ކޮވިޑްގެ ދަތި އުނދަގޫ ހާލަތުގައި ރާއްޖޭގެ ހުރިހާ ވަތްގަނޑުތަކަކަށް ވަންނަމުންދިޔަ ފައިސާ ހުއްޓި، ދެ އަހަރުވެގެން ދިޔައިރުވެސް، ކަމެއް ދިމާވެގެން އުޅޭކަމުގެ އިހްސާސް, ރައްޔިތުންނަށް ވާވަރަށްވެސް ސަރުކާރުން އެއްވެސް މުދަލެއްގެ އަގު ބޮޑެއް ނުކުރާ ކަމަށް މިލަންދޫ ދާއިރާގެ މެންބަރު ޢަލީ ރިޒާ ވިދާޅުވެއްޖެއެވެ. 

މިއަދުގެ ރައްޔިތުންގެ މަޖިލީހުގެ ޖަލްސާގައި ދަރަނި ރީސްޓްރަކްޗާ ކުރުމަށް ސަރުކާރަށް ދީފައިވާ ލަފާ ތަންފީޒު ކުރުމަށް ގޮވާލައި ގަލޮޅު އުތުރު ދާއިރާގެ މެންބަރު އީވާ އަބްދުالله ހުށަހެޅުއްވި ގަރާރަށް ބަހުސް ކުރައްވަމުން، ރިޒާ ވިދާޅުވީ، ފާއިތުވި ހަތަރު އަހަރާ ބަޔަކީ މިހާތަނަށް މި ދިވެހިރާއްޖެ ނުދެކޭ ވަރުގެ ހަމަހިމޭން އަމާން ދުވަސްތަކެއް ކަމަށެވެ. 

ރިޒާ ވިދާޅުވީ ދައުލަތުގެ ދަރަނި ބޮޑު ވުމަކީ އޭނާވެސް އަދި ދިވެހި ރައްޔިތުންވެސް ކަންބޮޑުވާ ކަމެއް ކަމަށާ، އެހެން ނަމަވެސް، ދަރަނި ބޮޑުވެފައި ވަނީ ކުރީ ސަރުކާރުތަކުން ކަންކަން ކޮށްފައި ހުރ ގޮތުން ކަމަށް އޭނާ ވިދާޅުވި އެވެ. 

މިއާއެކު ރިޒާ ވަނީ، މިިސަރުކާރުގެދަރަނި ބޮޑު ކަމުގެ ވާހަކަ ދައްކާއިރު، ކޮވިޑްގެ ދަތި ހާލަތުގައި ވެސް މިިސަރުކާރުން ކަންކަން ކުރެއްވި ގޮތާއި، ކުރީގެ ސަރުކާރުތަކުން ކަންކަން ކުރިގޮތް ބަލަންޖެހޭ ކަމަށް ވިދާޅުވެ، ކުރީގެ ރައީސް ޔާމީން އަބްދުލްގައްޔޫމްގެ ސަރުކާރުގެ އިގްތިސާދީ ސިޔާސަތު ތަކަށް ވަރަށް ބޮޑަށް ފާޑުވިދާޅުވެފައެވެ.  

ކޯވިޑް ފަދަ ޢާލަމީ ވަބާއެއް ކުރިމަތި ނުވާއިރު ރައީސް ޔާމީންގެ ސަރުކާރުން އެފަދައިން ކަން ކުރައްވާފައިވާ އިރު، ކޮވިޑުގެ ދަތި އުދަގޫ ދުވަސްތަކުގައިވެސް ރައީސް ޞާލިހު ގެ ސަރުކާރުން ރައްޔިތުންނަށް އަޅާލައި، ތަކެތީގެ އަގުތައް ބޮޑުވިޔަ ނުދީ ހިފަހައްޓާފައިވާ ކަމަށް ރިޒާ ވިދާޅުވިއެވެ. 

ރިޒާ ވިދާޅުވީ، ތަކެތީގެ އަގު ބޮޑުކުރުމުގެ ބަދަލުގައި ރައީސް ޞާލިހު ވަނީ، ސަލާން ޖަހައިގެން ނަމަވެސް ލާރި ހޯދައިގެން ރާއްޖޭގެ ރައްޔިތުންގެ ބަނޑު ފުރާނަ މުއްތި ކުރެވޭނެ ގޮތް ހަދައިދެއްވުމަށް މަސައްކަތް ކުރައްވާފައިކަަމަށެވެ. އަދި ހަމައެހެންމެ، އެ ދަތި ހާލުގައިވެސް، ބޭރުގެ ގައުމުތަކުން ފައިސާ ހޯދައިގެން، ތަރައްޤީގެ ޕްރޮޖެކްޓް ތައް މަޑުނުޖެހި ކުރިއަށް ގެންދެވޭނެ މަގު، ރައީސް ޞާލިހު ތަނަވަސް ކޮށްދެއްވި ކަމަށެވެ. 

އަދި އޭގެ އިތުރުން، ވިޔަފާރިތައް ވެސް ހުއްޓުމަށް އަޔަ ނުދީ، ލުއި ލޯނުތައް ވިޔަފާރިވެރިންނަށް ދެއްވައިގެން، ވިޔަފާރިތައް ކުރިއެރުވުމަށް ރައީސް ޞާލިހު މަސައްކަތް ކޮށްދެއްވިކަމަށް ރިޒާ ވިދާޅުވި އެވެ. 

ރިޒާ ވިދާޅުވީ، ދިވެހިރާއްޖެ މިހާރު ހަމަޖެހި "ސްޓޭބަލް" ވެފައި މިވަނީ ރައީސް ޞާލިހު ގެ ހިކްމަތްތެރިކަމާއި އެކު އެޅުއްްވި ފިޔަވަޅުތަކުން ކަމަށެވެ.