބަބުން އެ މިސްކިތަށް ނަމާދު ކުރަންދާ ގިނަ އަދަދެއްގެ މީހުން ޝަކުވާކޮށް ނުރުހުން ފާޅުކޮށްފައިވެއެވެ.

ވޭތުވެދިޔަ ޑިސެމްބަރު މަހު މި މައްސަލަ ހައްލު ކުރާނެ ކަމަށް މިނިސްޓްރީ އިން ބުނި ނަމަވެސް އެމިސްކިތުގައި އޭސީ ހަރުކޮށްފައި ވަނީ ބޭރުގެ ކޮންޓްރެކްޓަރުން ކަމަށް ވުމާއެކު ރާއްޖޭން އޭސީތައް މަރާމާތު ކުރުން ނާކާމިޔާބުވެ، އެ މަސައްކަތް ވަނީ ދިގު ދެމިގެން ގޮސްފައެވެ.

އަދި މި މައްސަލަ ހައްލު ކުރުމަށްޓަކައި މިދިޔަ މަހުގެ ފަހުކޮޅު އޭސީ މަރާމާތު ކުރާ ޓެކްނިކަލް ޓީމެއް ވަނީ މާލެ ގެނެސްފައެވެ.