އިންޑިއާގެ އަސްކަރީ ސިފައިން ރާއްޖޭގައި ތިބުމާއި ދެކޮޅަށް އަޑުއުފުލުމަށްފަހު އެ ގައުމަށް ޚިދުމަތް ހޯދަން ދިއުމުން، ބޭރުކޮށްލުމުން ރޯން ޖެހޭ ރުއިމަކީ ރައްޔިތުން ފިލާވަޅު ލިބިގަންނަން ޖެހޭ ކަމެއްގެ ގޮތުގައި ޑިފެންސް މިނިސްޓަރު މާރިޔާ ދީދީ ސިފަކުރައްވައިފި އެވެ.
މާރިޔާ ދީދީ މިފަދައިން ވިދާޅުވެފައިވަނީ ޞަމަދު ޑީޕޯޓުކޮށްލި މައްސަލައިގައި، އޭނާއަށް މަލާމާތް ކުރައްވާ އެމްޑީޕީގެ ޖަލްސާގައި އެކަމަނާ ދެއްކެވި ވާހަކަތަކާއި ގުޅިގެން ފާޑުކިޔުން އަމާޒުވުމުން އެކަމަނާގެ ވާހަކަތައް ދިފާއުކުރައްވާ ކުރެއްވި ޓްވީޓެއްގަ އެވެ.
ރޭގެ ޖަލްސާގައި ވާހަކަދައްކަވަމުން މާރިޔާ ވަނީ އިންޑިއާގެ އިމިގްރޭޝަންގެ ފިނި ކޮޓަރިއެއްގައި ކާން ނުދީ ބެހެއްޓުމުގެ ސަބަބުން ދިމާވި ސިއްހީ މައްސަލަތައް ކިޔައިދީ ޝަމަދު ދެއްކި ވާހަކަތަކަށް މަލާމާތް ކުރައްވާފަ އެވެ. އަދި އެއީ އިންޑިއާގެ އަސްކަރީ ސިފައިންނަށް ގޮންޖަހާ އެމީހުންނާއި ދެކޮޅަށް އަޑުއުފުލާ މީހުންގެ ފެންވަރު ކަމަށް މާރިޔާ ވިދާޅުވެފައިވެ އެވެ.
"ކޮންމެ ރެއަކު ވަރަށް ބާރަށް އަޅުގަނޑުމެންގެ އަވައްޓެރި ގައުމުގެ މިލިޓަރީއާއި ދިމާލަށް އެކި ގޮތްތަކަށް ގޮން ޖައްސަވާ ވާހަކަދެއްކެވި ބޭފުޅުންގެ ތެރޭގައިވެސް އެފައުޖުގެ ކުރީގައި ދިދަ ހިއްަވައިގެން ހުންނަވާ ބޭފުޅެއް.. ތުނބުޅިބާލައްވާ ކުޑަކޮށް ތައްޔާރުވެލައްވައިގެން އާއިލާއާއެކު އެ ގައުމަށް ވަޑައިގެންނެވީ. ދެން ފެނިގެން ދިޔައީ އަނބރާ ވަޑައިގަތްތަން.. ކެމެރާތައް ހުރީ އަޅުވާފަ.. ވިދާޅުވީ މުޅި އުމުރު ތިމަންނާ ހޭދަކުރީ ސިފައިންނާއި ފުލުހުންގެ ތެރޭގައޭ. ދިދަ ހިއްޕަވައިގެން ކުރީގައި ޖަޑިބެއްހެން ހުންނަވާތަން ފެނޭ. ވަޑައިގެން ހޭދަކުރެއްވީ މިލިޓަރީ ކީއްކުރަންތޯ އިމިގްރޭޝަންގެ ފިނި ކޮޓަރިއެއްގައި. އެކަމަކު އަނބުރާ ވަޑައިގެންނެވީ ކީރިތި ކުރައްވަމުން"
ޑިފެންސް މިނިސްޓަރު މާރިޔާ ދީދީ
މާރިޔާގެ އެ މަލާމާތަށް ގިނަ ބަޔަކު ސޯޝަލް މީޑިއާގައި ރައްދުދޭން ފެށުމާއި ގުޅިގެން، އެކަމަނާ ކުރެއްވި ޓްވީޓެއްގައި ވިދާޅުވީ، ޞަމަދުގެ ވާހަކަ ދައްކަން ޖެހުނީ އޭނާ އަކީ އިންޑިއާއަށް އެއްޗެހި ކިޔުމުން ބޭރުކޮށްލި މީހަކަށް ވާތީ ކަމަށެވެ.
