ދައުލަތުގެ ދަރަނި 113 ބިލިއަން ރުފިޔާއަށް އަރާފައިވާއިރު ދައުލަތަށް މި އަހަރު އާމްދަނީގެ ގޮތުގައި ލިބޭނެ ކަމަށް ލަފާކޮށްފައިވަނީ 29 ބިލިއަން ރުފިޔާ ކަމަށާ، އެވަރުން ދެކޮޅު ޖައްސާނީ ކިހިނެއްތޯ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބް ސުވާލު ކުރައްވައިފި އެވެ.
މަޖިލީހުގެ މިއަދުގެ ޖަލްސާގައި ދަރަނި ރީސްޓްރަކްޗާ ކުރުމަށް ސަރުކާރަށް ދީފައިވާ ލަފާ ތަންފީޒު ކުރުމަށް ގޮވާލައި ގަލޮޅު އުތުރު ދާއިރާގެ މެންބަރު އީވާ އަބްދުالله ހުށަހެޅުއްވި ގަރާރުގެ ބަހުސް ވަނީ ކުރިއަށް ގެންގޮސްފަ އެވެ.
އީވާގެ ގަރާރަށް ތާއީދު ކުރައްވައި ވާހަކަދައްކަވަމުން އިލްޔާސް ވަނީ، އެ ގަރާރަކީ 2020 ވަނަ އަހަރުގެ އޮކްޓޯބަރު މަހުގައި މަޖިލީހުގެ ހުރިހާ މެންބަރުންގެ ވޯޓާއިއެކު ފާސްވެފައިވާ ގަރާރެއް ކަމަށާ، އަލުން އެ ގަރާރު ހުށަހަޅުއްވާފައި ވަނީ އެ ގަރާރު ތަންފީޒު ނުކުރާތީ ކަމަށެވެ.
އެއާއެކު އިލްޔާސް ވިދާޅުވީ، ދައުލަތުގެ ދަރަނި އިންތިހާއަށް މައްޗަށް ދިޔުމަކީ ދިވެހި ރައްޔިތުންނާއި ވިޔަފާރިވެރިން ނުހަނު ކަންބޮޑުވާ ކަމެއް ކަމަށެވެ.
"ދައުލަތުގެ ދަރަނި އިންތިހާއަށް މައްޗަށް، އިންތިހާއަށް މައްޗަށް، ދާ ދިޔުން މިއީ އަޅުގަނޑުމެން އެންމެންވެސް ކަންބޮޑުވާ ކަމެއް. ކޮންމެ ވިޔަފާރި ވެރިއެއްވެސް، ކޮންމެ ގެއަކުންވެސް، އެ ގެއެއްގެ ދަރަނި މަހުން މަހަށް މައްޗަށްދާ ކަމަަށް ވަންޏާ، އެ ވިޔަފާރި އަކާއި ގުޅިގެން ކަންބޮޑުވާ މީހެއް، އެގޭ ކަންތަކާއި ގުޅިގެން ކަންބޮޑުވާ މީހެއްގެ ބޮލުގައި ރިއްސާނެ. ނުވެސް ނިދޭނެ."
ހުޅުދޫ ދާއިރާގެ މެންބަރު އިލްޔާސް ލަބީބް
މިއާއެކު އިލްޔާސް ވިދާޅުވީ، މި ހިނގަމުންދާ 2023 ވަނަ އަހަރު ދިވެހި ދައުލަތަށް އާމްދަނީގެ ގޮތުގައި ލިބޭނެ ކަމަށް ލަފާކޮށްފައިވަނީ 29 ބިލިއަން ރުފިޔާ ކަމަށެވެ. އެހެން ނަމަވެސް، ދައުލަތުގެ ދަރަނީގެ ގޮތުގައި މިހާރުވެސް 113 ބިލިއަން ރުފިޔާ އޮތް ކަމަށާ، އާމްދަނީއަށްވުރެ ދަރަނި ބޮޑު އިރު، ދެކޮޅު ޖައްސާނީ ކިހިނެއްތޯ ވެސް އޭނާ ސުވާލު ކުރެއްވި އެވެ.
