މިއަހަރު ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް ޖުމްހޫރީ ޕާޓީއިން ކެންޑިޑޭޓެއް ނެރޭ ހިސާބުން، މިހާރު އެމްޑީޕީގެ ސަރުކާރާއި އެކު ހަދާފައިވާ ކޯލިޝަން ރޫޅިގެންދާނެ ކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ރިޔާސީ އިންތިޚާބަށް ޖޭޕީން ކެންޑިޑޭޓެއް ނެރެން އެ ޕާޓީގެ ކޮންގްރެސްގައި ހުށަހެޅި ގަރާރު ފާސްވުމާއި ގުޅިގެން އެކަމާއިމެދު ކަންބޮޑުވުން ފާޅުކުރައްވައި ޝަރީފް ކުރެއްވި ޓްވީޓެއްގައި ވިދާޅުވީ، އަބަދުވެސް އޮންނާނީ މައި ދެ ޕާޓީއެއް ކަމަށެވެ. އެއީ ވެރިކަން ކުރާ ޕާޓީއަކާއި އިދިކޮޅު މައި ޕާޓީކަމަށެވެ.
"ދެން ތިބޭނީ އެ ދެ ޕާޓީގެ ބައިވެރިން، ކޮންމެވެސް އެއް ސިފައެއްގައި. ޖުމްހޫރީ ޕާޓީވެސް ކޯލިޝަނާއި ވަކި ވެއްޖެނަމަ އެ ޕާޓީވެސް ވެގެންދާނީ އޮޕޮޒިޝަން ކޮމްބިނޭޝަން ތެރޭގައި ހިމެނޭ ޕާޓީއަކަށް" ޝަރީފު ވިދާޅުވިއެވެ.
ޝަރީފް އިތުރަށް ވިދާޅުވީ، ޖޭޕީއިން އަމިއްލަ ކެންޑިޑޭޓެއް ނެރުމަށް ނިންމާ ހިސާބުން މިހާރު އެމްޑީޕީ އާއި އެކު އޮތް ކޯލިޝަން ނިމުމަކަށް އަންނާނެކަމަށެވެ. އެހެންކަމުން އެންްމެ ރަނގަޅު ގޮތަކީ މިހާރު އޮތް ކޯލިޝަން ދެމެހެއްޓުންކަމަށާ، އެއީ ރައީސް ޞާލިހަށް ތާއިދުކުރާ ފަރާތްތަކުން އެދޭ ގޮތް ކަމަށް ޝަރީފް ވިދާޅުވިއެވެ.
އެހެންނަމަވެސް އެކަން ކުރުމުގެ ހުރިހާ ބާރެއްވެސް އޮތީ ޖޭޕީގެ އަތުގައިކަމަށްވެސް ޝަރީފް ވިދާޅުވިއެވެ.
ޖޭޕީގެ ގައުމީ ކޮންފަރެންސުގައި އެ ޕާޓީ އިން ރިޔާސީ އިންތިހާބުގައި ވާދަކުރުން ނުވަތަ އެ ޕާޓީ އިސްވެ އޮވެ އެހެން ޕާޓީތަކާއެކު ކޯލިޝަން ހަދައިގެން ނިކުތުމާމެދު ގޮތް ނިންމުމަށް ޤަރާރު ހުށައެޅުއްވީ ތިނަދޫ އުތުރު ދާއިރާގެ ކުރީގެ މެންބަރު އަބްދުالله އަހްމަދެވެ.
މި ގަރާރަށް ވަރަށް ފޯރީގައި ގާތްގަނޑަކަށް ގަޑިއެއްހާއިރު ވަންދެން ބަހުސް ކުރުމަށްފަހު ވޯޓަށް އެހުމުން، ކޮންގްރެސްގައި އެވަގުތު ބައިވެރިވެވަޑައިގެންނެވި 416 މެންބަރުންގެ އިއްތިފާޤުން ގަރާރު ވަނީ ފާސްވެފަ އެވެ.
ގަރާރު ފާސްވިކަން އިއުލާން ކުރައްވާ ގާސިމް ވިދާޅުވީ އެ ގަރާރަކީ ކޮންމެހެން އޭގެ މައްޗަށް އަމަލު ކުރުން ލާޒިމް ގަރާރެއް ނޫން ކަމަށެވެ. ނަމަވެސް އެހާ ގިނަ އަދަދެއްގެ މެންބަރުންގެ ވޯޓުން ގަރާރު ފާސްވުމުން، އެ ގަރާރު ޖޭޕީގެ ކައުންސިލަށް ހުށަހަޅުއްވާނެ ކަމަށް ގާސިމް ވިދާޅުވިއެވެ.
ރިޔާސީ އިންތިޚާބުގައި ވާދަކުރުމަށް ޖުމްހޫރީ ޕާޓީގެ ކޮންގްރެސްއިން ފާސްކުރިނަމަވެސް، މިއީ އެޕާޓީގެ ކައުންސިލަށް ދިން ލަފައެކެވެ. އެކަމުގައި އިތުރަށް ކުރަންޖެހޭ ކަންކަން ކުރިއަށްގެންދާނީ ކޮންގްރެސް އިން އެކުލަވައިލާ އެޕާޓީގެ އައު ކައުންސިލުންނެވެ.
ޖޭޕީއަކީ މިހާރުގެ ސަރުކާރުގެ ކޯލިޝަން ބައިވެރިއެއްވެސްމެއެވެ. ކުރިއަށް އޮތް ރިޔާސީ އިންތިޚާބުގައި ވާދަކުރައްވާ އެމްޑީޕީގެ ކެނޑިޑޭޓުގެ ހައިސިއްޔަތުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ، އިންތިޚާބުގައި ވާދަކުރަން ކޯލިޝަން ހެދުމުގެ ދަޢުވަތު ޖުމްހޫރީ ޕާޓީއަށްވެސް ދެއްވާފައެވެ.
Advertisement
This content is created and paid for by advertisers and does not involve Voice Journalists
