ޒިންމާދާރުކަމާއިއެކު މީޑީއާތަކުން ޚަބަރު ގެނެސްދިނުމަށް ބެންކް އޮފް މޯލްޑިވްސް (ބީއެމްއެލް) އިން އެދެފިއެވެ.

ބީއެމްއެލް އިން މިހެން އެދިފައިވަނީ އޮންލައިން މީޑިއާއަކުން އިއްޔެ ޝާއިއު ކޮށްފައިވާ ޙަބަރަކާއި ގުޅިގެން މިއަދު ކޮށްފައިވާ ޓްވީޓެއްގައެވެ.

އެގޮތުން އެ ނޫހުން ނެރެފައިވާ ޚަބަރުގައި ވަނީ މީހެއްގެ އެކައުންޓުގައި ހުރި 1 މިލިއަން ރުފިޔާ އެމީހާއަށް ނޭނގި ޓްރާންސްފަރކޮށް ވިޔަފާރިކޮށް ހުސްކޮށްލައި ބޮޑު ސްކޭމެއް ހިނގާފައި ކަމަށެވެ.

Advertisement

މިޚަބަރުގައިވާ މައުލޫމާތު ދޮގުކޮށް ބީއެމްއެލް އިން ވަނީ އެ ބޭންކުން އެދެނީ މީޑިއާއިން ޒިންމާދާރުކަމާއިއެކު ޚަބަރު ގެނެސްދިނުމަށް ކަމަށް ބުނެފައެވެ.

ދާދި ފަހުން ވެސް ސޯޝަލް މީޑިއާގައި ބީއެމްއެލްގެ ކާޑުތަކުގެ މައުލޫމާތު ހާމަވެފައިވާކަމަށް ބުނެ ދެކެވެމުންދާ ވާހަކަތަކާ ގުޅޭ ގޮތުން އެ ބޭންކުން ވަނީ ބަޔާނެއް ނެރެފައެވެ. އެގޮތުން، އެ ބޭންކް އިން ކަސްޓަމަރުންގެ ކާޑުގެ ނުވަތަ ކަސްޓަމަރެއްގެ އެއްވެސް އެހެން މައުލޫމާތެއް އާންމު ނުވާނެ ކަމަށް އެބެންކުން ވަނީ ބުނެފައެވެ.

އެހެން ނަމަވެސް ބައެއްފަހަރު ސްކޭމް ހިންގާ ފަރާތްތަކުން ދުނިޔޭގެ އެކި ކަންކޮޅުތަކުގައި މަރޗަންޓުންނާއި އީކޮމަރސް މަރޗަންޓުންގެ ޕޭމަންޓް ސިސްޓަމަށް ވަދެ ކަސްޓަމަރުންގެ ކާޑުގެ މައުލޫމާތުތައް ވަގަށް ނަގާ ކަމަށާ، މިފަދަ ގޮތަށް ކާޑުގެ މައުލޫމާތު އާންމުވާ ހާލަތްތަކުގައި މުޅި ދުނިޔެއަށް ބަލާއިރު އެތައް މިލިއަން ކަސްޓަމަރުންނަށް އޭގެ އަސަރުކުރާ ކަމަށެވެ.

ބީއެމްއެލް އިން ބުނީ، ކަސްޓަމަރުން ރައްކާތެރިކުރުމަކީ ބޭންކުން އެންމެ އިސްކަންދޭ ކަމަކަށް ވީހިނދު، ބޭންކުން އަންނަނީ ކާޑުގެ ރައްކާތެރިކަން ކަށަވަރުކޮށް އަދި ކާޑުގެ މައުލޫމާތު ހާމަވެދާނެފަދަ އަމަލެއް ހިނގަމުންދޭތޯ އަބަދުވެސް މޮނިޓަރުކުރަމުން ކަމަށެވެ.