މަސްތުވާތަކެތި އެތެރެކުރާ ބިދޭސީން ފޮނުވާލާ ގަވައިދު އިސްލާހުކުރަން ގޮވާލާ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ހުށައެޅުއްވި ކުއްލި މައްސަލަ ބޭރުކޮށްލުމަށް އޭނާ ތަމްސީލުކުރައްވާ ޕާޓީ އެމްޑީޕީއިން ވިޕްލައިން ނެރުމުން ނުރުހުން ފާޅުކޮށްފި އެވެ. 

ހަސަން ލަތީފު ހުށައެޅުއްވި އެ މައްސަލައަކީ އެމްޑީޕީގެ މެނިފެސްޓޯގައި ބަޔާންކޮށްފައިވާ މަސްތުވާތަކެތި ހުއްޓުވުމުގެ ސިޔާސަތާއި ޚިލާފަށް، ސަރުކާރު ޝާމިލުވެ މަސްތުވާތަކެތި ޓްރެފިކްކުރާ ބިދޭސީންނަށް ފައިސޭހައިން ބިރެއް ނެތި އެ ވިޔަފާރިކުރެވޭނެ ގޮތަށް، އަދި މަސްތުވާތަކެތީގެ ވިޔަފާރިއަށް ހިތްވަރު ލިބޭ ގޮތަށް ސިޔާސަތު ބައްޓަންކޮށް ސަރުކާރުގެ ގެޒެޓުގައި ޝާއިރުކޮށްފައިވާކަން ބަޔާންކޮށް ބޮޑެތި ކަންބޮޑުވުންތަކާއެކު ހުޅައެޅުއްވި ކުއްލި މައްސަލައެކެވެ. 

"ވައިގެ މަގުން ދިވެހިރާއްޖެ އަންނަ ބިދޭސީއަކު ދިވެހިރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކުކުރެވޭ ހާލަތްތަކުގައި އެ ފަރާތަކާމެދު އަމަލުކުރާނެ ގޮތުގެ ޤަވާއިދު"ގެ ނަމުގައި ގަވައިދެއް ހަދާފައިވާއިރު، 6 ފެބްރުއަރީގައި ދޯހާ މަގުން ރާއްޖެއަށް އައި 23 އަހަރުގެ އަންހެނެއްގެ ދާގީނާގައި މަސްތުވާތަކެތި ހުރިކަމަށް ޝައްކުވެގެން ބެލި ބެލުމުން 2.6 ކިލޯގެ މަސްތުވާތަކެތި ކަސްޓަމްސްއިން އަތުލައިގަތުމަށްފަހު އެ ޤަވާއިދުގެ ދަށުން އޭނާ ރައްޖެއިން ބޭރަށް އަނބުރާ ފޮނުވައިލިކަން ކަސްޓަމާ ހަވާލާދީ ނޫސްތަކުން ރިޕޯޓުކޮށްފައިވާކަމަށް ހަސަން ލަތީފުގެ މައްސަލައިގައި ވަނީ ބަޔާންކޮށްފަ އެވެ. 

Advertisement

މަސްތުވާތަކެތި ޓްރެފިކްކުރަން އުޅުމާއި އެކަމުގައި އެހީތެރިވެދިނުމަކީ އަދި އެކަމުގައި އެއްވެސް ސިފައެއްގައި ބައިވެރިވުމަކީ ކުށެއްކަމަށް އެ ޤާނޫނުގައި ކަނޑައަޅާފައިވާފައި ވާއިރު، އަދި އެކުށުގެ އަދަބެއްގެ ގޮތުން 18 އަހަރަށް ޖަލަށްލުމާއެކު 10 މިލިއަން ރުފިޔާއިން ޖޫރިމަނާކުރެވޭނެކަމަށް ޤާނޫނުގައި ބަޔާންކޮށްފައިވާއިރު، ޤާނޫނުން ކުށެއްކަމަށް ކަނޑައަޅައި އެކަމަށް އަދަބެއް ބަޔާންކޮށްފައި އޮތް ކަމެއް ނަފީވާ ގޮތަށް ޤަވާއިދެއް ހަދައި ތަންފީޒުކުރުމަކީ ޤާނޫނީ ގޮތުން ކުރެވޭނެ ކަމެއް ކަމުގައިނުވާތީ، އެ ޤަވާއިދުގައި ހުރި ޤާނޫނާ ތައާރުޒުވާ ބައިތައް އުނިކުރުމަށް ހަސަން ލަތީފުގެ އެ މައްސަލައިގައި ވަނީ ގޮވާލައްވާފަ އެވެ. 

ހަސަން ލަތީފުގެ އެ މައްސަލަ ބަލައިގަތުމަށް މަޖިލީހުން ނިންމާފައި ވީނަމަވެސް، އެ މައްސަަލަ ބޭރުކޮށްލުމަށް އެމްޑީޕީގެ ވިޕްލައިން ނެރުނުކަމަށް މައްސަލައިގައި ވާހަކަ ދައްކަވަމުން ހަސަން ލަތީފު ވިދާޅުވި އެވެ. އަދި އެ މައްސަލަ ބަލައިނުގަތުމަށް އެމްޑީޕީއިން ތްރީލައިން ވިޕެއް ނެރުމަކީ އިންތިހާއަށް ކަންބޮޑުވާ ކަމެއްކަމަށް އޭނާ ވިދާޅުވި އެވެ. 

އެ މައްސަލައިގައި ވާހަކަ ދައްކަވަމުން ހަސަން ލަތީފު ވިދާޅުވީ ސަރުކާރު ޝާމިލުވާގޮތަށް މަސްތުވާތަކެތި ވިޔަފާރި ކުރުމަކީ ހުއްދަކަމެއްކަމަށް ހެދުމަށް މަސައްކަތް ކުރަމުންދާ ކަމަށެވެ. އަދި ޑްރަގް އެތެރެކުރާ މީހުން އަނބުރާ ފޮނުވާލުމަކީ ދިވެހިރާއްޖެ ބައިވެރިވެރި ވެފައިވާ ބައިނަލްއަގްވާމީ މުއާހަދާތަކާއިވެސް ޚިލާފުކަމެއްކަމަށް އޭނާ ވިދާޅުވިއެވެ.

ހަސަން ލަތީފު ވަނީ މަޖިލީހުގައި އެ މައްސަލައަށް ބަހުސްކޮށް، މެމްބަރުންގެ ޚިޔާލާއެކު އެ މައްސަލައަށް ހައްލު ހޯދުމަށް ގޮވާލައްވާފަ އެވެ. 

އަދި އޭނާ ހުށައެޅުއްވި ކުއްލި މައްސަލަ ބޭރުކޮށްލަން އެމްޑީޕީއިން ވިޕްލައިން ނެރުނު ނަމަވެސް، އެކަމަށް ބެއްލެވުމެއް ނެތި މައްސަލަ ބަލައިގަތުމަށް ވޯޓުދިން އެންމެހާ މެމްބަރުންނަށް ޝުކުރު އަދާކޮށްފަ އެވެ.