ޓުއަރިޒަމް އެމްޕްލޮއިމެންޓް އެސޯސިއޭޝަން އޮފް މޯލްޑިވްސް (ޓީމް) ގެ ފަރާތުން ރިސޯޓުތަކުގެ މުވައްޒަފުންގެ ތުނބުޅި ކޮންމެ ދުވަހަކު ބޭލުމަށް މަޖުބޫރު ކުރުވާ ޕޮލިސީ ބަދަލު ކުރުމަށް އެދި އިކޮނޮމިކް މިނިސްޓްރީއަށް ޕެޓިޝަންއެއް ހުށަހަޅައިފިއެވެ.

އެގޮތުން ޓީމްއިން ކުރި ޓްވީޓެއްގައި ވަނީ ޓީމްގެ ޔުނިއަން ރިސޯޓްތަކުގެ ފަރާތުން ތުނބުޅި ޕެޓިޝަންވަނީ އިކޮނޮމިކް މިނިސްޓަރ ފައްޔާޒް އަށް ހުށަހަޅާފައިކަމަށް ބުނެފައެެވެ. މި ޕެޓިޝަންގައި 1500 ސޮއި ވާކަމަށް ޓީމްގެ ސެކްރެޓަަރީ ޖެނެރަލް މައުރޫފް ޒާކިރު ވިދާޅުވެފައިވެއެވެ.

މިއާއިއެކު ޓީމްއިން ވަނީ އިކޮނޮމިކް މިނިސްޓަރ ފައްޔާޒް އިސްމާއިލް މި މައްސަލައާއި މެދު ސީރިއަސް ކޮށް ވިސްނާ ތުނބުޅި ބަހައްޓަން ބޭނުންވާ ރިސޯޓް މުވައްޒަފުންނަށް މިކަން ކުރުމުގެ ފުރުސަތު ދޭނެ ކަމަށް ޤަބޫލްކުރާ ކަމަށް ބުނަފައެވެ.

Advertisement

މަސައްކަތަށް ނިކުތުމުގެ ކުރިން ކޮންމެ ދުވަހަކު ތުނބުޅި ބާލައި އޮމާން ކުރުމަށް ހަދާފައިވާ ގަވާއިދާއި ދެކޮޅަށް ރިސޯޓްތަކުން ކަންބޮޑުވުން ފާޅުކުރަމުން އަންނަތާ އަހަރު ތަކެއް ވަނީ ވެފައެވެ.

މިކަމާއި ގުޅިގެން މައުރޫފް ވިދާޅުވެފައިވަނީ ކްލީން ޝޭވް ގޮތެއްނޫން ގޮތެއް ބޭނުން ވާ ކަމަށާއި ބޭރުގެ ހޮޓެލް ޗެއިން ތަކުގައިވެސް ޑީސެންޓް ލެވެލް އަކަށް ތުނބުޅި ބަހައްޓަން ހުއްދަ ދޭ ކަމަށެވެ. އަދި ރާއްޖޭގެ ބައެއް ރިސޯޓުތަކުގައި މިހާރުވެސް އެކަން އެބަ ޕްރެކްޓިސް ކުރާކަމަށެވެ.

އެހެންކަމުން ޕެޓިޝަންގައި ހަމަ އެމިންގަނޑުތަކާ އެއްގޮތަށް ތުނބުޅި ބެހެއްޓުމަށް ހުއްދަ ދިނުމަށް އެދިފަ ވާނެ ކަމަށް މައުރޫފް ވިދާޅުވެފައިވެއެެވެ.

މީގެ އިތުރުން މައުރޫފް ވަނީ މިމައްސަލައާއި ގުޅިގެން މިނިސްޓަރ ފައްޔާޒް އާއިއެކު ބޭއްވުުނު ބައްދަލުވުން ވަރަށް ކާމިޔާބު ކަމަށް ފާހަގަކުރައްވާ މައްސަލައަށްް ހައްލު ލިބިގެން ދާނެ ކަމަށް ގަބޫލް ކުރައްވާ ކަމަށް ވިދާޅުވެފައެވެ.