އިދިކޮޅުގެ ރިޔާސީ ކެނޑިޑޭޓު ކުރީގެ ރައީސް އަބްދުالله ޔާމީން އަބްދުލް ގައްޔޫމް ޖަލުގައި ބާއްވައިގެން ނުވާނެކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް ކާނަލް ރިޓަޔާޑް މުހައްމަދު ނާޒިމް ވިދާޅުވުމާއި ގުޅިގެން ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގް (ޓޮމް) ބަހުގެ ހަމަލާތަކެއް އޭނާ އަށް އަމާޒު ކުރައްވައިފިއެވެ. 

ނާޒިމް ޓެގް ކުރައްވައި ޓޮމް ކުރެއްވި ޓްވީޓެއްގައި އޭނާ ވަނީ،  ނާޒިމް ބޭނުން ވަނީ ރައީސް ޔާމީނަށް ތާއީދު ކުރާ މެންބަރުންގެ ވޯޓު ނަމަ އެކަމާއި މެދު ހިތާމަ ކުރާކަމަށެވެ.

"ރައީސް ޔާމިން ކުރައްވަނީ ރާއްޖެ މިނިވަންކުރުމުގެ ޖިހާދެކެވެ. އިންޑިޔާ ސިފައިން މިހާރުން މިހާރަށް ފައިބަން ގޮވާލަބަލާށެވެ. ތިހުރި ދިމާލެއް ސާފުވާނީ އޭރުންނެވެ." ޓޮމް ވިދާޅުވިއެެވެ. 

ރޭ އޮތް ނާޒިމްގެ ކެމްޕެއިން ޖަލްސާއެއްގައި ވާހަކަދައްކަވަމުން އޭނާ ވަނީ، ރިޔާސީ އިންތިހާބު ގާތްވެފައިވާއިރު އިދިކޮޅުގެ ލީޑަރު ރައީސް ޔާމީން ޖަލު ހުކުމެއްގައި ހުންނެވުމުން ކަންބޮޑުވާކަމަށް ވިދާޅުވެފައެވެ. ރައީސް ޔާމީނަކީ އިދިކޮޅު ކޮންގްރެސް ކޯލިޝަނުން ކަނޑައަޅާފައިވާ ރިޔާސީ ކެނޑިޑޭޓުކަން ފާހަގަކުރައްވައި ނާޒިމް ވިދާޅުވީ، ރައީސް ޔާމީން ޖަލުގައި އޮންނަވަން ޖެހޭކަމަށް ގަބޫލު ނުކުރާކަމަށެވެ.

ނާޒިމް މިފަދައިން ވިދާޅުވެފައިވާއިރު، އޭނާ އަކީ މީގެ ކުރިން ރައީސް ޔާމީންގެ ސިޔާސަތުތަކަށް ވަރަށް ބޮޑަށް ފާޑުވިދާޅުވި ބޭފުޅެކެވެ. އެހެންކަމުން އިންތިޚާބާއި ދިމާކޮށް ރައީސް ޔާމީންގެ ދިފާއުގައި ނުކުތުމުން ގިނަބައެއްގެ ފާޑުކިޔުންތައް އޭނާ އަށް ވަނީ އަމާޒުވެފައެވެ.