ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2023 ގެ، ރ. އަތޮޅު ލީގު ބުރުގެ ފައިނަލްގައި މާދަމާ ހަވީރު އިނގުރައިދޫ އާއި ދެކޮޅަ ނުކުންނަ މެޗަށް ޓީމު އޮތީ ފުރިހަމައަށް ތައްޔާރަށް ކަމަށާއި ފައިނަލް މެޗަށް ނުކުންނާނީ އިތުބާރާއިއެކު ކަމުގައި ދުވާފަރު ޓީމުން ބުނެފިއެވެ.

ފައިނަލް މެޗާއި ބެހޭގޮތުން ވޮއިސް އެމްވީ އާއި ވާހަކަދައްކަމުން  ދުވާފަރު ޓީމުގެ މެނޭޖަރ އިބްރާހިމް ޖަލީލް ބުނީ ފައިނަލް މެޗަށް ޓީމު ވަރަށް ރަގަޅަށް ތައްޔާރުވެފައިވާ ކަމަށާއި ލީގު ބުރުގައި މިދެޓީމު ވާދަކުރި މެޗުގެ ނަތީއްޖާގެ އަސަރު ފައިނަލް މެޗުން ނުފެންނާނެކަމަށެވެ.

ލީގު ބުރުގައި އިނގުރައިދޫ އަތުން ބަލިވި މެޗުގައި ހެދުނު މިސްޓޭކުތައް ރަގަޅުކޮށް ފައިނަލް މެޗަށް ނުކުންނާނީ އިނގުރައިދޫ ޓީމަކީ މޮޅު ޓީމެއްކަން ދަނެގެންނެވެ. އިނގުރައިދޫ ޓީމަކީ ވަރަށް ވަރުގަދަ ޓީމެއް ލީގު ބުރުގައި ކުޅުނު ހުރިހާ މެޗެއް ކާމިޔާބުކޮށް އެޓީމުން ފައިނަލްގެ ފުރުސަތު ހޯދީ އަދި އެޓީމުގައި އެބަތިބި ރާއްޖޭގެ ފެންވަރުގެ މޮޅެތި ކުޅުންތެރިން ޖަލީލު ބުންޏެވެ.

2022 ވަނަ އަހަރު މިދެޓީމު ދެ ފައިނަލެއްގައި ވާދަކޮށްފައިވާއިރު ދެ މެޗުން ވެސް ދުވާފަރު މޮޅުވީ ފަހަތުން އަރައެވެ. އެތަޖުރިބާގެ އަލީގައި މަދަމާގެ މެޗަށް ދުވާފަރު ޓީމު ނުކުންނާނި ޖެހިޖެހިގެން ތިންވަނަ ފައިނަލުގައި އިގުރައިދޫ ބަލިކުރާށެވެ.

ޓީމުގެ ހުރިހާ ކުޅުންތެރިންގެ ވަރަށް ބޮޑު އެދުމެއް މާލެ، ހުޅުމާލެ އަދި ވިލިގިލީގައި ދިރިއުޅޭ ދުވާފަރުގެ ހުރިހާ ރައްޔިތުންވެސް ދަނޑަށް ވަޑައިގެން ޓީމަށް ތަރުހީބުދެއްވުމަކީ، ދުވާފަރު ޓީމުގެ މެނޭޖަރ އިބްރާހިމް ޖަލީލް ބުންޏެވެ.

މުބާރާތުގައި ދުވާފަރު ކުޅުނު ހަތަރު މެޗުގެ ތެރެއިން ތިން މެޗުން އެޓީމު މޮޅުވި އިރު ބަލިވީ ލީގު ބުރުގެ ފަހު މެޗުގައި އިނގުރައިދޫ އާއި ވާދަކޮށް 5-1 ގެ ނަތީއްޖާއަކުންނެވެ. ލީގު ބުރުގައި މީދު އާއި ވާދަކުރި މެޗު ދުވާފަރު ކާމިޔާބުކުރީ 6-1 ގެ ތަފާތު ބޮޑު ނަތީއްޖާއަކުންނެވެ. އަދި ދެވަނަ މެޗުގައި އިންނަމާދޫ އާއި ވާދަކުރި މެޗު 5-1 ގެ ނަތީއްޖާއަކުން ކާމިޔާބުކުރި އިރު އަލިފުށި އަތުން އެޓީމު މޮޅުވީ 1-0 ގެ ނަތިއްޖާއަކުންނެވެ.