މީގެ 10 އަހަރު ކުރިން 10000 މެންބަރުން ހަމަނުވާ ސިޔާސީ ޕާޓީތައް އުވާލުން ހުއްޓުވުމަށް އޭރުގެ ގައުމީ ޕާޓީގެ ފަރާތުން އިމާދު ޞާލިޙު ހުށަހެޅި މައްސަލަ ނުބެލޭނެ ކަމަށް ސުޕްރީމް ކޯޓުން ނިންމާފިއެވެ.

10000 މެންބަރުން ހަމަނުވާ ސިޔާސީ ޕާޓީތައް އުވާލުން ހުއްޓުވުމަށް އޭރުގެ އެޓާނީ ޖެނަރަލްއާއި އިމާދު ވަނީ ސުޕްރިމް ކޯޓަށް ދުސްތޫރީ މައްސަލައެއް ހުށަހަޅާފައެވެ. ނަމަވެސް އެޓަނީ ޖެނަރަލްގެ މައްސަލާގައި 2013 ވަނަ އަހަރު ޤާނޫނުގެ އެ މާއްދާ އުވާލި ނަމަވެސް އިމާދުގެ މައްސަލައާއި މެދު ކޯޓުން ގޮތެއް ނުނިންމައެވެ.

އޭގެ 10 އަހަރު ފަހުން މިއަދު ބޭއްވުނު ޝަރީއަތުގެ މަޖިލީހުގައި ދުސްތޫރީ މައްސަލަތަކުގެ ތެރެއިން ސުޕްރީމް ކޯޓުން ފުރަތަމަ މަރުހަލާގައި ބަލަން ޖެހޭނީ ގައުމުގެ އާންމު މަސްލަހަތު ހިމެނޭ ނުވަތަ ދައުލަތުގެ ދެ ބާރެއްގެ ދެމެދުގައި އުފެދިފައިވާ މައްސަލަތައް ކަމަށް ބެންޗުގެ ރިޔާސަތު ބެލެހެއްޓެވި އުއްތަމަ ފަނޑިޔާރު އަހުމަދު މުއުތަސިމް ވިދާޅުވިއެވެ. އަދި އެ ނޫން ދުސްތޫރީ މައްސަލަތައް ހުށަހަޅަން ޖެހޭނީ ހައި ކޯޓަށް ކަމަށް ގާނޫނުގައި ބުނެފައިވާ ކަމަށް ވެސް ވަނީ ވިދާޅުވިއެވެ.

"މި މައްސަލައިގައި އިމާދު ޞާލިޙުގެ ފަރާތުން ހުށަހެޅި ނުކުތާތަކާއި ހޯދުމަށް އެދުނު ފަރުވާތަކަށް ރިއާޔަތްކުރާއިރު މި މައްސަލައިގައި ދިވެހިރާއްޖޭގެ ކޯޓުތަކުގެ ގާނޫނުގެ 11 ވަނަ މާއްދާގެ ދަށުން ސުޕްރީމް ކޯޓުގެ އަސްލީ އިހްތިސާސް ލިބިގެންވާ މައްސަލައެއްގެ ގޮތުގައި މި މައްސަލަ ސުޕްރީމް ކޯޓުން ކުރިއަށް ގެންދަންޖެހޭ ފަދަ ސަބަބެއް އިމާދު ޞާލިޙުގެ ފަރާތުން ހުށަހެޅިފައިވާ ކަމަކަށް އަހަރުން ނުދެކެން," އުއްތަމަ ފަނޑިޔާރު މުއުތަސިމް ވިދާޅުވިއެވެ.

މީގެ އިތުރުން އުއްތަމަ ފަނޑިޔާރު ވިދާޅުވީ ކޯޓުން މައްސަލަ ބަލައިގަތް ލިޔުމުން އެމައްސަލަ ބަލައިގަތީ ކޯޓުގެ ކޮން މާއްދާއަކާއި ހަވާލާދީގެން ކަމެއް އެނގެން ނެތް ކަމަށެވެ.

މި މައްސަލަ ފުރަތަމަ މަރުހަލާގައި ސުޕްރީމް ކޯޓުން ނުބެލޭނެ ކަމަށް އުއްތަމަ ފަނޑިޔާރުން ނިންމި ރައުޔަށް އެ މައްސަލަ ބަލަން ތިބި ހަތަރު ފަނޑިޔާރުން އިއްތިފާގުން ވަނީ ތާއީދު ކުރައްވާފައެވެ.

އެ މައްސަލަ ބެއްލެވި ބެންޗްގައި ދެން ތިއްބެވީ ފަނޑިޔާރު ޑރ. އަޒްމިރަލްދާ ޒާހިރުއާއި ފަނޑިޔާރު އައިޝާ ސުޖޫން ޒާހިރު އާއި ފަނޑިޔާރު މަހާޒް އަލީ ޒާހިރުގެ އިތުރުން ފަނޑިޔާރު އަލީ ރަޝީދު ހުސައިންއެވެ.