ސ މަރަދޫފޭދޫ ގަސްކަރަ މުހައްމަދް އާސިރް އިސްމާއިލް ގެއްލިގެން ހޯދުމަށް ފުލުހުން ކުރަމުންދާ މަސައްކަތުގެ ތެރެއިން ރާއްޖޭގެ ހުރިހާ ރަށެއްވެސް ބަލަމުން އަންނަ ކަމަށް ދިވެހި ފުލުހުން ވިދާޅުވެއްޖެއެވެ.

ފުލުހުން ވިދާޅުވީ އާސިރު ހޯދުމަށް ކުރާ މަސައްކަތް ހުއްޓާނުލާކަމަށާއި ނަމަވެސް އަދި މިހާތަނަށް އެއްވެސް ކުރިއުރުމެއް ލިބިފައި ނުވާ ކަމަށެވެ.

ފުލުހުން މިކަމާއި ގުޅިގެން ނެރުއްވާފައިވާ ބަޔާނެއްގައި ވިދާޅުވީ ފެބުރުއަރީ 04 ވަނަ ދުވަހުގެ 20:19 ހާއިރު މުޙައްމަދު އާސިރު އިސްމާއީލް ބޮޑުތަކުރުފާނު މަގު، ހުޅުމާލެ ފެރީޓާމިނަލް ކައިރިން ހުދުކުލައިގެ ޓެކްސީއެއްގައި އެއާޕޯޓަށް ގޮސް އެއާޕޯޓު ޓާމިނަލަށް ވަންނަކަން ފުލުހުންގެ ސީސީޓީވީ އިން ލިބިފައިވާ ފުޓޭޖްތައް އެނަލައިޒް ކޮށްގެން ހޯދިފައިވާ ކަމަށެވެ.

Advertisement

ނަމަވެސް އާސިރު އެއާޕޯޓަށް ވަތް ސަހަރަހައްދުގައި އިތުރު ކެމެރާއެއް ނެތުމުން، ދެން ދިޔަ ހިސާބެއް މިހާތަނަށް ދެނެގަނެވިފައެއްނުވާ ކަމަށް ފުލުހުން ވިދާޅުވިއެވެ. އެހެންކަމުން، އާސިރު ހޯދުމަށް އެއާޕޯޓް ފަޅުގައިހުރި ހުރިހާ އޮޑިދޯނިފަހަރާއި ލޯންޗްތައް ބަލައި އެ ސަރަހައްދުގައި އާންމުކޮށް އުޅޭ މީހުންނަށް އާސިރުގެ ފޮޓޯ ދައްކައިގެން އެމީހުންނަށް ފެނިފައިވޭތޯ ބަލައި އަދި އެއާޕޯޓްގެ އެކި ސަރަހައްދުތައް ބަލައިފާސްކުރުމުގެ އިތުރުން އެއްވެސް ބުކިންގއެއް ހަދާފައިވޭތޯ ބަލާފައިވާނެ ކަމަށް ވެސް ފުލުހުން ވިދާޅުވެފައިވެއެވެ. .

އެގޮތުން ކުރެވުނު މަސައްކަތުން، އޭނާ ރާއްޖެއިން ބޭރަށް ފުރައިގެން ނުދާކަމާއި އެއްވެސް އެއާލައިނަކުން ރާއްޖޭގެ އެއްވެސް ރަށަށް ނުދާކަން ޔަގީންކުރެވިފައިވާ ކަމަށާއި އޭގެ އިތުރުން، އާސިރު އެއާޕޯޓަށް ދިއުމަށް އެރި ޓެކްސީ ދެނެގަނެ އެ ޓެކްސީގެ ޑްރައިވަރާ ތަހުގީގު ޓީމުން ވަނީ ސުވާލުކޮށްފައި ކަމަށް ވެސް ފުލުހުން ވިދާޅުވެއެވެ..

އަދި މާލެއާއި ހުޅުމާލެއާއި ވިލިމާލެ އަދި މާފުށީގެ ހުރިހާ ގެސްޓުހައުސްތަކާއި އަތޮޅުތެރޭގެ ގެސްޓްހައުސް ތަކުން އޭނާ އެއްވެސް ހިދުމަތެއް ހޯދާފައިވޭތޯ ބެލުމުގެ މަސައްކަތުގެ އިތުރުން، މާލެ ސަރަހައްދުގެ ކައިރި ރަށްރަށް ބަލައި އަދި ރާއްޖޭގެ އެއްވެސް ރަށެއްގައި އާސިރު އުޅޭތޯ ބެލުމުގެ މަސައްކަތްވެސް ފުލުހުން ދަނީ ކުރަމުން ކަމަށް ފުލުހުންގެ ބަޔާނުގައި ވިދާޅުވިއެވެ..

އާސިރު ހޯދުމަށް ދިވެހި ފުލުހުންގެ ޚިދުމަތުން ކުރަމުންދާ މަސައްކަތުގެ އަދާހަމަ ގަވާއިދުން އާއިލާއާއި ހިއްސާކުރަމުން ދާ ކަމަށާއި އާސިރު ނުފެނި ފާއިތުވާ ކޮންމެ ދުވަހަކީ ދިވެހި ފުލުހުން ޚިދުމަތުން ނުހަނު ކަންބޮޑުވާ ދުވަހެއް ކަމަށް ވެސް ބަޔާނުގައި ފުލުހުން ވިދާޅުވިއެވެ..

ފުލުހުން ވިދާޅުވީ އާސިރު ހޯދުމުގެ މަސައްކަތް ތަހުގީގު ޓީމުން ހުއްޓުމެއްނެތި ދަނީ ކުރަމުން ކަމަށެވެ. އާސިރު އާއި ބެހޭ އެއްވެސް މައުލޫމާތެއް ލިބިފައިވާ ފަރާތެއް ވާނަމަ، ފުލުހުންގެ ހޮޓް ލައިން ނަންބަރު 3322111 ނުވަތަ އެންމެ ކައިރި ޕޮލިސް ސްޓޭޝަނަކަށް އަންގައިވައިދެއްވުމަށް ފުލުހުން ވަނީ އެދިފައެވެ. .