"މި ދައުލަތަށް އާމްދަނީއެއްގެ ގޮތުގައި 2023 ވަނަ އަހަރު ލިބޭނެ ކަމަށް އަންދާޒާ ކޮށްފައި އޮތީ އޮނަ ތިރީސް ބިލިއަން ރުފިޔާ. އަޅުގަނޑު މެންގެ ދަރަނި ކިހާވަރެއްތޯ މި ބަލަނީ 2023 ވަނަ އަހަރު. ބަލާއިރު އިންނަނީ 113 ބިލިއަން ރުފިޔާ. 113 ބިލިއަން ރުފިޔާ އަޅުގަނޑުމެންގެ ދައުލަތުގެ ދަރަނި އަރައިފި. 113 ބިލިއަން ރުފިޔާ އަޅުގަނޑުމެންގެ ދައުލަތުގެ ދަރަންޏަށް އަރާފައި އާމްދަނީ 29 ބިލިއަން ވީމާ ކިހިނެއްތޯ އަޅުގަނޑުމެން ދެކޮޅު ޖައްސާނީ. ކިހިނެއްތޯ ދައުލަތް ހިންގަނީ ވިސްނަންޖެހޭ.
ހުޅުދޫ ދާއިރާގެ މެންބަރު އިލްޔާސް ލަބީބް
އިލްޔާސް ވިދާޅުވީ، އެކަން ހައްލު ކުރުމަށް ކުރަންޖެހޭ މަސައްކަތް ކުރަންޖެހޭ ކަމަށާ, ހައްލު ނުކޮށް ހަޅޭފަޅޭ ޖެހިޔަސް ނުވާނެ ކަމަށެވެ.
އަދި ދަރަންޏަށް ނަގާފައިވާ 113 ބިލިއަން ރުފިޔާގެ ތެރެއިން 60 ބިލިއަނަކީ ރާއްޖޭގެ މާކެޓް ތަކުން ދައުލަތް ހިންގުމަށް ނަގާފައިވާ ފައިސާ ކަމަށެވެ. އެފަދައިން ރާއްޖޭގެ ބޭންކުތަކުން ދައުލަތް ހިންގުމަށް ފައިސާ ނެގުމުން، އަމިއްލަ ވިޔަފާރިވެރިން ވިޔަފާރި ހިންގުމަށް ބޭންކުތަކަށް ފައިސާ ނުދެވޭ ކަމަށްވެސް އިލްޔާސް ވިދާޅުވި އެވެ.
މި 60 ބިލިއަން ރުފިޔާގެ ތެރެއިން 40 ބިލިއަން ރުފިޔާ ޕްރައިވެޓް ސެކްޓާ ކުރިއަރުވަން ދީފައި އޮތް ނަމަ، ޕްރައިވެޓް ސެކްޓާ ކުރިއަރައިގެން ދިޔައީސް. ސިންގަޕޫރު މުއްސަނދި ގައުމަކަށް ވެފައި އޮންނަނީ ސިންގަޕޫރުގެ ސަރުކާރުން ބޭންކުތަކުގައި ހުންނަ ލާރި، ޓީ ބިލް އާއި އަނެކެއްޗަކާއި، އަނެކެއްޗެއްގެ ނަގާފައި އެ ބޭނުން ކުރާތީއެއް ނޫނޭ. އެ ގައުމުގައި ހުރި ވިޔަފާރިވެރިން ވިޔަފާރިތައް ކުރިއަރުވާ، އެމީހުންގެ އާމްދަނީ އިތުރު ކުރެވޭނެ ގޮތްތައް ހޯދައިގެން. ހެސްކިޔާފައި ފައިސާ ޗާޕް ކޮށްފައި، އެ ލާރި ބަހައިގެންނެއް ނޫނޭ.
ހުޅުދޫ ދާއިރާގެ މެންބަރު އިލްޔާސް ލަބީބް
އިލްޔާސް ވިދާޅުވީ ރާއްޖޭގެ ދަރަނި އިންތިހާއަށް މައްޗަށް ދިޔުމުގެ ސަބަބުން ރާއްޖެއަށް ލޯނު ދޭނެ ގައުމެއް ވެސް ނުވާ ކަމަށާ، އޭގެ ނަތީޖާއެއްގެ ގޮތުން އިތުރަށް ފައިސާ ޗާޕް ކުރަންޖެހި، އިންފްލޭޝަން މައްޗަށް ގޮސް ޓެކްސް ވެސް ބޮޑު ކުރަން ޖެހިގެންދިޔަ ކަމަށެވެ. އަދި މިފަދަ ކަންކަމަކީ ނުހަނު ކަންބޮޑުވާ ކަމެއް ކަމުގައިވެސް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
