އަމީނީ މަގު ހެދުމުގެ މަސައްކަތް ކުރިއަށްދަނީ އެންވައިރަމެންޓަލް އިމްޕެކްޓް އެސެސްމެންޓް (އީއައިއޭ) ރިޕޯޓް އާއި އެއްގޮތަށް ކަމަށް ޕްލޭނިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވަނީ އަމީނީ މަގު ހެދެމުންދަނީ ކޮންސަލްޓެންޓްގެ ލަފައާއި އެއްގޮތަށް ތޯ އާއި އެ މަގުގައި ފެންބޮޑުވުމުގެ މައްސަލަ ހައްލުކުރުމަށް އޮތް ޕްލޭން އަކީ ކޮބައިތޯ ސުވާލު ކުރައްވާފަ އެވެ. 

ހެންވޭރު ހުޅަނގު ދާއިރާގެ މެންބަރު ހަސަން ލަތީފް މިނިސްޓަރު އަސްލަމާއި ސުވާލު ކުރައްވަނީ: ފޮޓޯ/ މަޖިލިސް 

ހަސަން ލަތީފްގެ ސުވާލަށް ޖަވާބުދެމުން އަސްލަމް ވިދާޅުވީ، އަމީނީ މަގުގައި މިހާރުވެސް ފެން ބޮޑުވާ ކަމަށް އާއިއޭ ރިޕޯޓްގައި ފާހަގަކޮށްފައިވާ ކަމަށާއި ހައްލު ހޯދުން މުހިއްމު ކަމެއްގެ ގޮތުގައި ބަޔާން ކޮށްފައިވާ ކަމަށެވެ. އަދި، އެ މަގުގެ އީއައިއޭގައި ބުނަނީ އެ ރިފޯޓް ހެދިއިރު މަގުގެ ޑްރެއިނޭޖް އާއި ބެހޭ ހުރިހާ ތަފްސީލެއް ލިބެން ނެތުމުން އޭގެ ނަތީޖާ ލިބެން ޗެލެންޖިން ކަމަށްވެސް އޭނާ ވިދާޅުވި އެވެ. 

އެއާއެކު އަސްލަމް ވަނީ އެ މަގުގެ ފެން ބޮޑުވުމުގެ މައްސަލަ ހައްލުކުރުމަށް، އަލަށް ހެދެމުންދާ މަގުގައި ކުރެވެމުންދާ މަސައްކަތްތަކުގެ ތަފްސީލް ދެއްވާފައެވެ. 

އެގޮތުން ވިދާޅުވީ، އަމީނީ މަގުގައި މިހާރު އަޅާފައިވާ ފެންހިންދާ ނިޒާމަކީ ގްރެވިޓީ ފްލޯއަކުން މަގުމައްޗަށް އެޅޭފެން، ޕަމްޕް ސްޓޭޝަން ތަކަށް ގޮސް އެ ޕަމްޕް ސްޓޭޝަން ތަކުން ޕަމްޕް އައުޓް ކުރާގޮތަށް ހަދާފައިވާ ނިޒާމެއް ކަމަށެވެ. އަދި މިހާރު ފެން ހިންދުމަށް ބޭނުންކުރާ ނިޒާމްގެ ގްރެވިޓީ ފްލޯގައި ފެން ފްލޯކުރުމަށް އަޅާފައިހުރި ހޮޅިތަކުގެ ޑައިމީޓަރަކީ 150 މިލިމީޓަރާއި 300 މިލިމީޓަރުގެ ޑައިމީޓަރު ކަމަށް އަސްލަމް ވިދާޅުވިއެވެ. އަދި ޕަމްޕް ސްޓޭޝަން ތަކުން ބޭރުކުރުމަށް 160 މިލިމީޓަރާއި 280 މިލިމީޓަރާއި ދެމެދުގެ ޑައިމީޓަރުގެ ހޮޅި އަޅާފައިވާ ކަމަށް އަސްލަމް ވިދާޅުވިއެވެ.

މިއާއެކު އަސްލަމް ވިދާޅުވީ, އައު ސްޓޯމް ވޯޓަރ ނިޒާމްގައި ގްރެވިޓީ ފްލޯގެ ހޮޅިތައް 315 ޑައިމީޓަރަށް ބޮޑުކޮށްފައިވާއިރު، ފަމްޕް ކުރާ ހޮޅިތައް 314 ޑައިމީޓަރަށް ބޮޑުކޮށްފައިކަން ފާހަގަކުރައްވާފައެވެ. އަދި މިވަގުތު ހުރި ޕަމްޕް ތަކުގެ ކެޕޭސިޓީ އަކީ 9 ކިލޯވޯޓް ކަމަށްވީނަމަވެސް މަޝްރޫއު ނިމިގެންދާއިރު އެއަދަދު 21 އަށް ބޮޑުކުރެވިގެން ދާނެ ކަަމަށް އޭނާ ވިދާޅުވި އެވެ.

"އޭރުން ގަޑިއަކު 1000 ކިއުބިކް މީޓަރުގެ ފެން މި ޕަންޕު ސްޓޭޝަން ތަކުން ބޭރުވާނެ. އެހެންވީމަ، އީއައިއޭ ހެދިއިރު މިތަފްސީލްތައް ނެތީމަ، އީއައިއޭ ހެދި ކޮންސަލްޓެންޓް ފާހަގަކޮށްފައިވަނީ މިކަމަށް ރަނގަޅަށް އެޑްރެސްކުރަން އެބޭފުޅުން ލަފާދެއްވާފައިވަނީ. އެ ލަފައާއި އެއްގޮތަށް މިހާރު މަސައްކަތް ދާ ކަމަށް އަޅުގަނޑު މިހާރު ގަބޫލުކުރަން." އަސްލަމް ވިދާޅުވި އެވެ.