ކުރީގެ ރައީސް މައުމޫނު އަބްދުލްގައްޔޫމުގެ އެމްއާރުއެމް އާއެކު ކޯލިޝަން ހަދައިގެން އެމްޑީޕީއަށް ވާނެ ފައިދާއެއް ނޯންނާނެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު (މަވޯޓާ) ވިދާޅުވެއްޖެ އެވެ.
މަވޯޓާ މިފަދައިން ވިދާޅުވެފައިވަނީ ރިޔާސީ އިންތިޚާބަށް ފަޅި ބޮޑުކުރަން ސިޔާސީ ޕާޓީތަކުން ކޯލިޝަން ހެދުމަށް މަޝްވަރާ ކުރަމުންދާ ދަނޑިވަޅެއްގައި ކުރެއްވި ޓްވީޓެއްގަ އެވެ.
އެގޮތުން މަވޯޓާ ވިދާޅުވީ، އެމްއާރުއެމް އާއެކު އެމްޑީޕީ ކޯލިޝަން ހެދުމަކީ ޕާޓީއަށް މާބޮޑު ފައިދާއެއް ކުރާނެކަމެއް ކަމަށް ޤަބޫލު ނުކުރައްވާ ކަމަށެވެ. އެފަދަ ކޯލިޝަނުން ފައިދާ ވާނީ އެމްއާރުއެމަށް ކަމަށް ޝަރީފު ވިދާޅުވި އެވެ.
އެއާއެކު އޭނާ ވިދާޅުވީ އެމްއާރުއެމާއެކު ކޯލިޝަން ހެދުމަށްވުރެ އަދާލަތާއި އެމްޑީއޭގެ ކޯލިޝަންވެސް އެމްޑީޕީއަށް މާ ފައިދާ ބޮޑުވާނެ ކަމަށެވެ.
އެހެން ނަމަވެސް، މި ދަނޑިވަޅުގައި ބަލަންވީ ޖުމްހޫރީ ޕާޓީއާއެކު ކޯލިޝަން ހެދޭނެ ގޮތެއް ކަމަށާއި، އެފަދަ ކޯލިޝަނަކުން އެމްޑީޕީއަށް މާބޮޑަށް ފައިދާ ކުރާނެކަމަށް މަވޯޓާ ވިދާޅުވި އެވެ.
"އެމްއާރުއެމްއަށް ވުރެ އަދާލަތާއި އެމްޑީއޭވެސް މާ ބޮޑު، ހަގީގަތުގައި އެމްއާރުއެމް އާއެކު ކޯލިޝަނެއް ނެހެދިޔަސް އެމްޑީޕީއަށް ވާނެ މާބޮޑު ކަމެއް ނެތް. ޖޭޕީ އާއެކު ކޯލިޝަން ހެދޭތޯ އެކަން ވާނެ ފުރުސަތު އޮތިއްޔާ އުޅެން ވެސް މާ ރަނގަޅު"
މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު (މަވޯޓާ)
އެމްއާރުއެމްއަށް 3000 މެމްބަރުން ހަމަކުރުމަށް އެ ޕާޓީން ވަނީ އިލެކްޝަން ކޮމިޝަނަށް ފޯމުތަކެއް ހުށައަޅާފަ އެވެ. އަދަދުން ބަލާކަމަށް ވާނަަމަ، ޝަރީފު އެ ވިދާޅުވިގޮތަށް އެމްއާރުއެމްއާއެކު ކޯލިޝަން ހެދުމަކީ ބުއްދިވެރި ގޮތަކަށް ނުވާނެކަމަށް ސިޔާސީ ތަޖުރިބާކާރުން ވިދާޅުވެއެވެ.
އެހެން ނަމަވެސް އެމްއާރުއެމްގެ ލީޑަރަކީ، ކުޅަދާނަ އަދި ހުޝިޔާރު ސިޔާސީ ލީޑަރަކަށް ވުމުން، ސިޔާސީ ގޮތުން އެމްޑީޕީއަށް ކުރިއަށް ދިއުމަށް ލަފާދީ، އިންތިޚާބު ކާމިޔާބުކުރުމަށް ބޭނުންވާ އުކުޅުތައް ބުނެދީ އޮޅުންފިލުވައިދިނުމަށް އެމްއާރުއެމްގެ ޒައީމު އަދި ކުރީގެ ރައީސް މައުމޫނުގެ ތަޖުރިބާ ބޭނުން ކުރެވޭނެކަމަށް ގިނަ ބަޔަކު ބުރަވެއެވެ.
އެހެންކަމަށްވާނަމަ އެފަދަ ކޯލިޝަނަކުން ކުރާނެ މަންފާތަކެއްވެސް އޮވެދާނެކަމަށް އެ ފަރާތްތައް ވިދާޅުވެއެވެ.
އަނެއްކޮޅުން ޖުމްހޫރީ ޕާޓީގެ ގައުމީ ކޮންފަރެންސްގެ އިއްތިފާގުން ވަނީ އެޕާޓީގެ އަމިއްލަ ކެންޑިޑޭޓެއް ނެރެގެން، ނުވަތަ އެ ޕާޓީ އިސްވެ އޮވެ ހިންގާ ކޯލިޝަނަކުން ރިޔާސީ ރޭހުގައި ވާދަކުރުމަށް ކައުންސިލަށް ލަފާއަރުވާފަ އެވެ.
ޤައުމީ ކޮންފަރެންސްގެ ނިންމުމާއި އެއްގޮތަށް ޕާޓީން ކެންޑިޑޭޓެއް ނެރެން ފާސްވެއްޖެކަމަށް ވާނަމަ ޔަގީނުންވެސް ފުރަތަމަ ބުރުގައި ޖޭޕީން ރައީސް ޞާލިހުގެ ފަހަތްޕުޅަކަށް ނާރާނެ އެވެ. އެހެންކަމުން އެފަދަ ހާލަތެއްގައި ރައީސް ޞާލިހު ދެވަނަ ރައުންޑަކަށް ދަތުރުކުރުމުގެ ފުރުސަތު ކުޑަކަމަށް ސިޔާސީ މަޝްރަހު ދިރާސާ ކުރައްވާ ފަރާތްތައް ދަނީ ވިދާޅުވަމުން ނެވެ.
Advertisement
This content is created and paid for by advertisers and does not involve Voice Journalists
