އިންޑިއާގެ ނަންބަރު ޕްލޭޓެއް ޖަހައިގެން ހުޅުމާލޭ ދެވަނަ ފިޔަވަހީގެ މަގުތަކުގައި ބޮޑު ލޮރީއެއް ދުއްވާ މަންޒަރު ފެންނަ ފޮޓޯތަކެއް މީސް މީޑިއާގައި ދައުރުވާން ފަށައިފި އެވެ.

ފޮޓޯ ތަކުން ފެންނަ ގޮތުން، ރީނދޫ ކުލައިގެ މި ބޮޑު ލޮރީގެ ކުރިއާއި ފަހަތުގައި ވެސް ރާއްޖޭގެ ރަޖިސްޓްރީ ނަންބަރު ޕްލޭޓުގެ ބަދަލުގައި ހުރީ ޓެމިލްނާޑޫގެ ނަންބަރު ޕްލޭޓެކެވެ.

މީގެ އިތުރުން މި ލޮރީގެ ވީޑިއޯއިން ފެންނަ ގޮތުގައި ލޮރީގެ އަރިމައްޗާއި ކުރިމަތީގައި "ރެނާޓަސް" ޖަހައިފައި ވެއެވެ.

Advertisement

ރެނާޓަސް އަކީ ހުޅުމާލޭގައި މިހާރު އަޅަމުންދާ ބައެއް ފްލެޓްތައް އެޅުމުގެ މަސައްކަތް މިހާރުވެސް ކުރަމުންދާ އިންޑިއާ ކުންފުންޏެކެވެ. އަދި ދާދިފަހުން ގަން އިންޓަނޭޝަނަލް އެއާޕޯޓު ހަދަން ހަވާލުކޮށްފައިވަނީ ވެސް އެ ކުންފުންޏާ އެވެ.

އެއްގަމު ދަތުރުފަތުރުގެ ގާނޫނު ބުނާގޮތުން އާންމު ދަތުރުފަތުރުގެ ނިޒާމުގެ ތެރޭގައި އެއްވެސް އުޅަނދެއް ބޭނުންކުރަންޖެހޭނީ ޓްރާންސްޕޯޓު މިނިސްޓްރީގައި ރަޖިސްޓްރީކޮށްގެންނެވެ. އަދި އެ އުޅަނދު ތަކުގައި ހަރުކޮށްފައި ހުންނަ ޕްލޭޓް ހުންނަން ވަނީޓްރާންސްޕޯޓުން ކަނޑައަޅާ މިންގަނޑަކަށް ހަދައިފައެވެ.