އަރަބިއްޔާ ސްކޫލްގެ ބިންގާ އަދިވެސް ނޭޅޭ ކަމަށް ބުނެ ބެލެނިވެރިން ބާ ޖަމާލުއްދީން ސަރަހައްދަށް އެއްވެ އިހުތިޖާޖު ކުރަން ފަށައިފިއެވެ.
އެގޮތުން މިކަމާއި ގުޅީގެން އަަރަބިއްޔާ ސްކޫލްއިން މިއަދު ކުރި ޓްވީޓެއްގައި ވަނީ 18 މަސް ދުވަހުން މި މަސައްކަތް ނިންމަން ބުނި ކަން ފާހަގަކޮށްފައެވެ.
އެހެންނަމަވެސް 2 މަސްދުވަސް ތެރޭގައި ބާ ޖަމާލުއްދީން ބިން ހުސްކުރާން ވައުދުވެފައިވީނަމަވެސް 7 މަސް ވީ އިރުވެސް އެ ތަން ސާފު ނުކުރެވުނު ކަމަށް ވަނީ ބުނެފައެވެ.
މިކަމުގެ ސަބަބުން އެ ސްކޫލްއިން ވަނީ އިންތިޙާބު ކައިރިވީމާ ވޯޓު ހޯދަން ބިންގާ އަޅުުއްވަން މަޑު ކުރަނީތޯ ސުވާލު އުފެދޭ ކަމަށް ބުނެފައެވެ. އަދި މިއާއިއެކު މިކަން ސިޔާސީ ނުކުރެއްވުމަށް ވެސް އެސްކޫލްއިން ވަނީ ގޮވާލައިފައެވެ.
އަރަބިއްޔާ ސްކޫލް އިމާރާތުގައި ރެނދުލައި، އެތަނުގައި ކިޔެވުމަކީ ދަރިވަރުންނަށް ނުރައްކާތެރި ކަމެއް ކަމަށް ބުނެ މިދިޔަ އަހަރުގެ ފަހުކޮޅު އެ ސްކޫލްގެ ބެލެނިވެރިން އިހުތިޖާޖު ކުރިއެވެ.
އެ އިހުތިޖާޖުތަކާ ގުޅިގެން އެޑިއުކޭޝަން މިނިސްޓްރީން ފުރަތަމަ ނިންމީ އަރަބިއްޔާގެ ކުދިން ވަގުތީ ގޮތުން އިއްޒުއްދީން ސްކޫލަށް ބަދަލު ކުރާށެވެ. ނަމަވެސް އެ ސްކޫލްގެ ބެލެނިވެރިން އެ ނިންމުމާ ދެކޮޅު ހެދުމުން އާ އިމާރާތެއް އަޅަން މާލެއިން ބިމެއް ހޯދުމުގެ މަސައްކަތް ކުރާނެކަން އެޑިއުކޭޝަން މިނިސްޓްރީން ފާހަގަކުރިއެވެ.
އޭގެ ފަހުން، އަރަބިއްޔާ ސްކޫލް އިމާރާތުގެ ބަދަލުގައި އާ އިމާރާތެއް އަޅަން ނިންމެވިކަން ރައީސް އިބްރާހީމް މުޙައްމަދު ޞާލިޙު 2021 ގެ ޑިސެމްބަރު މަހުގެ ތެރޭގައި އިއުލާންކުރެއްވިއެވެ.
އެގޮތުން ސަރުކާރުން ބާ ޖަމާލުއްދީން ބިމުގައި ޖަމާލުއްދީން ސްކޫލުގެ އިތުރު އިމާރާތަކާއި އަރަބިއްޔާ ސްކޫލުގެ އާ އިމާރާތް އެޅުމަށް 168 މިލިއަން ރުފިޔާއަށް އަމިން ކޮންސްޓްރަކްޝަންއާ ހަވާލުކޮށް އެއްބަސްވުމުގައި ސޮއިކޮށްފައިވެއެވެ.
އަރަބިއްޔާ ސްކޫލުގެ ދަރިވަރުން މިހާރު ވަގުތީ ގޮތުން ކިޔަވަމުން ގެންދަނީ ފޮރިން މިނިސްޓްރީ ހިންގި ސޯމިލް އިމާރާތުގައެވެ. އެ އިމާރާތުގައި ގިނަ ދުވަސްތަކެއް ހޭދަކުރަން ޖެހުމަކީ ދަރިވަރުން އަސާސީ އެތައް ހއްގުތަކުން މަހުރޫމުކޮށްގެން ތިބެން ޖެހޭ ކަމެއްކަން ފާހަގަކުރައްވާ އަރަބިއްޔާ ސުކޫލުގެ ބެލެނިވެރިން ވަނީ ބޮޑެތި ކަންބޮޑުވުންތަކެއް ފާޅުކޮށްފައެވެ.
Advertisement
This content is created and paid for by advertisers and does not involve Voice Journalists
