ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގެ ފައިނަލުގައި 1-0 ގެ ނަތީއްޖާއަކުން ނޭކުރަންދޫ ބަލިކޮށް، ހދ އަތޮޅުގެ ޗެމްޕިއަންކަން ފަސް ވަނަ ފަހަރަށް ނައިވާދޫ އިން ހޯދައިފިއެވެ. 

އެންމެ ފަހުގެ އަތޮޅު ޗެމްޕިއަން، ނައިވާދޫ ފައިނަލުން ޖާގަހޯދީ ސެމީ ފައިނަލުގައި 3-1 ގެ ނަތިއްޖާއަކުން ކުމުންދޫ މައްޗަށް ކުރިހޯދައިގެންނެވެ. އަދި ނޭކުރެންދޫ އިން ފައިނަލުގެ ފުރުސަތު ހޯދީ ސެމީ ފައިނަލުގައި ނެއްލައިދޫ އަތުން 2-1 ގެ ނަތީއްޖާއަކުން މޮޅުވެގެންނެވެ. އަދި ގުރޫޕް ސްޓޭޖުގައި މި ދެޓީމު ވާދަކުރި މެޗު ކާމިޔާބުކުރީ ނައިވާދޫ އިންނެވެ.

މިރޭގެ ފައިނަލު މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގައި ފެނިގެންދިޔަ ހަމައެކަނި ލަނޑު ފުރަތަމަ ހާފުގެ 10 ވަނަ މިނެޓުގައި ކާމިޔާބުކޮށްދިނީ ނައިވާދޫ ޓީމުގެ ޖޯޒީ ނަމްބަރު 97، އަބްދުﷲ ޝާފިއު (ޝާއްޕެ) އެވެ. މިއާއެކު މެޗު ނިމިގެން ދިޔައީ ދެޓީމުންކުރެ ޓީމަކަށް އިތުރު ލަނޑެއް ކާމިޔާބުނުކުރެވި 1-0 ގެ ނަތީއްޖާއަކުން ނައިވާދޫ މޮޅުވެގެންނެވެ. މިއީ މި މުބާރާތުގެ އަތޮޅު ޗެންޕިއަންކަން ނައިވާދޫ އިން ހޯދި ފަސް ވަނަ ފަހަރެވެ. މީގެ ކުރިން އެޓީމުން ވަނީ ހދ. އަތޮޅުގެ ޗެންޕިއަންކަން 2016، 2018, 2019, އަދި 2022 ވަނަ އަހަރު ހޯދާފައެވެ.

Advertisement

މިރޭގެ ފައިނަލު މެޗުގެ މޮޅު ކުޅުންތެރިއަކަށް ހޮވުނީ ފައިނަލް މެޗުގައި ފެނިގެންދިޔަ ހަމައެކަނި ލަނޑު ކާމިޔާބުކޮށްދިން އަބްދުﷲ ޝާފިއު (ޝާއްޕެ) އެވެ. މީގެ އިތުރުން މުބާރާތުގެ އެންމެ މޮޅު ކުޅުންތެރިއާގެ މަޤާމާއި އެންމެ ގިނަ ލަނޑުޖެހި ކުޅުންތެރިއާގެ މަޤާމު ވެސް ލިބުނީ މި މުބާރާތުގައި ނައިވާދޫ ޓީމަށް ހަތް ލަނޑު ކާމިކާބުކޮށްދިން  އަބްދުﷲ ޝާފިއު (ޝާއްޕެ) އަށެވެ.