މި ވެރިކަމުގައި މަގުމަތީގައި ބިތްޖެހިފަ ތިބޭ ޒުވާނުން ނިސްބަތުން މަދުކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބުރާހިމް ޝަރީފު (މަވޯޓާ) ވިދާޅުވެއްޖެ އެވެ.
އޭނާ މިފަދައިން ވިދާޅުވެފައިވަނީ ޑްރަގާއި ދެކޮޅަށް މި ސަރުކާރުން ކުރަމުންދާ މަސައްކަތްތަކަށް ތައުރީފުކުރައްވާ ކުރެއްވި ޓްވީޓެއްގަ އެވެ.
އެގޮތުން ޝަރީފު ވިދާޅުވީ މިހާތަނަށް ޑްރަގުގެ ވިޔަފާރި ހުއްޓުވުމަށް އެންމެ ބޮޑު އަދި ކާމިޔާބު މަސައްކަތްތަކެއް ކޮށްދެއްވީ އިބްރާހިމް މުހައްމަދު ޞާލިހުގެ ސަރުކާރުން ކަމަށެވެ. އަދި އެންމެ ގިނަ ޑްރަގު އަތުލާ ނައްތާލީވެސް މި ސަރުކާރުން ކަމަށެވެ.
މި ސަރުކާރުގައި ނިސްބަތުން ބިތްޖެހިފައި ތިބޭ ޒުވާނުންވެސް މަދުކަމަށް އޭނާ ވިދާޅުވި އެވެ.
ކާނިވާ ސްޓޭޖުމަތީގައި ނިދަމުން ދިޔަ ޒުވާނުންތަކެއް/ މިހާރު ފޮޓޯ: 2021
"ޑްރަގް ވިޔަފާރި ހުއްޓުވުމަށް އެންމެ ބޮޑު އަދި ކާމިޔާބު މަސައްކަތެއް ކުރީ އިބޫ ޞާލިހުގެ ސަރުކާރުން. އެންމެ ގިނަ ޑްރަގު އަތުލާ ނައްތާލީވެސް މިވެރިކަމުގައި. މަގުމަތީ ޖެހެން ޖެހެމުން ދިޔަ ޒުވާނުންތައް މިހާރަކު ކުރިން ފެންނަވަރާ ގާތަށްވެސް ނުފެނޭ"
މަރަދޫ ދާއިރާގެ މެމްބަރު އިބުރާހިމް ޝަރީފު (މަވޯޓާ)
ޑްރަގާއި ދެކޮޅަށް ސަރުކާރުން ކުރާ މަސައްކަތްތައް ދިފާއު ކުރައްވާ ޝަރީފު ޓްވީޓު ކުރައްވާފައިވަނީ ދިވެހިރާއްޖެއަށް ވައިގެ މަގުން ޑްރަގު އެތެރެކުރާ މީހުން އަނބުރާ ފޮނުވާ ލެވޭގޮތަށް ހަދާފައިވާ ގަވައިދު އިސްލާހުކުރުމަށް މަޖިލީހަށް ހުށައެޅި ކުއްލި މައްސަލަ ބޭރުކޮށްލުމަށް އެމްޑީޕީގެ ޕީޖީއިން ތްރީލައިން ވިޕް ނެރުމުން އަމާޒުވި ފާޑުކިޔުންތަކާއި ގުޅިގެންނެވެ.
އެމްޑީޕީގެ ޕީޖީއިން އެފަދައިން ވިޕް ނެރުނީ ސަރުކާރުން އަންގައިގެންކަމަށް ބައެއް މެމްބަރުން ވަނީ ތުހުމަތުކޮށްފަ އެވެ.
ރައްޔިތުންގެ މަޖިލީހުގައި ދެކެވުނު ބައެއް ވާހަކަތަކަށްވެސް ޝަރީފު ވަނީ ރައްދުދެއްވާފަ އެވެ.
އެގޮތުން އޭނާ ވިދާޅުވީ މަޖިލިސް ތެރެއިން ފެނިގެން ދިޔައީ ސަރުކާރު ޖަވާބުދާރީ ކުރުވުމަށް މަސައްކަތް ކުރިތަން ނޫން ކަމަށެވެ. އެ ކުއްލި މައްސަލަ މަޖިލީހަށް ހުށައެޅީ ސަރުކާރު ބަދުނާމުކޮށް ފަޟީހަތް ކުރުމަށް ކަމަށް އޭނާ ވިދާޅުވިއެވެ.
ޑްރަގުގެ މައްސަލައަކީ ހައްލުކުރަން ޖެހޭ މައްސަލައެއްކަމަށް އެންމެންވެސް ގަބޫލުކުރާއިރު، އިދިކޮޅު ފަރާތްތަކުން ފަހަރެއްގައި ވެސް މަސައްކަތް ކުރަނީ އެ މައްސަލަ ހައްލުކުރުމަށް ނޫންކަމަށް ޝަރީފު ވިދާޅުވި އެވެ.
މަރަދޫ ދާއިރާގެ މެމްބަރު އިބުރާހިމް ޝަރީފު (މަވޯޓާ)
"ޑްރަގުގެ ވަބާ ރާއްޖޭގައި ފުޅާ ދާއިރާއެއްގައި ފެތުރިފައި އޮތްކަމާއި، އެކަން ހައްލުކުރަން ގިނަ ފިޔަވަޅުތަކެއް އަޅަން ޖެހޭކަމަށް އެންމެން ގަބޫލުކުރޭ. އެހެނަސް އިދިކޮޅު ފަރާތްތަކުން މިކުރަނީ އެއްގޮތަކަށް ވެސް ކަމެއް އިސްލާހުކުރުމުގެ ނިޔަތުގައި ކުރާ މަސައްކަތެއް ނޫންކަން ހިތާމަޔާއެކު ފާހަގަކުރަން"
މަރަދޫ ދާއިރާގެ މެމްބަރު އިބުރާހިމް ޝަރީފު (މަވޯޓާ)
ދިވެހިރާއްޖެއަށް ޑްރަގު އެތެރެކުރާ ބޭރު މީހުން އަނބުރާ ފޮނުވެލޭ ގޮތަށް އޮތް އުސޫލު ބަދަލުކުރުމަށް މަޖިލީހަށް ހުށައެޅި ކުއްލި މައްސަލައަށް ހޫނު ބަހުސެއް ކުރެވިފައިވާއިރު، މެމްބަރުން ވަނީ އެ ގަވައިދު ހެދުމުގައި ޝާމިލުވި ފަރާތްތައް ޒިންމާ ކުރަން ޖެހޭކަން ފާހަގަ ކުރައްވާފަ އެވެ.
އޭގެ އިތުރުން މަޖިލީހުގައި އެ ބަހުސް ފެށުމާއެކު، ގެޒެޓުގައި ޝާއިއުކޮށްފައިވާ އެ ގަވައިދު އަނބުރާ ނަގާފައިވާކަން ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
