ހުރިހާ ރަށެއްގެ މީހުންނަށް ވެސް މިލަދުންމަޑުލު ދެކުނުބުރީ ފޮއްދޫން ގޯތި ލިބޭ ގޮތައް އެރަށުން ގޯތި ދޭ އުސޫލު އާއްމު ކޮށްފިއެވެ.

ފޮއްދޫ ކައުންސިލުން ކޮށްފައިވާ އިއުލާނެއްގައި ބުނީ ދިރިއުޅުމަށް ބަންޑާރަ ގޯތި ބޭނުންވާ ފަރާތްތަކަށް އެ ރަށުން ގޯތި ދޫކުރުމަށް ހަމަ ޖައްސާފައިވާ ކަމަށެވެ. އެގޮތުން ދޫކުރާ ގޯތީގެ ބޮޑުމިނަކީ 2000 ( ދެހާސް ) އަކަފޫޓު ކަމަށާ މިފަހަރު ދޫކުރަން ހަމަ ޖެހިފައިވަނީ 30 ( ތިރީސް ) ގޯތި ކަމަށްވެސް ބުނެފައިވެއެވެ. 

ދިރިއުޅުމަށް ބަންޑާރަ ގޯތި ބޭނުންވާ ފަރާތްތަކަށް ގޯތި ދޫކުރުމުގައި ބަލާނެ ކަންކަން؛

1) ދިވެހިރައްޔިތަކަށް ވުން

2) ޢުމުރުން 18 ( އަށާރަ ) އަހަރު ވެފައިވުން

3) ބަންޑާރަ ގޯއްޗެއް ނުވަތަ އަމިއްލަ ގޯއްޗެއް އެމީހެއްގެ ނަމުގައި ، ނުވަތަ އަނބިމީހާ ، ނުވަތަ ފިރިމީހާގެ ނަމުގައި ރަޖިސްޓްރީ ވެފައި ނެތުން.

4) އަމިއްލަ ނުވަތަ ބަންޑާރަ ގޯއްޗެއްގައިވާ ނުއުފުލޭ މުދަލުން ، ލިބިގެން އެފަދަ ގޯއްޗަކުން 600 ( ހަސަތޭކަ ) އަކަފޫޓް އަށްވުރެ ބޮޑު ބައެއް ލިބިފައި ނުވުން.

5) ސަރުކާރުން ހަދާ ފްލެޓެއް ނުވަތަ ހައުސިން ޔުނިޓެއް އެމީހެއްގެ ނަމުގައި ރަޖިސްޓްރީ ވެފައި ނެތުން

6) އެއްމެދު އިމާރާތެއް ފްލެޓެއް ނުވަތަ ހައުސިން ޔުނިޓެއް އެމީހެއްގެ ނަމުގައި ރަޖިސްޓްރީ ވެފައިނެތުން.

މަތީގައިވާ ޝަރުތު ހަމަވާ ފަރާތްތަކުން 13 ފެބްރުއަރީ 2023 ( ހޯމަ )ފެށިގެން 24 އެޕްރީލް 2023 ވާ ( ހޯމަ ) ދުވަހުގެ 13:00 ގެ ނިޔަލަށް " ދިރިއުޅުމަށް ބަންޑާރަ ގޯއްޗަށް އެދޭ ފޯމް " ފުުރިހަމަ ކުރެއްވުމަފަހު ފޮއްދޫ ކައުންސިލްްގެ ފޯމް ހުށަހެޅުމަށް އެ ކައުންސިލުން ވަނީ އެދިފައެެވެ. އަދި މެއިލް އާއި ފެކްސް އިން ފޮނުއްވާ ފޯމް ބަލައިގަތުުމަށް ހަމަޖެހިފައި ނުވާ ކަމަށްވެސް އެކައުންސިލުން ބުނެފައިވެއެވެ. 

ހަމައެހެންމެ، ފުރިހަމަ ނުކޮށް ހުށައަޅުއްވާ ފޯމް އާއި ހުށައަޅަންޖެހޭ ތަކެތި ހަމަ ނުކޮށް ހުށަހަޅާ ފޯމްވެސް ބަލައި ނުގަންނާނެކަމަށް އެ ކައުންސިލްގެ އިއުލާނުގައި ވެއެވެ.

ގޯއްޗަށް އެދޭ ފޯމް ބަލައިގަތުން ހަމަޖެހިފައިވަނީ ރަސްމީ ބަންދުނޫން ކޮންމެ ދުވަހެއްގެ ހެނދުނު 8:30 އިން މެންދުރު ފަހު 13:30 ދެމެދު ކަމަށްވެސް ބުނެފައިވެއެވެ.