ބޭރު ގައުމުތަކުން ނަގާފައިވާ ލޯނުތައް ފަސޭހަކަމާއެކު ދެއްކޭނެ މަގު ފަހިކޮށްދިނުމަށް ކުރީގެ ރައީސް ޔާމީން އަބްދުލްގައްޔޫމުގެ ވެރިކަމުގައި 2017 ވަނަ އަހަރު ހުޅުވި ސޮވެރިން ޑިވެލޮޕްމެންޓު ފަންޑުގެ ހުރިހާ ބާރުތައް ފިނޭންސް މިނިސްޓަރު އިބްރާހިމް އަމީރަށް ދިނުމަށް މަޖިލީހުން ފާސްކޮށްފި އެވެ.
މަޖިލީހުން އެފަދައިން ފާސްކުރުމާއެކު ދެން އެސްޑީއެފަށް ޖަމާކުރާ ފައިސާ ޚަރަދުކުރާނެ ގޮތް ނިންމާނީ މިނިސްޓަރުގެ ލަފާގެ މަތިން ރައީސުލްޖުމްހޫރިއްޔާއެވެ. އަދި ފަންޑު ބެލެހެއްޓުމުގެ ހުރިހާ މަސައްކަތެއް ކުރާނީ ސީދާ ފިނޭންސް މިނިސްޓްރީންނެވެ.
މި އިސްލާހާއެކު އެސްޑީއެފުގައި ހުންނަ ފައިސާ އިންވެސްޓުކުރާނެ ގޮތް ނިންމަން ފަސް މެންބަރުންގެ ކޮމިޓީއެއް އެކުލަވައިލަންޖެހެއެވެ. އަދި އެ ކޮމެޓީވެސް އެކުލަވާލާނީ ފިނޭންސް މިނިސްޓަރުގެ ލަފާފުޅުގެ މަތިންނެވެ. އެއާއެކު އެސްޑީއެފް ހިންގުމާއި ގުޅޭ އުސޫލުތައް އެކުލަވާލަން ޖެހޭނެ އެވެ.
އެސްޑީއެފްގެ ހުރިހާ ބާރުތައް ފިނޭންސް މިނިސްޓަރު އަމީރަށް ލިބޭގޮތަށް މަޖިލީހުން ފާސްކުރުމުގެ ކުރިން އެސްޑީއެފް ބަލަހައްޓަމުން އައީ މޯލްޑިވްސް މަނިޓަރީ އޮތޯރިޓީންނެވެ. އެހެން ނަމަވެސް ފަންޑު ބޭނުން ކުރުމާއި ފައިސާ ޖަމާކުރުމުގެ ކަންކަން ބަލަހައްޓަވަމުން އައީ ފިނޭންސް މިނިސްޓްރީއާއި ރައީސް އޮފީހުގެ ބެލުމުގެ ދަށުންނެވެ.
މިހާރު ގެނެވުނު އިސްލާހުތަކާއެކު ފަންޑު ބެލެހެއްޓުމުގެ ހުރިހާ ބާރެއް ފިނޭންސް މިނިސްޓަރަށް ލިބޭއިރު ރައީސް ޔާމީނުގެ ވެރިކަމުގައި ފަންޑަށް ޖަމާވެފައި ހުރި ބޭރު ފައިސާ މާރުކޮށް ދިވެހި ފައިސާއަށް ބަދަލުކުރަން ސަރުކާރުން ވަނީ 2020 ވަނަ އަހަރު ނިންމާފަ އެވެ.
އެއާއެކު އެގޮތަށް އެކަން ނުކުރުމަށް އިޤްތިޞާދީ ފަންނުގެ ބޭފުޅުން ސަރުކާރަށް ލަފާއެރުވިއެވެ. އެއީ އެފަދައިން އެކަން ކޮށްފިކަމަށް ވާނަމަ ބޭރު ގައުމުތަކުން ނަގާފައިވާ ދަރަނި އަނބުރާ ދެއްކުމަށް ބޮޑެތި ގޮންޖެހުންތަކާއި ސަރުކާރުން ކުރިމަތިލާން ޖެހޭނެތީކަމަށް އެ ބޭފުޅުން ވިދާޅުވެފައި ވެއެވެ.
Advertisement
This content is created and paid for by advertisers and does not involve Voice Journalists
