ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގެ، ރ. އަތޮޅު ލީގު ބުރުގެ ފަހު މެޗުގައި މިރޭ އިނގުރައިދޫއާއި ދުވާފަރު ވާދަކުރާ އިރު މި ދެޓީމު ވެސް ވަނީ ކުޅުނު ތިން މެޗުން މޮޅުވެ ފައިނަލުން ޖާގަހޯދާފައެވެ. 

މިރޭގެ މެޗަށް މި ދެޓީމު ނުކުންނައިރު ޕޮއިންޓްގެ ގޮތުން ދެޓީމު އެއްވަރުވި ނަމަވެސް ގޯލްގެ ތަފާތުން ކުރި ލިބެނީ އިނގުރައިދޫއަށެވެ. އަދި މިރޭގެ މެޗު އެއްވަރުކޮށްލައިގެންވެސް ލީގު ބުރުގެ އެއްވަނައިގައި ނިންމާލުމުގެ ފުރުސަތު އިނގުރައިދޫއަށް އެބައޮތެވެ. ނަމަވެސް ލީގު ބުރުގެ އެއްވަނަ މަޤާމް ހޯދަން ބޭނުންނަމަ ދުވަފަރަށް މިރޭގެ މެޗުން މޮޅުވުން ނޫން ގޮތެއްނެތެވެ.

އަވައްޓެރި މި ދެ ރަށަކީ ފުޓްސަލްގައި ވަރަށް ވާދަވެރި ދެ ރަށެވެ. އެންމެ ފަހުން މި ދެޓީމު ވަދަކުރި މެޗުން ދުވާފަަރު މޮޅުވެފައި އޮތުމުން މިރޭގެ މެޗުގެ ފޯރި އިތުރަށް ގަދަވުމުގެ ފުރުސަތު ވަރަށް ބޮޑެވެ. ނަމަވެސް ދެޓީމަށް ވެސް މުބާރާތުގެ ފައިނަލުގެ ފުރުސަތު ލިބިފައި އޮތުމުން މިރޭގެ މެޗަށް ނުކުންނައިރު ދެޓީމުން ވެސް ބަދަލުތަކެއް ފެނުމަކީ އެކަށީގެންވާކަމެކެވެ.

Advertisement

ރ. އަތޮޅު މުބާރާތުގައި އިނގުރައިދޫ އަދި ދުވާފަރު ބައްދަލުކުރި މެޗު--ފޮޓޯ ވޮއިސް

ފަސް ޓީމު ވާދަކުރާ ރ. އަތޮޅުގެ ލީގު ބުރުގެ އެއް ވަނައިގައި އިނގުރައިދޫ އޮތީ ކުޅުނު ތިން މެޗުން ވެސް މޮޅުވެ ނުވަ ޕޮއިންޓާ އެކު އެވެ. ދެ ވަނައިގައި ދުވާފަރު ވެސް ނުވަ ޕޮއިންޓް ލިބިފައިވާއިރު، ތިން ވަނައިގައި އޮތީ ތިން ޕޮއިންޓާ އެކު އަލިފުށްޓެވެ. އިންނަމާދޫ އިން މުބާރާތް ނިންމާލީ ޕޮއިންޓެއް ނުލިބިއެވެ. އަދި މުބާރާތުގެ ފައިނަލް މެޗުގައި އިނގުރައިދޫ އާއި ދުވާފަރު ވާދަކުރާ މެޗު ކުޅުމަށް ހަމަޖެހިފައި ވަނީ ފެބުރުއަރީ މަހުގެ 25 ވަނަ ދުވަހު އެވެ.