ޒަރޫރީ ބޭނުންތަކަށް ދާން ޖެހޭ ގައުމުތަކާއި ދިމާލަށް ހިތުހުރި އެއްޗެއް ނުގޮވުމަށް ނަސޭހަތްތެރިވަމުން ދިޔަ ނަމަވެސް، އެ އަޑު ނާހާ ހިތަށް އައިހާ އެއްޗެއް ގޮވުމަށްފަހު އެ ގައުމަކަށް ދިއުމުން، އެތަނުން ފޮނުވާލުމުން، އެ ރޯންޖެހޭ ރުއިމުގެ ވާހަކަ ދައްކަން ޖެހޭ ކަމަށް މިނިސްޓަރު ވިދާޅުވިއެވެ.
އަދި އެފަދައިން އެ ވާހަކަ ދެއްކީ އެފަދަ ކަމެއް އިތުރު ރައްޔިތަކަށް ވިޔަ ނުދިނުމަށްޓަކައި ކަމަށް މާރިޔާ ވިދާޅުވި އެވެ.
އިންޑިއާ އައުޓު މުޒާހަރާގައި ޞަމަދު ހަރަކާތްތެރި ވަނީ
"އަޅުގަނޑުމެން ޒަރޫނީ ބޭނުންތަކަށް ދާންޖެހޭ ގައުމުތަކަށް ހިތުހުރި އެއްޗެއް ނުގޮވާށޭ ބުނެ ބުނެ ތިއްބާ، ހިތުހުރި އެއްޗެއް ގޮވާފަ ގޮސް އެ ގައުމުތަކަށް އެރީމާ، އެތަނުން ފޮނުވާލީމާ އެ ރޯން ޖެހޭ ރުއިން ފެނި، އެގޮތަށް އިތުރު ރައްޔިތަކަށް ނުވުމަށްޓަކައި އެވާހަކަ ދައްކަން ކެރެން ޖެހޭ"
ޑިފެންސް މިނިސްޓަރު މާރިޔާ ދީދީ
"އިންޑިއާ އައުޓު" ކެމްޕޭނުގައި ބައިވެރިވެ އިންޑިއާ ސިފައިން ތިބުމާއި ދެކޮޅަށް އަޑުއުފުލާ ފަރާތްތަކަށް އިންޑިއާއިން ބޭނުން އަދަބެއް ދިނުމަކީ މައްސަލައެއް ނޫންކަމަށް ދޭހަވާ މޭރުމުން ރޭގެ ޖަލްސާގައިވެސް މާރިޔާ ދީދީ ވަނީ ވާހަކަދައްކަވާފަ އެވެ.
އެވާހަކަތައް ދިފާއުކުރައްވަމުންވެސް އެކަމަނާ ތަކުރާރު ކުރެެއްވީ އިންޑިއާ ސިފައިން ތިބުމާއި ދެކޮޅަށް އަޑުއުފުލާނަމަ އިންޑިއާއިން ބޭނުން އަދަބެއް ދެވިދާނެ ވާހަކައެވެ. އަދި އެކަން ހުރިހާ ރައްޔިތުންވެސް ދަންނަން ޖެހޭނެ ވާހަކައެވެ.
ޑިފެންސް މިނިސްޓަރު މި މޭރުމުން ވާހަކަދައްކަވަމުން ދާތީ ގިނަ ބައެއްގެ ފާޑުކިޔުން އަމާޒުވެފައިވާއިރު، ދިވެހި ސިފައިންގެ ތެރޭގައި އަގުހުރި ޚިދްމަތްތަކެއް ކޮށްދެއްވި އަލީ އިހްސާން ވަނީ މާރިޔާ ދީދީއަށް، އެކަމަނާއަކީ ދިވެހިރާއްޖޭގެ ޑިފެންސް މިނިސްޓަރުކަން ހަނދާން ކޮށްދެއްވާފަ އެވެ.
Advertisement
This content is created and paid for by advertisers and does not involve Voice Journalists
