ރ ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން ދައުވާކޮށްފައިވާ ފަރާތްތަކުން އެދިލައްވާފައިވާގޮތަށް ހެކި ރައްކާތެރިކުރުމުގެ އަމުރެއް ނެރެދެވެން ނެތްކަމަށް އެ މައްސަލަ ބައްލަވާ ކްރިމިނަލް ކޯޓުގެ ގާޒީ އަލީ ނަދީމް ނިންމަވައިފި އެވެ.

ފުއްގިރި މައްސަލައިގެ އެންމެ ފަހުން ބޭއްވި އަޑުއެހުމުގައި، ދައުވާ އުފުލާފައިވާ ކްރިކް ރިޒާ އަދި ސަންގެ ދެ ކުންފުނީގެ ފަރާތުންވެސް ވަނީ ހެކި ރައްކާތެރިކުރުމުގެ އަމުރަކަށް އެދިފަ އެވެ.

އެކަމާއި ގުޅޭގޮތުން މިއަދުގެ އަޑުއެހުމުގައި ގާޒީ ނަދީމު ވިދާޅުވީ ހެކި ރައްކާކުރުމުގެ އަމުރެއް ނެރެދޭން ޖެހޭފަދަ މަގުބޫލު ސަބަބެއް ބަޔާންކުރެވިފައި ނުވާތީ އެފަދަ އަމުރެއް ނެރެދެވެން ނެތް ކަމަށެވެ.

Advertisement

ކްރިކް ރިޒާގެ ފަރާތުން ހެކި ރައްކާތެރިކުރުމުގެ އަމުރަކަށް އެދިފައިވަނީ، ތަހުގީގުގެ ބޭރުން އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު އެ މައްސަލާގައި ދައުވާކޮށްފައިވާ ކްރިކް ރިޒާއާ ބައްދަލުކޮށް ދައްކާފައިވާ ވާހަކަތަކުގެ އޯޑިއޯއެއް ސިއްރުކޮށްދިނުމަށެވެ.

ސަން އިންވެސްޓްމަންޓުން އެދިފައިވަނީ އެތެރޭގެ ތަހުގީގަކަށް އެ ކުންފުނީގެ ވެރިޔާ އަދި ދ. މީދޫ ދާއިރާގެ މެންބަރު އަހުމަދު ސިޔާމް ދިން ބަޔާނަކާއި، އެ ކުންފުނީގައި މަސައްކަތް ކޮށްފައިވާ ބިދޭސީ ބައެއް މީހުން ދީފައިވާ ބަޔާންތަކަކާއި ޑިރެކްޓަރުންގެ ބޯޑުގެ ބައެއް ގަރާރުތަކަށް ސިއްރުކޮށްދިނުމަށް އަމުރު ނެރެދިނުމަށެވެ.

ދައުލަތުގެ ފަރާތުންވެސް ވަނީ ހެކި ރައްކާކުރުމުގެ އަމުރަކަށް އެދިފައެވެ. އެހެން ނަމަވެސް، އެ ހުށައެޅުމާއި ގުޅިގެން ގާޒީ ވަނީ ދައުލަތުން އެދުނު މިންވަރަށް އެ އަމުރު ނެރެދެވެން ނެތްކަމަށެވެ.

އެއާއެކު ޒާތީ މައުލޫމާތުތަކާއި ތަހުގީގަށް ހުރަސް އެޅޭ ފަދަ މައުލޫމާތުތައް އުނިކުރުމަށް ފަހު އެ ލިޔެކިޔުންތައް ދިފާއުއަށް ދޫކުރުމަށް ގާޒީ ވަނީ އަންގާފައެވެ.

ފުއްގިރި މައްސަލައިގައި ދައުލަތުން ވަނީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ދެ ދައުވާއެއް އުފުލާފައެވެ. އޭގެ އިތުރުން މީދޫ ދާއިރާގެ މަޖިލިސް މެންބަރު އަހްމަދު ސިޔާމް (ސަން)ގެ ދެ ކުންފުންޏަކާއި ކުރިކް ރިޟާގެ މައްޗަށް ދައުވާކޮށްފައި ވެއެވެ.

ފުއްގިރި މައްސަލައިގެ އަޑުއެހުންތައް ކްރިމިނަލް ކޯޓުގައި ކުރިއަށް ދާއިރު، ރައީސް ޔާމީންގެ މައްޗަށް ވަނީ ވ އާރަށުގެ މުއާމަލާތާއި ގުޅިގެން އުފުލި ދައުވާތައް ސާބިތުވާކަމަށް ކަނޑައަޅާ 11 އަހަރުގެ ޖަލު ހުުކުމެއް ކޮށްފަ އެވެ.

އެހެން ނަމަވެސް އެމަނިކުފާނުގެ ފަރާތްޕުޅުން އެ މައްސަލަ މިހާރުވަނީ ހައިކޯޓުގައި އިސްތިއުނާފުކޮށްފަ އެވެ.