ޕާޓީގެ އިސް މަގާމުތަކުގައި ތިއްބަވައިގެން ޕާޓީގެ އަސާސީ ގަވާއިދާ ހިލާފުވަނީނަމަ، ރަނގަޅު ގޮތަކީ މަގާމުން އިސްތިއުފާ ދެއްވުންކަމަށް އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ ޝަރީފު) ވިދާޅުވެއްޖެއެވެ.

ނުސީދާ ގޮތުން އެމްޑީޕީގެ ރައީސް މުހައްމަދު ނަޝީދަށް އަމާޒު ކުރައްވައި ޝަރީފް ކުރެއްވި ޓުވީޓެއްގައި ވަނީ އެމްޑީޕީގެ ލީޑަރޝިޕްގައި ހިމެނޭ ބައެއް ބޭފުޅުން ޕާޓީގެ މެންބަރުންގެ އަގުލަބިއްޔަތުން ނިންމާ ނިންމުންތަކާދެކޮޅު ހަދައި، ޕާޓީގެ އަސާސީ ގަވާއިދާއި ކަނޑައެޅިގެން ދެކޮޅު ހަދަމުންދާއިރު، އެ ބޭފުޅުންނަށް މަގާމުތަކުގައި ތިބެވިދާނެތޯ ސުވާލު އުފެދޭ ކަމަށް ވިދާޅުވެފައެވެ. 

"ރަނގަޅު ގޮތަކީ މަގާމުން އިސްތިއުފާދެއްވުން" ޝަރީފު ވިދާޅުވިއެވެ. 

ޝަރީފް މިފަދަ ޓުވީޓެއް ކުރައްވާފައި މިވަނީ، އެމްޑީޕީގެ ރިޔާސީ ޕްރައިމަރީގައި ބަލި ގަބޫލުކުރެއްވި ކަމަށް ރައީސް ނަޝީދު ވިދާޅުވި ނަމަވެސް، އެ ނަތީޖާ ގަބޫލު ނުކުރައްވާ ފަދަ މޭރުމަކުން ވާހަކަ ދައްކަވަމުން ގެންދަވާތީ އެވެ. އެގޮތުން، އެމަނިކުފާނު އިންތިޚާބުން ބަލިވީ އެމްޑީޕީ ގެ މެންބަރުން ތަކެއް ވަކިކޮށްގެން އިންތިހާބު ބޭއްވުމުން ކަމަށް ބުނެ، އެމްޑީޕީގެ ތެރެއިން "ފިކުރެއްގެ ދިރުން" ނަމުގައި ވަކި ގޮތްޕެއްވެސް މިހާރު ވަނީ އުފައްދަވާފައެވެ. އަދި އެ ގޮތްޕަށް މެންބަރުންގެ ތާއީދު ހޯއްދެވުމުގެ މަސައްކަތް ވެސް އެމަނިކުފާނު އަންނަނީ ކުރައްވަމުންނެވެ. 

މީގެ އިތުރުން، ރައީސް ނަޝީދު ގެ ފެކްޝަނުގެ ފަރާތުން ވަނީ، ޕްރައިމަރީ އަލުން ބާއްވައި، ރިޔާސީ ޓިކެޓު ރައީސް އިބްރާހިމް މުހައްމަދު ޞާލިހާއި ހަވާލުކުރުން ހުއްޓުވުމަށް ކޯޓް އަމުރެއް ނެރެދެއްވުމަށް އެދި ސިވިލް ކޯޓަށް މައްސަލަ ވެސް ހުށަހަޅައިފަ އެވެ.