އިންޑިޔާގެ ރައްޔިތަކާއި ގުޅޭ މައްސަލައެއް ޕްރޮސެކިއުޓަރ ޖެނަރަލްގެ އޮފީހުން ހައި ކޯޓުގައި އިސްތިއުނާފު ކޮށްފައިވަނިކޮށް މޯލްޑިވްސް އިމިޤްރޭޝަނުން އެބިދޭސީ ފަރާތް ޑީޕޯޓްކޮށްފައިވާކަމަށް ބުނެ ފެތުރެމުންދާ ވާހަކަ އިމިޤްރޭޝަނުން ދޮގު ކޮށްފިއެވެ.

އެގޮތުން ކުޑަ ކުއްޖަކަށް ޖިންސީ ގޯނާ ކުރިކަމަށް ތުހުމަތު ކުރެވިފައިވާ އިންޑިޔާގެ ރައްޔިތެއްކަމަށްވާ ރަމޭޝް ސެލްވަމޮނީ ގެ މައްސަލަ ހައި ކޯޓުގައި އިސްތިއުނާފުކޮށް އެ މައްސަލަ ފެށި އިރު އޭނާ ވަނީ ޑިޕޯޓް ކޮށްލާފައެވެ. އެހެންކަމުން އެ މައްސަަލަ ކޯޓުން ވަނީ ބާތިލު ކޮށްފައެވެ.

މިކަމާއި ގުޅިގެން އިމިޤްރޭޝަނުން މިއަދު ނެރުނު ނޫސް ބަޔާނެއްގައި ވަނީ ރަމޭޝް ސެލްވަމޮނީއަކީ ޤާނޫނު ނަންބަރު 2007/1 (ދިވެހި ރާއްޖޭގެ އިމިގްރޭޝަންގެ ޤާނޫނު) އާ ޙިލާފުވުމުގެ ސަބަބުން ރާއްޖެއިން ފުރުވާލެވެންދެން އިމިޤްރޭޝަންގެ ޑިޓެންޝާން ސެންޓަރުގައި 2022 ސެޕްޓެމްބަރު 25 ވަނަ ދުވަހުން ފެށިގެން ބެހެއްޓުނު ފަރާތެއް ކަމަށެވެ.

އަދި 2022 ޑިސެމްބަރު 08 ވަނަ ދުވަހު ރަމޭޝް ސެލްވަމޮނީ ދިވެހި ރާއްޖެއިން ޑީޕޯޓްކޮށްލުމާއި ހަމައަށްވެސް އޭނާއާ ގުޅޭ ޖިނާއީ އެއްވެސް މައްސަލައެއް ދިވެހިރާއްޖޭގެ ކޯޓެއްގައި އިސްތިއުނާފު ކޮށްފައިވާކަން ޕްރޮސެކިއުޓަރ ގެނެރަލް އޮފީހުން ރަސްމީ ސިފައެއްގައި އިމިޤްރޭޝަނަށް އަންގާފައި ނުވާކަމާއި، ރަމޭޝް ސެލްވަމޮނީ ރާއްޖެއިން ފުރުން މަނާކޮށް އެއްވެސް ކޯޓު އަމުރެއް އެ އިދާރާއަށް ލިބިފައި ނުވާ ކަމަށެވެ.