އެހީތެރިޔަކާއި ނުލާ ލޯފަން މީހުންނަށް ސިއްރު ވޯޓުލުމުގެ ހައްގުލިބިގަތުމަށްޓަކައި ބްލައިންޑް އެންޑް ވިޝުއަލީ އިމްޕެއާޑް ސޮސައިޓީ އޮފް މޯލްޑިވްސް (ބީވީއައިއެސްއެމް) އިން ދަނީ އިލެކްޝަން ކޮމިޝަންއާއި ރާއްޖޭގެ ސިޔާސީ ޕާޓީތައް އަދިި މީޑިޔާތަކާއި ބައްދަލު ކުރަމުންނެވެ.

މިކަމާއި ގުޅިގެން ބީވީއައިއެސްއެމް އިން ވަނީ "ވޮއިސް" އަށް ވެސް އިއްޔެ ބަސްދީގަތުމެއް ދެއްވާފައެވެ.

އެގޮތުން ލޯފަން މީހުންނަށްވެސް ސިއްރު ވޯޓުލުމުގެ ހައްގު ގާނޫނުން ކަށަވަރު ކޮށްދީފައިވާއިރު މިކަން ކުރުމަށްޓަކައި އެހީތެރިޔަކާއިއެކު ދާ ދިޔުމުގެ ސަބަބުން ހަގީގަތުގައި އެ މީހެއްގެ ވޯޓް ސިއްރު ނުވާނެކަަމަށް އެޖަމްއިއްޔާއިން ވަނީ ފާހަގަކޮށްފައެވެ.

އަދި މިކަން ހައްލުކޮށް މިއަހަރު ސެޕްޓެމްބަރު މަހު ބޭއްވޭ ރިޔާސީ އިންތިޙާބުގައި މިނިވަންކަމާއިއެކު ވޯޓުލެވޭނެ ގޮތެއް ހޯދުމަށްޓަކައި ދުނިޔޭގެ އެކި ކަންކޮޅުތަކުގައ މިކަން ކުރެވެމުން އަންނަ ގޮތް ވަނީ ދިރާސާކޮށްފައި ކަމަށް ބުނެފައިވެއެވެ.

އެގޮތުން ބީވީއައިއެސްއެމްއާއި އިލެކްޝަން ކޮމިޝަންްއާއި ބޭއްވުނު ބައްދަލުވުންތަކުގައި މި ދިރާސާއިން ތައާރަފް ކޮށްފައިވާ ޓެމްްޕްލޭޓް ވަނީ ދައްކާލާފައެވެ. އަދި ލޯފަން މީހުންނަށް އަމިއްލަ އިޚްތިޔާރުގައި ވޯޓްލެވޭނެ ގޮތް ހަމަޖައްސައި ދެއްވާނެ ކަމުގެ ޔަގީންކަން އިލެކްޝަން ކޮމިޝަނުން ދެއްވާކަމަށް އެޖަމްއިއްޔާއިން ވަނީ ބުނެފައެވެ.

އިލެކްޝަން ކޮމިޝަންގެ އިތުރުން ހިއުމަން ރައިޓްސް ކޮމިޝަން، އެމްޑީޕީ، އެމްއެންޕީ ފަދަ ސިޔާސީ ޕާޓީތަކާވެސް އެ ޖަމިއްޔާ އިން ވަނީ ބައްދަލުކޮށްފައެވެ.

އަދި މީޑިއާތައް މެދުވެރިކޮށް އާންމު ރައްޔިތުން މިކަމަށް ހޭލުންތެރިކުރުވުމަށްޓަކައި ކުރެވޭ މަސައްކަތުގެ ތެރެއިން ބީވީއައިއެސްއެމް ބޭފުޅުން ވަނީ އިއްޔެ "ވޮއިސް" އަށްވެސް ޓެމްޕްލޭޓް ދައްކާލާފައެވެ. 

އެގޮތުން ތައާރަފް ކޮށްފައިވާ ޕްލާސްޓިކް ޓެމްޕްލެޓް ތައްޔާރު ކޮށްފައިވަނީ ވޯޓް ކަރުދަހާއި އެއްވަރަށް، ވޯޓް ކަރުދާހުުގައި ފާހަގަ ޖަހާގޮޅިއާއި ދިމާލުން ލޯފަން މީހުންނަށް އިނގިލިން އިހްސާސް ކުރެވޭނެ ފަދައިން ފާހަގަ ނިޝާނެއް ކަނޑާފައެވެ. މިޓެމްޕްލޭޓް ވޯޓް ކަރުދާސް މަތީ ބޭއްވުމަށްފަހު ފަސޭހަކަމާއިއެކު އެބޭފުޅަކު ތާއީދު ކުރަ ކެނޑިޑޭޓެއްގެ ނަންބަރުގެ މަތީގައި ކަނޑާފައި އިންނަ ނިޝާނުގެ އެހީގައި ފާހަގަ ޖެހޭނެއެވެ. އަދި އަމިއްލައަށް އެކަރުދާސް ވޯޓު ފޮށްޓަށް ލެވޭނެއެވެ. ކޮންމެ ވޯޓް ފޮށްޓަކަށް ބޭނުންވަނީ މީގެ އެންމެ ޓެމްޕްލޭޓްއެކެވެ.

ޖަމްއިއްޔާގެ ފަރާތުން "ވޮއިސް" އަށް ދެއްވި ބަސްދީގަތުމުގައި ވަނީ އެބޭފުޅުންގެ އިހްސާސްތަކާއި، ކޮށްފައިވާ ހިތި ތަޖުރިބާ އަދި ކުރިމަތިލާންޖެހިފައިވާ ތަކުލީފުތައް ހިއްސާކުރައްވާފައެވެ.

އެގޮތުން އެކި ސިޔާސީ ފިކުރު ހުންނަ އާއިލީ މެމްބަރުން އަދި ރައްޓެހިންނާއިއެކު ވޯޓްލާން ދިޔުމުން ނުފޫޒު ފޯރުވަން މަސައްކަތް ކުރުން ފަދަ ކަންކަމުގެ ވާހަކަ ވަނީ ކިޔާދެއްވާފައެވެ. އަދި މިކަމުގެ ސަބަބުން ވަރަށް ގިނަ މީހުންނަށް ނަފްސާނި ގޮތުން އަސަރު ކޮށްފައިވާ ކަމަށް ވެސް ވަނީ ވިދާޅުވެފައެވެ.

އެބޭފުޅުން ވަނީ އެކުރައްވާ މަސައްކަތުގައި ބައިވެރިވެ އެއްބާރުލުން ދެއްވާ އެބޭފުޅުންގެ ހައްގުތައް ކަށަވަރު ކޮށްދިނުމަށް އާންމުންގެ ފަރާތުން އަދި ރާއްޖޭގެ އިދާރާތަކާއި ސިޔާސީ ޕާޓީތަކުންވެސް މަަސައްކަތް ކޮށްދެއްވުމަށް އެދިފައެވެ.